PARTE III : Servidór Estadu TL Sobu Estadu De Direitu

Estadu TL Hasa’e Empregu Ba Sidadaun Estranjeiru

POLITIKA V Governu Konstitusional atu hatun numeru dezenpregu Timor oan sira ninian maibe iha dala ruma ko’alia ho hahalok bele kontra malu fali. Iha Gabinete inspeksaun de trabalho iha SEFOPE ninia mahon hatudu oin seluk fali. Hanesan iha segunda feira 24/09/2012 fungsionariu balun husi SEFOPE ho naran inicial PC ba vizita Philweb ne’ebe ninia diretora uza vistu Turista hodi servisu iha Timor Leste. Tuir observasaun katak servidor estadu ne’e ba tama kedan ba iha sala de reuniaun hodi ko’alia ho amizade tebes. “Mai sira bolu malu ba iha kuartu konta istoria hamnasa too fila de’it,” dehan fontes TS iha besik gabinete Philweb.

Daudauk ne'e ema estranjeiru barak mak tama mai Timor-Leste hodi buka serbisu. Realidade ida ne'e ita bele hare iha kapitál Dili. Tanba, kuaze serbisu buru kasar to'o nivel Diretór sira envolve hotu.

Maibé, molok sidadaun estranjeiru sira hala'o serbisu iha Timor-Leste, uluk nanain sira tenke submete ba kritériu ne'ebé aplika iha rai laran . Ezemplu, ema estranjeiru ne'ebé mai serbisu tenke hetan vistu trabalhu iha MNE Diresaun Konsulár no tenke hetan pedidu rekomendasaun serbisu nian husi Inspesaun Jerál Trabalhu iha Sekretáriu Estadu Polítika Formasaun Profisionál Empregu (SEPFOPE).

Maski Lei hateten nune'e. Maibé, ema estranjeiru balun sama hela Lei Timor Leste nian ba rai, hodi la kumpre prosesu ne'ebé iha. Pior liu tan servidór estadu balun mak fó apoiu ba sidadaun estranjeiru sira hodi sobu fali dignidade estadu de direitu ida ne'e.

Relasiona ho kazu ne'ebé envolve sidadaun Filipina, Mazy Tayamen no Nathaniel Tayamen oras ne'e daudauk públiku mós kestiona nasionalidade servidór de estadu sira. Tanba, tuir loloos sira mak sai ezemplu di'ak ba povu. Maibé, ikus mai sira kontribui fali ho ema estranjeiru sira hodi halakon osan ba tasa estadu nian.

Hataan ba kestaun ne'e, Diretór Inspesaun Jerál Trabalhu, Aniceto Leto Soro hateten, ema estranjeiru ne'ebé atu mai serbisu iha Timor Leste, tenke hatama aplikasaun pedidu ba MNE Departamentu Konsulár hodi hetan vistu trabailhu. “Sira tenke prenxe kritériu hotu. Ne'e duni, bainhira MNE simu dokumentus ho kritériu ne'ebé kompletu, sira enkaixa fali mai iha ne’e no ba imigrasaun hodi hasai rekomendasaun ba ema ne’e atu hala’o serbisu.” dehan Leto Soro ba Tempo Semanál iha ninia serbisu fatin semana kotuk.

Diretór Inspesaun ne'e hatutan, ema ne'ebé mai ho vistu turista la'ós atu hala’o serbisu serbisu. Maibé, pasiar, hare família tuir tempu ne'ebé determinadu ona 30 di'as ou bele porlonga to’o 90 di'as. Maibé, realidade ema balun mai fali hala'o serbisu. Problema ne’e akontese tanba falta kontrolu husi entidade ne'ebé kompetente atu hala’o kontrola ema estranjeiru sira ne'ebé tama mai ho vistu turista.

Tuir loloos órgaun kompetente tenke kontrola ema estranjeiru ne'ebé mai ho vistu turista. Tenke kontrola tuir sira nia atividade iha Timor Leste. Ne'e duni, se sira hala'o violasaun ba vistu turista tenke prosesa tuir Lei ne'ebé eziste iha ita nia rai.

Tuir Lei imigrasaun Artigu 118 no Artigu 119 katak, ema ne'ebé utiliza sala vistu ou la iha dokumentus legál tenke selu multa depois halo prosesamentu ba deportasaun. Maibé, Tansá..? estadu Timor-Leste la deporta ona sidadaun Filipina na'in rua ho naran, Mazy Tayamen no Nathaniel Tayamen ne'ebé daudauk ne'e viola hela Lei imigrasaun nian.

