JOVENS SIRA ATAKA MALU HO FATUK, BESI KANU HO KATANA IHA KULUHUN

Tempo Semanal, Breaking News 09/12/2012

Iha oras rai nakaras ona jornalista Tempo Semanal liu daudaun iha liuron parte kuluhun karaik ninia diresaun. La kleur trafiku iha iha oin fila halai hikas ba diresaun Audian ninian no kontra regras Tranzitu nian.

Sofer taxi ida ho ulun sai husi Janela hakilar, "ema tuda malu no tah malu ne'eba ne'e. Fila-fila ona la'e sira tuda rahun tiha imi nia kareta."

Hateke ba dalan sorin-sorin besik ponte Kuluhun joven sira liman sorin lamas tun ba rai hiit fatuk hodi tuda no liman sori kaer hel besi kanu. Jovens balun hamriik hela iha ponte leten no balun duni malu, tuda malu besik estasaun mina iha Kuluhun ninian.

"Baino fila ona, ema hodi katana tah malu iha ne'eba ne'e," tiu ida ne'ebe hatais kalca naruk no sandalas kaer deit iha liman la'o ho lalais husi diresaun ponte ninian ba fali Audian ninian.

Tiu ne'ebe la'o ho ta'u ne'e ka'er ninia oan mane klosan nia liman metin no ninia kalca ai lulun sa'e tiha la'o husi dalan sorin karuk husi diresaun audian ba bekora maibe tiu la'o fihir ba kotuk la oras ne'e foo hakat lalais de'it. Iha ponte leten no liuron klaran besik kruzamentu kulun hun nakonu ho fatuk no joven balun kaer hela besik kanu naruk bo'ot ida.

To'o noticia ne'e hatun Tempo Semanal seidauk konfirma karik iha vitima ruma no suspeitu balun maka kaptura. tuir observasaun iha de'it kareta hi lux ida ho lampu serene iha leten maka foo piska-piska. Membru PNTL ida iha kareta laran ne'ebe iha momentu hanesan liu husi fatin refere maka halo atusaun koko atu hapara tuda malu ne'e.

Komunidade kuluhun wain maka sai nakonu liuron hodi haree jovens sira tuda malu ne'e no fo lembra fali ba akonetcimentu atakes husi Milisia Aitarak ho TNI ne'ebe hamate ema balun iha loron rua antes de konsulta popular iha fulan agusto 1999.

MOSU TUDA MALU IHA GMT DILI PNTL NAIN RUA TAMA OSPITAL

Iha tinan ruma kotuk mos mosu violencia
 balun iha GMT ate alega kontra membru
CPD balun ne'ebe koko atu ataka Xanana
iha dialogu ruma ne'ebe hala'o
iha ginasiu Dili ninian (foto Filed)

Tempo Semanal Breaking news, 07/12/2012

Mosu tuda malu iha GMT ne’ebe entre apoiantes ba jogu voli husi Distritu rua hanesan Baukau ho Dili ne’ebe maka joga bola voli hodi resulta membru PNTL nain rua kanek no vidru balun GMT no kadeiras ba haree nain sira iha GMT hetan estragus wainhira grupu sira ne’e ataka malu.

“Ami nia membru PNTL nain rua maka hetan kanek tan ba tuda husi penontong bola voli husi distritu rua,” dehan ofisial ida husi PNTL ba Tempo Semanal.

Iha jogu bola voli ne’ebe hala’o iha GMT la’os de’it atu anima ema maibe hamosu fali konflitu entre apoiantes husi distritu rua ne’ebe maka joga. Problemas ne’e mosu deskonfia rejulta husi  goza malu husi apoiantes sira no mos balun ladauk pronto atu simu ninia parte lakon. Mas tuir espektador ida ne'ebe husi Baukau dehan, "problemas ne'e mosu tan ba sira deskonfia arbitu ne'ebe la netral."

Iha kalan (07/12) ne’ebe hanesan loron aniversariu invazaun tropas Indonesia mai Timor Leste ba tinan tolu nolu resin hitu ne’ebe hodi haterus no mate Timor oan wain ne’e, joventude balun sei hamosu nafatin violencia iha atividades ne’ebe loloos atu anima povo sira.

“Ita triste ho foin sa’e sira ninia hahalok anarkismu ne’e. Bu’at ida jogu ne’e normal kuandu manan ka lakon la’os tan ba la puas ne’ebe ita halo violencia hodi estraga sasan ne’ebe iha GMT ne’e hatudu izemplu la diak,” katak ema ne’ebe hateten ninia naran Abilio hela iha Dili.

Nia lamenta no mos kondena maka’as atetude violencia ne’ebe komete husi espektadores husi ekipa rua maka joga iha kalan ne’e.

Iha Akontecimentu ne’e jovens sira hodi fatuk hodi ataka malu nune’e hakanek membru PNTL nain rua no fmos iha tuda malu ne’e halo estragus barak ba janela GMT ne’ebe foin maka rehabilita hotu iha tinan kotuk. Tuir observasaun jovens sira ne’e mos halo estraga ba kadeira ne’ebe monta ona hodi espektadores sira tuur ba.

“Ka’er nia, ida tuda dadauk ne’eba,” dehan membru PNTL ida ne’ebe hamriik besik joven ida ne’ebe tuda ninia oponente maske nia besik hela autoridades seguranca.

Ho PNTL ninia atuasaun konsege hapara ataka malu grupu sira ne’ebe tuda malu.