DESKONFIA: SEEAU HO AECCOP KONKALIKON KOORDINADOR PPR AYAM POTONG.
Tan informasaun ne’ebe jornal ne’e konsege koleta hatudu katak momos katak Sekretariu Estadu Eletrisidade Agua ho Urbanizasaun hatene katak kompania ne’ebe kaer projetu lina eletrisidade Laga, Baguia ho Afaloicai ne’e nain husi Sr. Julio Alvaro maiske nega husi Sra. Josefa..
Iha ezekusaun projetu pakote referendu (PPR) hamosu problema barak, tan falta planeamentu mak di'ak, ezekusaun ppr fraku no kuran ekipa inspesaun ida di'ak ba kualidade pakote ne'ebé gasta orsamentu do estadu besik millaun dolar Amerikanu 85 ne'e. Projetu Pakote referendu ne'ebé hahú lansa iha selebrasaun ukun rasik an indonézia ninian, iha loron 17/08/2009 ne'e mós la iha transparénsia. Hanesan Deputadu Joaquim Amaral husi bankada Fretilín no membru komisaun infraestrutura dale katak tuir lista pakote referendu ba de'it estrada, bee moos, eskola no ospitál mais eletrisidade ne’e la iha surat ne'ebé mak primeiru ministru haruka ba parlamentu hodi justifika ezisténsia pakote referendu. “Partikularmente eletrisidade ne’e dokumentu ne'ebé haruka ba parlamentu la iha, ha'u husu dala rua sira la hataan no dezvia tiha maibé responde fali buat seluk,ida ne'e ba ami hanesan “penasaran,” agora hanesan membru parlamentu no reprezentante povu iha direitu para hatene informasaun no ne'e direitu konstitusionál povu nian,” deklara Joaquim.
Bainhira dada lia ho Jornalista TS joaquim dehan, “Ha'u agradese ba média ajuda fó sai ida ne’e tanba ita hatene kompañia 21 ho orsamentu pelumenus 17 millaun ida ne'e introspesaun tanba saa osan boot transparénsia la iha,” dehan Joaquim bainhira haree tiha dokumentu s refere.”
Hanesan dokumentu s ne'ebé jornál ne'e konsege asesu iha SEEAU nia gabeta hatudu katak iha fulan Outubru loron 19 tinan 2009, Arch. Januário da Costa Pereira, Sekretáriu Estadu ba Eletrisidade, bee no Urbanizasaun, Vice Ministru infraestrutura, José Manuel Castela Viegas Carrascalão ho Prezidente AECCOP Sr. Júlio Alfaro foo bensan ba surat tahan ida hodi foo projetu ba kompañia 21 ho totál orsamentu hamutuk US$16,693,515,92 maibé Sekretáriu Estadu Eletrisidade Arch. Januário nega mata-matak katak projetu sira ne'e la tama kategoria pakote Referendu maibé estabelese tuir prosesu no regra normál. Jornál ne'e mós halo esforsu ona durante semana 2 la konsege hetan resposta husi Presidente AECCOP ho vice Ministru Infraestrutura.
Iha parte seluk bainhira jornál ne'e konfirma ho parte aprovizionamentu sentrál diretór Francisco Burlako Soares dehan nia rasik, “dés koñesidu” ho tender ne'ebé SEEAU dale.
Nune'e duni deputadu bankada Fretilín Joaquim Amaral membru komisaun infraestrutura hateten “se la'ós pakote referendu no pokuramen la hatene entaun ne'e pakote siluman.”