“Se sira mai ho vistu turista no seidauk rejistu konserteza ami labele hatene. Sira tenke rejistu hodi bele hetan lista de trabalhu. Maibé, se sira seidauk rejistu konserteza sira nia naran seidauk rejista iha ne’e. Klaru katak, se sira seidauk iha vistu trabalhu entaun kontra Lei. Ne'e duni, sira labele serbisu sein iha vistu trabalhu. Ami seidauk rekomenda sira atu halo serbisu. Maibé, tansá sira halo serbisu, ha’u hanoin ne’e kontra Lei no viola lei imigrasaun azilu.” esplika Leto Soro.

Molok hakotu ninia liafuan, Leto Soro haktuir katak, vistu trabalhu ne’e sira mak fó hafoin sira bele hala’o serbisu iha ne’e. Maibé, se husi parte Inspesaun Jerál trabalhu seidauk fó rekomendasaun. Maibé, ema estranjeiru hala'o uluk ona serbisu konserteza ema sira viola Lei no tenke prosesa tuir Lei imigrasaun númeru 9/2003.

Tuir Artigu 118 no Artigu 119 tenke fó multa mínimu doizentus sikuenta dolar amerikanu to’o dois mill. Nune’e mós, ba empregador tenke fó multa kuaze trezentus to’o dois miil.

Iha parte seluk, Deputadu Bankada Fretilín Joaquim dos Santos haktuir ba jornál Tempo Semanál katak, ema estranjeiru ne'ebé mai iha Timor Leste ho vistu turista la iha direitu atu servisu iha nasaun ida ne'e. Tanba, Lei la fó dalan. “governu tenke kontrola didi'ak ema estranjeiru sira ne'ebé tama mai Timor-Leste. Nune'e mós, Polisia imigrasaun tenke kontrola makas movimentu sidadaun estranjeiru sira iha rai laran, liu-liu sira ne'ebé mai ho vistu turista” sujere deputadu ne'e.

Nia mós husu ba parte Imigrasaun tenke serbisu tuir Lei hodi labele tolera ba ema estranjeiru ne'ebé mak identifika duni katak hala'o atividade sein rekoinesimentu husi parte ne'ebé kompetente.

Lei Taka Dalan Ba Vistu Turista Serbisu Iha TL

SIDADAUN Filipina ne'ebé deskonfia uza vistu trabalhu hodi hala'o serbisu oras ne'e daudauk komesa hakat ona ba Ministériu Negósiu Estranjeiru (MNE), Departamentu Konsulár hodi trata vistu trabalhu.

Prosesu ne'e hamosu polémika boot ba públiku. Tanba, antes ne'e sidadaun Filipina hala'o uluk ona serbisu iha fulan hirak liu ba. Ironia liu tan, depois de loron ida Jornalista Tempo Semanál hasoru malu ho sira, hafoin mak sira ba trata dokumentus para hetan vistu trabalhu. Maibé, durante ne'e sira uza hela vistu trabalhu.

Hataan ba kestaun ne'e, Komandante Serbisu Imigrasaun Distritu Dili haktuir, ema estranjeiru ou se de'it mak tama mai Timor-Leste hodi serbisu, tenke hetan vistu trabalhu. Maibé, se enkuantu nia sei uza vistu turista kerdizér nia viola vistu. Ne'e duni, tenke utiliza Lei Artigu 118 ba nia para selu multa.

“to'o ohin loron ami seidauk hatene klaru kona ba prosesu ida ne'e. Maibé, sekarik ema ne'e viola duni Lei, entaun ita tenke prosesu tuir Lei imigrasaun nian. Tanba, se nia hakarak serbisu tenke trata vista trabalhu.” tenik Komandante Imigrasaun ne'e ba Jornál Tempo Semanál liu husi via telefone.

Nia hatutan, Se ema sira ne'e mai ho vistu turista hodi hala'o serbisu konserteza kontra Lei. Ne'e duni,tenke aplika Artigu 118 tuir dekretu Lei imigrasaun azilu nian ho númeru 9/ 2003. Nune'e mós, ba kompañia ne'ebé mak fó serbisu ba ema ne'e tenke kondena ho Artigu 119. Sansaun ne'ebé atu aplika ba sira mak tenke selu multa, mínimu doizentus siquenta no másimu sen mill kada ema ida.

