SEPFOPE Kontinua Buka Dalan Ba Joven Tuir Formasaun

Tempo Semanal - Dili, 10/11/2012

“Haruka Juventude sai ba Rai Li'ur Bazeia Ba Merkadu Ne’ebé Husu Liu Husi Formasaun”

SEKRETARIU-Estadu Polítika Formasaun Profisionál Empregu (SEPFOPE) Elidio Ximenes da Costa halo enkontru ho Embaixadór Cina ko'alia kona ba fó formasaun ba juventude Timor-Leste ( TL)

Ne’e hanesan pasu ida ne'ebé SEPFOPE atu bele loke oportunidade ba joven foin sai sira bele hasai liu tan koñesimentu kona ba área Turizmu no mekániku.

“Haruka juventude sira sai bazeia ba merkadu ne’ebé husu liu husi formasaun. Ita bele fó, maibé bazeia ba realidade ne’ebé mak iha. Bainhira sira ba mai fali tenke servisu iha área ne’ebé sira tuir kursu” dehan SEPFOP Elidio ba jornalista sira loron tersa-feira (6/11) iha kaikoli Dili.

Elidio hatutan, iha enkontru ne’e, sira ko'alia mós kona ba Agrikultura no Hortikultura. Tanba, Cina presiza Sasan ne’ebé mak atu halo esportasaun ba Cina hanesan ai manas ai leten no ai lia.

Ne’e duni, presiza ba hare iha sira nia rai no halo estudu oinsá mak kuda. Agora daudauk husi parte SEPFOPE sei servisu hamutuk ho Ministériu Agrikultura hodi hare potensiál saida mak bele produs ai manas ai leten no ai lia Cina bele sosa.

Entaun, presiza rai no ema. Ne’e duni, SEPFOPE sei  haruka joven sira sai ba li'ur hodi aprende buat ruma. Bainhira fila hikas mai halo servisu iha baze hodi bele responde nesesidade merkadu ninian.

Tanba ne’e, SEPFOPE sei prepara proposta ba iha Ministériu refere atu haruka joven sira sai hodi tuir formasaun. Kada área ida-idak ema na'in rua nulu (20) atu nune’e fila mai TL  fatin servisu ba sira iha.

Tuir Cina ninia motorizasaun iha TL katak, infraestrutura hanesan dalan, bee, akomodasaun otel sira ne’e la tuir sira ninia estandar. Ne’e duni, presiza atu hadi'a la’ós SEPFOPE de’it. Maibé, Ministériu Turizmu, Obras Públika no Ministériu sira ne’ebé relevante.

Tanba, setór produtivu ida mak Turizmu, Agrikultura, Peskas no Pekuária. Iha setór hirak ne’e, mak sei redús númeru dezempregu no bele loke kampu servisu. (**)