Tuir dokumentu ne'ebé jornál ne'e deskobre iha gabinete Sekretária do Estadu eletrisidade iha duni surat tahan ida lista Pakote Referendu ne'ebé foo manan ba kompañia 21 inklui kompañia Alvorada Limitada hetan sorte bain ba projetu valór US$4,669,223.68 hodi halo instalasaun lina eletrisidade entre Laga, Baguia ho Afaloi-kai. Bainhira jornál ne'e tenta konfirma ho Diretora Alvorada Limitada, Sra. Maibé jornál ne'e mós hetan dokumentu s konfedensial seluk husi SERAU husi departamentu DPU hatudu totál orsamentu ba projetu refere US$3,196,394.85. Iha diferensa entre kalkulasaun parte Tekniku planeamentu ho montante ne'ebé mosu iha lista Pakote Referendu ne'ebé asina mós husi Sr. Júlio Álvaro. Emprezáriu balun alega katak kompañia Alvorada ne'e ninia na'in mak Presidente AECCOP maibé sra. Josefa nega.
Josefa Henrique da Silva dehan kona ba lala'ok projetu ne'e nia hataan katak, “ha'u ladún hatene,” no husu TS atu ko'alia ho sira nia enjeñeiru Camacho. Bainhira jornál ne'e husu karik projetu ne'e inklui iha pakote Referendu ka lae Sra. Josefa ho fiar an dale,”la'ós la'ós, la'ós. Ne'e la'ós pakote Referendu ida.” Maibé Jornalista TS informa hikas ba Sra. Josefa katak ninia kompañia mak okupa iha númeru ultimu no hetan projetu ne'ebé valór boot liu projetu sira seluk. Diretora ne'e nonook kleur kuaze segundu 8 hodi gasta lerek pulsa Jornalista Tempo Semanal ninian. Maibé hakarak atu hetan lian fuan ruma karik Sra. Josefa la kompriende Pergunta s entaun jornalista ne'e mós sani hikas fali Pergunta maibé hetok lian laek liu tan nune'e husi sorin rona maka dada iis kahur ho lian mmmm...husi Sra. Josefa durante segundu sanulu resin haat. Jornalista ne'e halo..halo..dala rua Sra Josefa mós hataan hela dehan, “ya ha'u rona.”tuir mai rona maka manu koko roek. I Sra. Josefa husu Jornalista TS atu hakotu lai ligasaun telemovel hodi dehan, Ita bele taka lai?, ita bele taka lai,” depois dona Josefa taka telefone ho urjente de'it.. Bainhira koko telefone hikas ba númeru hanesan Sra. Josefa kala sibuk ka lakohi ona simu telefone husi jornalista TS ninian.
Hataan ba Sra. Josefa da Silva ninia deklarasaun ne'e, diretór Ministériu Finansas, Francisco burlako hateten katak nia nunka hatene tender refere. “Ha'u la hatene, ha'u la hatene. Ha'u dés koñese prosesu ne'e. O que que ha'u hatene muito bein parese ke tama pakote referendu,” rejeita Burlako. Diretór ne'ebé sempre hetan alegasaun barak ne'e esplika katak projetu ho valór US$ 4,669,223.68 ne'e tenke tuir tender maibé karik liu husi single source nia la hatene. “Se la'ós pakote referendu entaun tenke iha kontratu biasa. Ne'e nia (Sekretáriu Estadu Sr. Januário) tenke hatene atravesa husi ne'ebé?, tenke tender loos ka lae?” kestiona Francisco.
Aprovizionamentu sentrál presiza esplika tan ba totál orsamentu ba instalasaun lina eletrisidade hamutuk US$16,693,515,92 no Sekretáriu Estadu Januário argumenta la'ós tama iha pakote referendu entaun presiza tender maibé Burlako dehan durante ne'e la iha tenderizasaun ba projetu lina eletrisidade durante tinan 2009 nia laran. “Kuandu sira dehan dada fiu sira ne'e tender iha ne'e ha'u bele dehan katak ha'u la hatene,” reforsa Francisco.
Francisco foo hanoin fali katak iha momentu ruma sira mós diskute ona atu hatama projetu eletrisidade iha Pakote referendu maibé tuir Francisco katak, “iha sinál balun katak ida ne'e la tama pakote referendu tan ba orsamentu taka ona. Hotu ona.”