“Hanesan ohin ha'u mensiona katak, se nia seidauk hetan vistu trabalhu própriu konserteza nia labele serbisu. Maski daudauk ne'e nia trata hela dokumentus no sei iha prosesu nia laran mós nia tenke hein.” ho pozisaun firmi Komandante ne'e hakotu ninia liafuan.

Hare husi parte judisiáriu nian, Advogadu privadu Wilson Loki Cabral hateten, klaru katak, tuir Lei imigrasaun se ema estranjeiru ida mai ho vistu turista hodi serbisu fali iha Timor konserteza viola Lei. Tan ne'e, tenke prosesa tuir Lei imigrasaun nian ne'ebé hakerek iha dekretu Lei númeru 9/ 2003 Artigu 118 no Artigu 119.

“ha'u hanoin parte imigrasaun mós tenke hala'o kontrola másimu ba sidadaun estranjeiru ne'ebé tama sai iha Timor-Leste, liu-liu ba sira ne'ebé mak mai ho vistu turista.

MAZY La Konsege Sosa Dignidade Arnaldo Ho Pulsa

KOMANDANTE Polisia Distritu Ermera Sr. Arnaldo Araujo dehan katak Country manager Philweb Mazy koko atu hatun nia (komandante Arnaldo)  hodi fo pulsa ba nia. “Labele hatun hau nia dignidade iha ha’u nia kolega timor oan sira nia oin. Depois de hanesan ne’e, ha’u sai mai no husu deskulpa hodi dehan ha’u la’os hanesan ba ida ne’e. Ha’u dehan, ha’u mai para buka resolve problemas nee. Tanba momentu atuasaun ha’u nia Polisia iha ne’eba no afeta tanba komunidade sira ne’e mak ha’u mai buka solusaun para bu’at ne’e bele la’o ho diak no ita bo’ot sira bele kontinua  faan bu’at ne’e ho diak. Mak ne’e de’it.  Ha’u rasik duni mak ba iha ne’eba. Ha’u ba iha ne’eba duni atu buka resolve problema ne’e. Ha’u haree nia foti osan. Nia foo nonok ba ema sira ne’e ba hola pulsa. Mai nia hanesan bee esforsa ha’u atu simu. Eipaa hau sente hanesan bu’at ne’e soke loos ha’u.

Depois hau hateten ba nia ema sira ne’e atu hateten ba nia katak ha’u nia diviza ne’e la’os para atu simu osan sepuluh dollar, sepuluh ribu Dollar ninian. Ha’u nia diviza ne’e foo servisu ba ha’u hodi servisu buka dalan di’ak oin sa mak atu resolve problema ne’e. Ha’u mai iha ne’e para atu husu ita bo’ot sira para fulan-fulan ba update informasaun kona ba ita bo’ot sira nia servisu iha ne’eba. Atu nune’e ita bo’ot sir abele hatene oin sa reasaun husi komunidade sira. Ha’u dehan hanesan ne’e ba sira. La’os ita bo’ot sira buka servisu benefisiu ba ita bo’ot sira nia a’an.Maibe ,ita bo’ot sira mos haree took.

Ita bo’ot sira nia atividade ne’e komunidade sira simu ga la’e ?  Liu-liu ami Ermera ne’e hala’o ona bu’at ida tara bandu ba kualker jogus, hanesan jogu bola guling no sira seluk la eziste iha ne’eba. Tan Igreija ho lider komunidade mos involve iha tara bandu ne’e.

Ha’u hakarak hateten ba ita bo’ot sira katak ha’u nia jabatan ne’e la hola ho ita bo’ot nia pulsa ka osan sepuluh ribu mos la hola ha’u nia kredibilidade. Ha’u ko’alia bu’at barak ba sira. Ha’u foo hanoin ba sira katak sira kuandu loke ona bu’at ne’e iha fatin hotu-hotu labele haluha fulan-fulan ba update nafatin informasaun no rona reasaun sosiadade ninian. Komunidade sira ne’e simu bu’at ne’e ga la’e?

Bu’at ne’e la’o di’ak ga la’e. Imi halo uluk tiha kunadu problema maka ita bo’ot sira buka polisia. Kuandu di’ak ita bo’ot sira la liga. Ita bo’ot sira tenke hatene katak Ermera ne’e agora halo tara bandu ba kualker jogu ida labele loke. Lider Igreija, lider politikus sira, Lider komunitariu sira iha ona akordu ida nune’e bu’at sira ne’e bandu hotu. Momentu ne’eba sira foo ona kuinesimentu ba iha polisia distritu maibe sira haluha ladauk foo hatene ba polisia estasaun. Nune’e maka ha’u nia elementus foti atuasaun hasoru sira.

