Droga Perigu Ba Futuru Jerasaun, Leovegildo Husu Jovens Hadok An

Tempo Semanal - Dili, 13/11/2012

Fraku Iha Kontrolu Atividade Droga Livre Tama Timor-Leste, Presidente Juventude Husu Jovens Labele Konsumi Ai-moruk Droga

Iha imajen ne'e hatudu Droga ho ekipamentus
 seluk uza hodi konsumsi droga husi ema
timor Oan ida ne'ebe kaptura husi autoridade
maibe tan ba deskonfia intervensaun husi
 ema balun nune'e Timor oan ne'e
 hetan de'it termus de rezidencia.

ATIVIDADE drogas ne’ebé deskonfia da’et ona ba eskola balun iha kapital nasaun Timor-Leste sei fó ameasa boot ba futuru jerasaun Timor Leste nian. Tan ne’e, husu ba orgaun kompotente sira tenke hala’o kontrolasaun masimu ba ema estranzeiru sira ne’ebé tama sai Timor-Leste.

Klaru katak, atividade ne’e sei fó ameasa ba povu Timor-Leste, liu-liu ba juventude sira. Ne’e duni, Konsellu Nasional Juventude Timor-Leste (KNJTL) sei kria planu ida hodi tama sai iha diskoteka sira no eskola hotu-hotu hodi taka brosur kona ba ai-moruk droga, atu nune’e bele antisipa jovens sira labele produs ai-moruk hirak ne’e tanba sei fó impaktu ba sira nia vida moris loro-loron nian.

Hatan ba kestaun ne’e, Presidente  KNJTL Levogildo Hornay hateten, tuir planu iha tinan 2013 sira sei haleu eskola no diskoteka ou bar iha Timor tomak atu fahe informasaun no brosur kona ba Ai-moruk droga ne`ebe mak hahu tama ona iha nasaun Timor-Leste.

“Ami presiza fahe infromasaun ba ita nia povu, liu-liu ba ita nia alin estudante sira, hodi nune’e bele halo prevensaun atu sira labele konsumu ou uza ai-moruk hirak ne’e. Tanba, bele ameasa sira nia vida no sei halo sira nia morál la di’ak. Tanba, fasil halo ita bele hanoin at.” Dehan Levogildo Hornay ba Tempo Semanal iha Suku Maina II foin lalais.

Lider juventude ne’e rekoinse katak, to’o agora ita nia lina frontera, aeroportu , no portu dili ninia sistema  kontrolasaun hodi detekta ai-moruk droga sei fraku ne’e duni fasil atu ema tama sai hodi lori ai-moruk droga iha Timor-Leste hafoin halo transferensia ba iha Nasaun vizinu no halo bisnis iha rai laran tanba ai-moruk droga ho nia folin bo`ot.

Presidente juventude mós husu ba guvernu hodi kria politika ida atu hadia sistema iha aereporto no portu dili no tenke garantia material hodi bele deteta sasan illegal sira ne’ebe ema lori tama sai iha nasaun ida ne’e. Tanba, labele husik Timor-Leste sai odomatan ba ema estranzeiru sira atu hala’o transasaun droga iha ita nia rai laran.

Ha’u hanoin atividade drogas ne’e la di’ak no ita nia lei la fó dalan atu hala’o ida ne’e. Ne’e duni, se karik ita parte seguransa sira mak hetan ema estranzeiru ruma mak hala’o atividade ida ne’e tenke kaptura hodi prosesa tuir lei. Nune’e mós, se Timor oan tuma mak envolve iha atividade ida ne’e tenke hatama ba kadeira no tenke fó pena ne’ebé todan tanba ema hanesan ne’e hakarak estraga nasaun nia future.

Nerito jovens ida husi Suku Maina II hateten, atividade fa’an ai-moruk droga ne’e la di’ak no illegal. Tanba, aliened kontra lei atividade ne’e hanesan ne’e kontra mós kultura Timor nian. Ne’e duni, husu ba maluk foinsa’e tomak ne’ebé namkari iha rai doben Timor-Leste labele atu koko uza ou konsumi ai-moruk ai-moruk droga.

Nu’udar sidadaun Timor jovens Suku Maina II prontu serbisu hamutuk ho parte hotu, liu-liu parte seguransa sira atu bele informa kualker atividade illegal ne’ebé sei mosu iha ami nia Distritu no Suku. Ha’u iha esperansa katak ha’u nia maluk jovens sira sei hakribi no sei la uza ai-moruk dgroga hirak ne’e. (**)