Komenta lista ne'ebé asina mós husi Sr. Júlio Álvaro iha loron 19/10/2009 Francisco ho lian hamnasa dehan, “Ne'e Kerdizér ke pakote Referendu. Enatun tama iha pakote referendu. Se presidente AECCOP mak asina ne'e tama iha pakote referendu. Prontu ne'e pakote referendu. Tama pakote referendu.”
Husu kona ba prosesu tender ne'e karik bele halo iha aprovizionamentu desentralizada diretór ne'e dehan, “se iha 2009 sira (SEEAU) rasik maka, tenke ser ne'e labele.” nia esplika katak iha 2009 seidauk halo mudansa ba lei tomak. Iha 2009 Sekretária Estadu Eletrisidade bele halo tender mesak ho valór US$250,000.00 mai karik. “Kuandu liu ona US$250,000.00 ba leten ne'e seidauk. A nau seer tama iha pakote referendu, ne'e kestaun seluk. Mais de tender hotu-hotu tenke iha finansas.”
diretór Francisco esplika katak iha tinan 2010 maka sei halo mudansa ba prosesu tender nian. Maibé prosesu ne'e bele legál kuandu tama iha kategoria kazu estraordináriu maibé tuir Francisco dale, “iha 2009 kazu sira ne'ebé tama iha kazu estraordináriu mós ha'u tenke hatene.”
kompañia Fantija Eletrical Unip Lda, ne'ebe hetan projetu instalasaun foun ba MV no LV, lina distribuisaun eletrisidade iha área kairi-Venilale, Uma Ana Ulu ho berkoli iha sub distritu Venilale daudaun ne'e la'o hela. Konstrusaun ba lina eletrisidade ne'e rasik ladún di'ak tan ba fiu tahan besi riin eletrisidade kesi fali ba nu'u no hali no besi riin balun halis hela.
Jornál ne'e tenta kontaktu ba diretór Fantija Eletrical Unip. Lda hodi husu kona ba instalasaun lina eletrisidade ne'ebé maka kompañia ne'e hala'o daudaun no diretór ne'e hataan, “bele, bele,” maibé kuandu husu kona ba tempu no kompañia hira maka partisipa iha tender ba projetu ne'ebá, diretór ne'e hatudu lian nakdedar uitoan hodi dehan, “hmmm....(kala hanoin razaun)... ha'u iha dalan hela, ne'ebé ha'u lahatene. ha'u nia dokumentu s iha kantor hotu hela irmaun,” dehan diretór Fantija Electrical Unip.Lda, Carlito X. de O.M. Araújo via telemovel ba jornál ne'e. Nia hateten, “hmmm...fulan..hein lai eehhh..tiga bulan sebelum desember sa ida eeehhh...? eeehhh fulan Outubru ida. Sekitar ida ne'e.”
Jornalista TS husu karik projetu ne'e tama iha pakote referendu maibé ho lian kotu kotu Sr. Carlito dehan, “la tama, la tama Sr. Bainhira TS mensiona katak jornál ne'e iha ona asesu ba lista pakote referendu ne'ebé Sr. Carlito ninia kompañia okupa númeru ualu husi kompañia 21 hala'o PPR nia tenta esplika,”ha'u hanoin ninia sistema primeiru la'ós pakote. Pakote ne'e sai ikus. Depois maka bee, kala la'o ne'e maka sira hatama orsamentu ba iha ne'ebá, ha'u lahatene. Mais ha'u nia projetu nia prosesu la'o ne'ene depois hetan.
Númeru ne'ebé aponta iha lista PPR ne'e de'it la konsistente tan ba númeru ne'e ema ne'ebé naran iha lista barak uza fali númeru seluk.