Mazy Kontinua Taka Ibun

Iha loron Sexta 29/09/2012, jornal dala ita tan koko foo nafatin direitu ba Sra. Mazy atu ninia parte hatan ba liafuan sira ne’e maibe Filipina ne’ebe sama hela lei Timor leste ba rai ne’e rejeita no husu Tempo Semanal ba husu klarifikasaun ba parte imigrasaun. 

Wainhira Jornalista Tempo Semanal koko husu klarifikasaun kona ba ninia vistu Mazy la responde maibe Ironia liu tan Mazy husu fali perguntas ba Jornalista Tempo seminal. Cidadaun Filipina ne’ebe daudaun ne’e sei uza hela vistu Turista maka halo servisu iha TL ne’e husu atu Tempo Semanal ba hamutuk ho nia ba iha imigrasaun maka husu perguntas. Jornalista mos aseita no husu fali oras tuku hira maka nia hakarak ba iha imigrasaun.

Nia dehan, “ha’u sei iha uma.” Wainhira jornalista tempo seminal sita problema mazy uza vistu turista hodi servisu iha TL nia hatan katak, “ha’u sei la hatan perguntas ruma wainhira ha’u nia defensor la marka presenza no la iha presence husi polisia imigrasaun.”

Ministeriu Turismu  Sobu Lei Imigrasaun

DIRETOR ba Jogu iha ministeiru Turismu Miguel Lobato ba jornal ne’e dehan ema ne’ebe servisu iha Philweb ne’e viola lei kuandu uza vistu turista hodi halo servisu. “Ne’e viola, viola lei kuandu uza vistu turista hodi servisu,” hateten Miguel Lobato.

Diretor divizaun jogus husi Ministeiru Turismo ne’e mos dala balun ba iha Timor Plaza hodi hasoru malu ho fungsionariu Philweb maibe wainhira jornal ne’e kestiona kona ba vizita ba Timor Plaza no hasoru malu ho staff Philweb ninian ne’e Diretor ne’e dehan, “ha’u ba iha ne’eba atu han. Kebetulan hasoru sira mos ba han.”

Ironia mak diretor inspeksaun de jogus ne’e servisu hamutuk ho ema estranjeiru ne’ebe viola lei imigrasaun maibe diretor ne’e rasik koko taka matan ba ema estranjeiru ne’ebe abuzu lei imigrasaun uza vistu turista hodi hala’o ninia kna’ar hanesan diretora iha Timor leste no seidauk trata ninia vistu servisu ninian ate kuarta feira semana kotuk.

Responde kona ba informasaun ne'ebé deskonfia envolvimentu Diretór Divizaun de Jogus iha Ministériu Turizmu, Miguel Lobato dehan, nia parte la hatene. Tansá, sidadaun estranjeiru ne'e mai ho vistu turista. Maibé serbisu fali iha Timor.

“ha'u la hatene no ida ne'e kompeténsia imigrasaun nian. Tanba, Lei la fó dalan ba ami atu hare ema nia dokumentus. Lei so fó dalan de'it ba ami atu peskiza kontabilidade ba lala'ok jogu lotaria legais nian no ida ne'e hatuur iha dekretu Lei númeru 10 tinan 2009.” dehan Lobato hodi rejeita akuzasaun ne'ebé hateten ninia envolvimentu hodi fó apoiu ba sidadaun Filipina ne'ebé loke jogu philweb.

Lobato haktuir, parte imigrasaun mak iha kompeténsia atu hare kona ba dokumentus. Ne'e duni, sira mak bele hatene katak, ema ne'e viola Lei imigrasaun ou lae. “ha'u hasoru malu ho ema sira ne'e loron tolu liu ba. Tanba, ha'u koñese sira no ami hala'o ligasaun ho sira. Maibé, ha'u nunka la'o hamutuk ho sira ba iha MNE parte Konsulár nian.” Lobato ko'alia ho fiar an.

Lobato haktuir tan katak, ninia knaar atu hala'o serbisu ida ne'e no Lei la bandu nia atu hasoru ema sira ne'e. Maibé, la'ós atu trata sira nia dokumentus. (**)