Celebra Centenariu Revolta Manufahi TL Nahe Biti Bo'ot Simu Malu

Tempo Semanal - Same, 24/11/2012

Daudaun ne’e (24/11) iha distritu Same hala'o hela ceremonia tradisional tuir lisan Timor ninian, iha Aldeia Luak hanesan moris fatin Dom Boa Ventura de soto Maijor, ne’ebe tuir vice Primeiru Ministru Fernando Lasama de Araujo hanaran heroi nasaun ne’e, hola parte husi lia nain husi lisan lulik distritu sanolu resin tolu iha Timor Leste. Ceremonia ne’e ninia objetivu hodi kasu todan husi naksalak sira ne’ebe husik hela husi bee ala sira wainhira revolta manufahi mosu. Vice Primeiru Ministru hodi estadu ho Governu ninia naran halo apellu ba juventude sira atu banati tuir espiritu ne’ebe husik hela husi heroi nasaun ninian.

“Ita hein ho ceremonia nahe biti boot ne’e bele foo matak malirin ita nia jerasaun fouyn hodi nune’e ita hotu hamutuk atu hala’o desenvolvimentu,” dehan Vice Primeiru Ministru Lasama.

Lasama dehan Dom Boa ventura ninia luta iha 1912 sai hanesan mata dalan ba funu libertasaun iha 1974. “Se la iha revolta Dom Boa Ventura ninian iha 2012 dala ruma mos la iha funu libertasaun 1975,” nia haktuir.

Iha ninia deskursu Vice Primeiru Ministru V Governu Konstitusional elojia herois da partria hodi foo onra ba sira ne’e husik hela sira nia moris hodi sosa liberdade ba nasaun no povu Timor Leste.

 “Ita ne’ebe moris hela ne’e deve ba sira ne’ebe mate ona on aba nasaun ne’e nune’e todan sira ne’ebe hodi seik ita kasu tuir mota no bee lulik tolu lori ona ba tasi,” dehan Lasama.

Hanesan istoriador balun haktuir katak wainhira Dom Boa Ventura halo revolta hasoru kolonial sira, iha mos Timor oan balun ne’ebe mobiliza hodi ba kontra lisuk Dom Boa Ventura.

Iha ceremonia refere lia nain lulik sira oho manu aman rua ne’ebe buti mate de’it hodi buka hatene sinais ne’ebe iha. Maun aman mean bo’ot mate ho ain sorin loos tula fali ba ain karuk no maun naton mate ho ain rua lolon loos. Hafoin manu rua ne’e mate tiha hotu lia nain lulik husi Same mos lori fahe mutin rua ba oho besik aidak ne’ebe halulik ona nia hun hodi buka tuir matak malirin.

Tinan ne’e ceremonia centinariu ba revolta Manufahi ne’ebe hala’o hamutuk ho aniversari deklarasaun unilateral independencia Timor Leste ne’ebe monu iha loron 28 fulan Novembru. Celebrasaun ne’e rasik gasta osan hamutuk milaun rua Dollar Amerikanu.

Iha loron 20/11/2012 sei iha ceremonia ensar bandeira nasional no ceremonia inaugural statua Dom Boa ventura ne’ebe sei hala’o husi Presidenti da Republika Taur Matan Ruak ne’ebe mos eleje ba Presidenti RDTL iha 2012.

Dom Boa Ventura ne’ebe oan husi Dom Duarte halo revolta hasoru Portuges tan ba lakohi Timor oan selu empostu ba malae portuges maibe nia selu ho ninia vida iha fin tinan 1912.