Bainhira husu katak parte aprovizionamentu la iha konsentimentu ba tender projetu ne'e Sr. Carlito argumenta katak, “Ha'u nia dokumentu hatama iha ne'ebá. Maibé ho lalais diretór dehan, “depois ha'u haree tiha lai dokumentu s ha'u lori ba ita ko'alia ne'e ka? Ha'u nia esplikasaun ladún di'ak tan ba ha'u la'o hela iha karreta laran.” momentu ne'ebá nia promete atu lori dokumentu hatudu ba TS maibé too notísia ne'e foo sai jornál ne'e seidauk konsege haree dokumentu refere.
Jornál ne'e mós tenta konfirma ho cornel Unip. Lda ninia númeru telemovel ne'ebé hakerek iha lista pakote referendun maibé sra ida maka foti hodi dehan Sr. Rogeiro M. M. Viegas seidauk tama servisu fatin. Entaun Sra. Ne'e foo fali númeru telemovel ida ba jornalista tempo Semanal maibé hataan netik iha Sr. Rogeiro nia fatin lian feto TT ida hodi dehan, “ telemovel esta disligadu ou fora de área kobertura.”
TS halo esforsu liga hikas ba Sra. Maria M. dos S.Lima ne'ebé ninia kompañia nia naran X-Ray, Co.Lda ne'ebé simu husi ema mane ida konfirma duni kompañia ne'e Sra ninian duni maka kaer instalasaun lina eletrisidade ba área calvacha ho Laiki iha distritu Lospalos. Bainhira hala'o hela projetu ne'e too klaran kompañia mós troka tiha naran. “Hodi bainhira ne'e kompañia X-Ray mak tuir tender maibé troka tiha, troka kompañia nia naran ba fajatei maibé diretora nafatin dona Maria.
Iha momentu ruma liu tiha TS mós telefone ba númeru telemovel dona Maria Sau husi kompañia Aquarius, Lda. Jornalista ne'e komprimenta no husu atu ko'alia. “Halo bondia, ha'u bele ko'alia ho Sra. Maria sau a? Husi númeru dona Maria Sau hataan, Sim..sim bele, ko'alia ba,” lia hataan ne'e la'ós feto ida mane. Nune'e jornalista ne'e konfunde ho husu tan fali, “karik ida ne'e dona Maria ka la'ós? Sim..sim bele ko'alia.”
Entaun Jornalista ne'e hahú kompriende katak ema ne'ebé hataan ne'e la'ós dona Maria Sau maibé hakarak hatene loloos entaun jornalista husu, “Dona Maria sau karik ita boot ninia kompañia maka Aquarius ne'e ka? Mana Maria Sau ho lian mane ne'e dehan, “Sim..sim. Too ikus jornál ne'e deskobre katak lian ne'e mai husi Sr. César Moreira. Moreira mós nega katak projetu refere tama iha pakote referendu maibé hanesan investimentu ida husi kompañia uluk hafoin maka estadu selu hikas sira nia osan.
Iha parte seluk Sr. Manuel T.C. De Jesus husi kompañia Lunarsol Unipesoal, Lda rekoñese projetu ne'e hahú iha fulan Oetobru no ida ne'e, “tama iha pakote Referendu.
Maibé Koordenadór pakote referendu distritu Dili, Aleixo Cobra dehan katak lahatene buat ruma kona instalasaun lina eletrisidade tama pakote referendu maiske sira rona lia anin tama iha pakote referendu no hare lina eletrisidade instala daudaun iha parte balun iha distritu kapitál nasaun ne'e. “Ami la iha koñesimentu kona ba ida ne'e, orsamentu hira mós ami la iha koñesimentu. Maiske ami rona informasaun katak ida ne'e tama pakote referendu. Mas pakote referendu la too ba ami hanesan koordenadór Dili, sira la foo koñesimentu ba ami ate agora. So ami hatene katak Sekretáriu estadu ho presidente AECCOP, sira rua mesak, deside mesak i nia maka asina mesak.”
