Tuesday 30 November 2010

Programa Bolsu EStudu Husi Governu Australia Ho Nova-Zelandia Tulun Prepara Lideransa Futuru Ba TL

Tempo Semanal-Dili 28.11.2010

Dili, 26 Novembru 2010, Prosesu hodi prepara lideransa Timoroan ba futuru, ne’ebé liu husi programa Bolsu Estudu Australia/Nova-Zelandia ka ADS/NZDS hodi ba estuda iha rai Australia no Nova-Zelandia ba tinan 2011 hahu ona ba primeira etapa ho selesaun aplikantes ne’ebé hala’o dadaun oras ne’e.

Tuir komunikadu de imprensa ne’ebe jornal ne’e simu, AusAID nia counsellor, Sra. Jemal Sharah hateten katak, “ida ne’e hanesan esforsu importante ida ne’ebé Governu Australia oferese hodi reforsa liu tan rekursu humanu Timor-Leste nian ba futuru. Nune’e mos Programa ADS ne’e sai hanesan exemplu diak konaba koperasaun entre doador sira hodi apoiu hadi’a rekursu umanu Timor-Leste nian ne’ebé mos sai prioridade ba Governu Timor-Leste iha nia prosesu dezenvolvimentu nasaun ne’e”.

Lista aplikantes na’in 138 ne’ebé liu ba etapa seguinte sei fosai iha journal lokal hirak iha loron Tersa, 30 Novembru 2010.

“Prosesu selesaun ba tinan 2011 hetan entuziasmu boot husi Timoroan sira ne’ebé iha interese maka’as atu ba kontinua sira nia estudu iha rai Australia no Nova-Zelandia. Programa ADS no NZDS ne’ebé implementa ona durante tinan sanulu, fo duni benefisiu boot ba rekursu umanu Timor-Leste nian hodi produs ona lideransa no futuru lideransa ba rai ida ne’e. Hanesan exemplu ida ADS nia antigus alunus balun mak oras ne’e dadaun kaer knar hanesan Ministru, Vise-Ministra, Secretariu Estadu nomos knar importante seluk iha rai laran,” Ausaid dehan.

Liu husi painél selesaun ba 2011 ne’ebé kompostu husi reprezentante Programa Asistensia Governu Australia, reprezentante Programa Asisténsia Nova-Zelandia, reprezentante NGO Forum, reprezentante Ministériu Edukasaun Timor-Leste, reprezentante Akademiku Internasionál no reprezentante husi ADS Alumni, sira hala’o selesaun ba aplikasaun hirak ne’ebé aplikante sira hatama ona.

“Tuir rezultadu etapa badala uluk, painel selesaun fosai katak aplikantes hamutuk na’in 138 mak konsege liu selesaun ida ne’e hodi hetan konvite atu bele partisipa iha preparasaun ba teste Énglesh ka IELTS Test nian ne’ebé sei hala’o durante loron hat nia laran iha Hotel Timor, hahu husi loron 8 – 11 Dezembru 2010. Teste Énglesh ka IELTS test rasik sei hala’o iha fulan Janeiru 2011. Husi total aplikantes na’in 138 ne’bé liu ona selesaun etapa primeiru ne’e, na’in 18 sei la hola parte iha teste tan sira iha ona sertifikadu IELTS Test ne’ebé sei validu no hetan rezultadu ne’ebé atinji rekerimentu akademiku nian.”

Hafoin remata IELTS Test sei kontinua ho etapa entrevista ba aplikantes sira ne’ebé hetan rezultadu diak iha sira nia teste Énglesh, inklui sira na’in 18 ne’ebé iha ona sertifikadu IELTS Test ne’ebé validu. Entrevista ne’e sei hala’o iha fulan Febreiru 2011.

Hahu tinan 2011, Governu Australia ofisialmente hasa’e tan numeru bolsu estudus husi 20 ba 30. Husi Nova-Zelandia sei oferese bolsu estudus 10. Total bolsu estudus ba tinan 2011 hamutuk 40. Governu Australianu ho Nova Zealandia kada tinan-tinan sempre aijuda foo bolsu estudus ba ema Timor oan sira hodi eskola iha nasaun rua ne’e.

Iha parte seluk IV Governu konstitusional iha orsamentu jeral do Estadu ba tinan 2011, hatur ona rubrika especial ida ho montante millaun 25 dollar Amerikanu hodi halo dezenvolvimentu rekusu umanus ninian. (TS)

No comments: