Muda Sai Bee Foer Sintina Atu Prevene Koral Dala Ruma Sei Ataka Fali Povu Tibar

Tempo Semanal-Dili 31.01.2011

Prezidenti da republika iha lorkarik tuku 15.00 OTL akompania husi Ministru Ekonomia Dezenvolvimentu, Sekretariu do Estadu Meiu Ambiente, Vice Ministru Infra Estrutura, Sekretariu do Estadu Eletrisidade halo vizita ida ba fatin soer foer sintina ninian iha tasitolu besik fatin atu harii hotel Pelikan Paradise ba.

Tanke foer sintina no foer seluk naresin tiha daudaun tanke dalan balun nota sulin tama ba tasi iha area ne'eba. Tuir ema balun katak iha area tasi tolu ne'e iha koral barak ne'e uniku no koral sira ne'e hetaan ameasa maka'as husi bee foer ne'e.
"Ha'u preokupasaun tan ba bee foer fakara daudaun ona ba tasi laran. Ha'u liu husi ne'eba dala barak kada vez pior liu tan-pior liu tan. I derepente maka tanke ne'eba nakfera beneno hotu-hotu tama iha tasi laran, oho koral sira ne'e hotu, oho ikan," dehan Horta.

Tuir Horta maske la'os nia maka ukun iha Governu maibe NGO internasional sira, Naosens Unidas sira litik nia beibeik kona ba buat ne'e. "Prezidenti ita ko'alia kona ba meu ambiente ami ami haree situasaun ne'e grave tebe-tebes ke ita boot la tau matan," hasaran Horta.

Prezidenti mos halo kritika hasoru UNTAET ne'ebe foti desizaun tau fali tanke bee foer nia iha besik dalan ne'ebe sempre tamu ema ne'ebe liu ho kareta iha area ne'eba. "Uluk Untaet nia tempu maka tau iha ne'eba. Ha'u la hatene tan ba sa maka ema ruma ke kakutak iha, bele hola desizaun, tau fali tanke ne'e iha ne'eba," lamenta Horta.

Nia Realsa katak la'os Governu Timor ninia pekado maibe, "kulpa ne'e mai husi Interfet ho UNTAET maka tau iha ne'eba. Nune'e tempu ona ita muda. Devia muda kleur tiha ona."

Daudaun ne'e governu kee fali ona posu ne'e iha besik fatin lisu iha tibar maibe Prezidenti mos lamenta fali tan ho kualidade husi kompania Timorense ida ninia servisu. "Konforme tekniku sira ninia esplika. Infra Estrutura maka foo definisaun ba sira atu halo mahar oin sa," kestiona Horta.

Prezidenti Horta ladun kontente ho servisu meu ambiente ho infra estrutura ninia tekniku sira nia servisu hodi foo medidas ne'e ba kompania.
"Ha'u preokupadu, ha'u la hatene oin sa maka meiu ambiente ho infra estrutura foo karakterestika ne'e ba sira (kompania). Didi lolon mahar de'it mos ladun. Latoo 30 centimetrus."

Fatin foun ne'ebe agora harii iha Tibar ne'e mos bele foo berigu liu fali ba moris populasaun iha area Tibar nune'e duni Prezidenti Horta dehan katak, "Ne'e la iha kualidade. Kuandu udan boot mai halo rai dodok depois tanke ne'e nakfera. Depois Populasaun iha ne'e oin sa?"

Tuir Prezidenti katak Semente ne'ebe kompania ne'e nahe iha rai ninia mahar ladun sufisiente tan ba pizina de'it mos ninia mahar liu 10 centimetru satan foer sintina ne'ebe todan. (TS)