Lasama Triste TL Sai Nasaun Asesor Nian Maibe Governu Mantein ho Rekrutamentu Asesor Internasional

Tempo Semanal-Dili, 21.01.2011

Prezidenti Parlamentu Nasional lamenta ho Orsamentu ne'ebe boot hodi selu vensimentu ba asesor internasional sira maibe nia rekomenda atu buka muda ba asesor Timor oan rasik. Iha diskusaun orsamentu Jeral do estadu ba tinan 2011 nota katak iha kuaze besik departamentu hotu-hotu aloka orsamentu ba foo servisu ba asesoria sira.

"Ita sei presiza duni asesor internasionais maibe ita mos husu ba instituisaun estadu nian hotu-hotu atu ita konsidera buat ida katak ita la'os kontratu mala'e sira mai, atu servisu mesak sein konsiderasaun atu husik hela sira nia matenek mai ita atu para dez anus ita labele dependente nafatin ba asesores internasionais. Mas liu husi sira mai foo asesoria ita nia timor oan sira mos apreende ke aban bain rua tinan sira ba oin ita kala sei presiza sira mas labele barak hanesan agora," dehan Fernando de Araujo.

Lei Timor Leste ninian barak liu maka hakerek ho lian portuges maiske maioria povu rai ida ne'e la iha formasaun iha lian refere. Nune'e duni Primeiru Ministru Kay Rala Xanana Gusmao defende katak relasiona ho asuntu ne'e maka Timor Leste sei presiza nafatin apoiu asesor internasional.

"Area juridiku ita seidauk iha kbiit kompreende. Kuandu ninia espesialidade ne'e maka juridiksaun leis ne'e nia hanoin ba hetan lalais. Se la'e ita ba buka-buka," dehan Xanana.

Primeiru Ministru mos informa katak iha instituisaun Governu ninian balun hahu uza ona matenek nain Timor oan balun. "Hanesan iha Ministeiru Finansas ita halo daudauk ona Timor oan sira. Iha Konsellu Ministru mos iha ona Timor oan balun. Balun iha raea direitu. Ita la'o neiniek. Labele depende de'it no labele korta kedas. Labele depende dehan katak tenke iha estratejia ida. Mediu prazu. Labele korta de'it. Ita la'o neineik. La'o neineik ita troka ho ita nian," Argumenta PM Xanana.

Timor oan sira ne'ebe uluk sai hanesan asesor internasional iha Ministeiru Finansas ne'e mos barak liu maka uza passaporta estranjeiru. Maibe PM ninia lia fuan ne'e kontraria ho faktu balun ne'ebe mosu iha terenu tan ba Timor oan balun hetan tiha bolsu de estudu husi funduz Estadus Unidus da Amerika, Australia no nasaun seluk inklui bolsu ne'e mai husi orsamentu povu ninia Governu la uza nune'e sira ba fali servisu iha inglatera no norte Irlandia.

Maibe tinan ne'e Governu tau tan juta $25 ba funduz hodi dezenvolvimentu rekursu Umanus ninian atu foo bolsu estudus ba Timor oan sira nune'e aijuda hamenus argumentu husi Internasional sira dehan nasaun ne'e sei hasoru krixe de kapasidade umanu hodi foo nafatin benefisiu ba sira nia konta bankaria.(TS)