“Ami husu ba Sekretáriu estadu ne'e beibeik ona maibé sempre menghindar husi ami. Mas dehan tama iha pakote referendu mas projetu ne'e seidauk iha. Maibé ate agora ema servisu tan tiha ona. Ne'ebé ha'u hateten katak ami la iha koñesimentu ba ida ne'e i ami rona katak ne'e pakote mas la foo koñesimentu ba ami. So natoon de'it iha Sr. Júlio ho Sekretáriu estadu. Ami ezije buat ne'e atu tama pakote referendu mas la hare. Kala tama duni pakote referendu mas projetu la iha nune'e ami la hare,” dehan Aleixo ho doko ulun ba karuk no loos.
Aleixo kondena maka'as lala'ok Sekretáriu Estadu ho Presidente AECCOP ne'ebé kontraria ho lia menon Primeiru Ministru ninian ne'ebé hateten katak Pakote Referendu ne'e dezeña atu foo de'it ba kompañia Timor oan sira nian hodi fortifika sira nia kapasidade maibé iha realidade kompañia Dili Machineries, Unipesoal, Lda ne'ebé na'in husi ema sidadaun indonézia mós hetan PPR iha área Oekuse, Suai ho Mehara ho totál Orsamentu US$1,759,207.21. “Iha Dili kolega bapa oan wijaya mak manan mas Sr. Júlio Álvaro mak foo, la'ós ami mak foo. Nune'e ami nia área ne'e Sr. Júlio mak okupa hotu hodi foo projetu eletrisidade ba sira no ami la hatene buat ida,” alega Aleixo.
Dala ida tan Cobra esplika, “Ami la iha koñesimentu nu sentidu katak projetu ne'e sira fahe tiha hotu ona mak ami rona. Ami la asina dokumentu s ruma i kompañia balun manan ne'e tenta husu ami atu asina mas ami dehan pakote ne'e la'ós ami nian, ami la hatene buat ida no la iha lista nune'e ami lahatene buat ida.”
Nune'e deputadu Joaquim haktuir katak durante debate orsamentu do estadu 2010 iha plenáriu, nia husu diretamente ba Primeiru Ministru kona ba projetu pakote referendu iha eletrisidade.
Prosesu pakote Referendu iha governasaun ne'ebé organizadu no rasionál ne'e la 'maksud akal' mais prontu buat ne’e kala la'o ona ita presiza ninia transparénsia ba públiku, hanesan parte ida kultura estadu hodi kombate korrupsaun. Sein iha kultura transparénsia kombate korrupsaun bele hanesan retórika de'it,” dehan Joaquim.
Iha mós akuzasaun katak iha kontaktu entre emboot ruma ho emprezáriu balun hodi ko'alia kona ba projetu lina eletrisidade no funsionáriu kontratu tékniku iha SEEAU mós haknaar an iha kompañia privadu balun ne'ebé daudaun ne'e kaer hela instalasaun lina eletrisidade ne'e.
Nia mós apela ba vice PM ba asuntus administrasaun ho boa Governasaun atu halo investigasaun ba naksalak hirak ne'e no hein katak bainhira KAK prontu ona kee klean liu tan. “Ha'u hanoin informasaun ne’e vice primeiru ministru asuntu administrasaun bele toma atensaun ba ida ne’e tanba asuntu interesante, kna'ar ne’e mak atu halo liu liu iha prokuramen sentrál. Nia sentraliza ministeriál sira ho orsamentu 'terbatas' mais kazu eletrisidade ne’e prokuramen sentrál deskoñesidu no iha ministériu sira ne'ebé la kapasidade bele halo tender ba projetu boot entaun ne’e hanesan dezafiu ida ba vice primeiru ministru asuntu administrasaun atu bele buka hatene tanba nia iha instrumentu inspetór Jerál no agora pur ezemplu KAK foin hari ha'u hanoin hanesan PR (pekerjaan Rumah) ida ba KAk mais saida mak urjente servisu atuál ne’e vice primeiru ministru atu nune'e bele ajuda selae sira dun malu ba mai de'it.”
No comments:
Post a Comment