Foo Aan Ba Nasaun Barak Nia Kontente Familias Sei Terus: Familia Saudozu Konis Hasoru TMR

Tempo Semanal-Dili, 18/09/2012

Saudozu Konis moris hiha Tutuala-Lospalos no Mertutu-Ermera mak hakiak no habo'ot. Husi ninia abrigu husi posu sintina ninia eis el komandante Nino Konis Santana liu husi Satelito ko'alia ho ulun bo'ot sira iha rai liur inklui eis Presidenti Portugal ho eis representante CNRM iha tasi sorin DR. Ramos Horta.

Iha dadersan (18/09) tuku sia liu minutu tolu, Familias Saudozu Nino Konis Santana ninian ba hasoru malu ho Presidenti RDTL Taur Matan Ruak hodi informa importancia atu lori restu mortais eis Xefe do Konselho CNRM, eis Sekretariu CEL/FA no Sekretariu CDF, Nino Konis Satana ba vizita ninia uma moris fatin iha Tutuala, Lospalos atu halo tuir lisan.

Familias husi Saudozu Konis ninian ba hasoru Presidenti atu husu lori restu mortais Saodozu ninian ba vizita ninia knua no familias tomak iha Tutuala hodi halo tuir lisan Timor ninian depois maka entrega hikas ba Estadu.



Familias husi Saudozu Konis ninian ne'e kompostu husi ema nain walu ho familias ninia lian Sr. Julio, alin ikun husi saodozu Konis Izalde mak, ba hasoru Taur Matan Ruak ne'ebe uluk belun servisu servisu hamutuk Saodozu Nino Konis Santana ho ninia alin saudozu Victor.  Iha era tinan rihun ida atus sia hitu nolu resin nia laran antes de invazaun husi Indonesia Taur matan ruak ho ninia belun nain rua ne'e servisu hamutuk iha Hotel Pousada Baukau.

Iha parte seluk estudante sekundariu ida ne'ebe dehan nia nungka kuinese no rona saudozu konis ninia oin ho lian ne'e dehan katak Konis hanesan herois nasaun Timor Leste no merese hotu-hotu ninia respeitu no admirasaun. "Ha'u nungka ka'er liman ho komandante ne'e no nungka rona ninia lian. Maibe naran ha'u sempre rona no ninia letratu ho video dala ruma hau haree no hau respeitu tebes ba saudozu Konis tan sira nia luta maka ohin Timor Ukun Rasik An," dehan Zelia da C. A. costa estudante husi ensino sekundariu ida iha bekora.

Nino Konis Santana foo ninia vida tomak luta libertasaun nasional. Durante Funu Konis la'o barak liu iha parte cruzeiu ate ba too rejiaun hat no ikus mai hakotu iis ikus moris nian iha ninia subar fatin, Mertutu Ermera iha Marco 1998.

Saudozu Konis ninia inak Poco Tana ne'ebe idade tebes ona sei moris no hela iha Tutuala hamutuk ho ninia oan feto boot rua no oan mane ida hamutuk ho familias husi Fetosan no uma ne'e sei espera nafatin restu mortais saudozu ne'e ninian. Saodozu Konis ninia alin feto ida ho ninia oan sira sei iha Indonesia maibe mai ona vizita mos rate Saodozu ninian iha Mertutu tinan ruma kotuk.

Iha Funu komandante no soldadu didiak maka mate no lakon. Foin Lalais ne'e rate ne'ebe deskonfia Saudozu Mahodu ninian iha batugade hahu kee ona no restu mortais lori ona mai Dili atu buka hatene. Daudaun ne'e restu mortais barak maka seidauk rekolha hotu maske veternaus sei moris barak maka estadu hahu valorisa ona maibe kuitadu ba sira ne'ebe mate no lakon seidauk hetan atensaun maximu husi Estadu ho povu. Iha 2003 maka F-FDTL halo esforsu ruma hodi rekolha ona restu mortais husi parte balun ne'ebe dauaun ne'e tau hela iha jardin dos herois iha Metinaro maibe depois Governu dehan servisu refere kompetencia Governu ninian. Nune'e dezde momentu ne'eba ate agora prosesu rekolha restu Mortais ne'e sai iniciativa Familias ninian tan ba kestaun Lisan.