Tuesday 1 January 2013

Vitima husi Tua Lanu Iha troka Tinan 2012 ba 2013

Tempo Semanal Dili, 01/01/2013

Iha kalan ikus tinan 2012 ninian Cidade Dili festa bo'ot ba troka tinan ninian. Ema rihun wain maka la toba hodi hakotu sira nia kalan ikus tinan 2012 no simu oras dahuluk tinan 2013 iha palaciu do governu ninian oin.

Paixon tiru tarutu husi kiik to'o bo'ot liu halo cidade Dili la deskanca iha kalan ne'e. Iha bairos sira paixon tarutu ema husi idade oioin sai uma tama uma hodi felicita malu.

Labarik kiik oan ho idade tinan sanolu resin luma mai karaik toka muzika danca ketak no jovens sira tuur grupu ho kalen beer no masa jerikan hemu hamutuk.

Tuir observasaun tempo Semanal iha area kuluhun mosu problemas tuda malu no halo mane ida het tah kanek iha ninia tilun hun. "Jovens sira ne'e odiu malu kleur ona entre bidau ho Kuluhun," dehan membru PNTL ida ba tempo semanal.

"Ami seidauk hatene problemas ninia hun ne'ebe sei investiga hela," Membru PNTL ne'ebe husu atu jornal ne'e labele publika ninia naran hatutan.

Iha parte seluk besik area klak fuik mos mosu problemas deskonfia jovens balun hemu lanu no halo auto stop ba motorizadas ne'ebe liu husi liuron bo'ot ne'eba. Tuir informasaun jovens sira ne'e konsege hapara membru F-FDTL ida ne'ebe liu husi fatin ne'eba.

Mezmu la hatais farda maibe membru F-FDTL ne'e lori ho kartaun identidade no konsege hatudu kartaun ba jovens sira ne'e maibe jovens ne'ebe balun hahu lanu ona ne'e koko atu baku nia nafatin entaun nia eskapa aan ba informa fali ba parte PNTL ho Policia Militar ne'ebe halo seguranca besik iha area refere.

Lakleur de'it membru F-FDTL sira seluk ne'ebe deskonfia mai husi PM to'o iha area klak fuik no halo kapturasaun ba jovens ne'ebe alega koko baku membru F-FDTL ida. Akontecimentu ne'e halo joven ida tama ospital.

Kazu hemu lanu tua hodi hamosu problemas ne'e la'os dala uluk. Iha bairo Vila verde foin lalais ne'e mos mosu ema baku membru F-FDTL ida seluk to'o oin kanek hotu.

No comments: