Jornalista Tempo Semanal Ermera hetaan Asaltu Iha Nia Uma

Tempo Semanal, 30.01.2011

Ged maria de carvalho, 35, ne'ebe servisu hanesan Jornalista ba jornal Tempo Semanal iha Distritu Ermera hetaan atakes husi ema balun iha loron (25/01) dader mais ou menus tuku 08.45, iha ninia hela fatin suku Legimea, aleia Titihat.

Dadersan ne'eba ema grupu ida maka mai to'o iha uma, ha'u hanoin karik sira hakarak atu hatoo informasaun ruma maibe to'o mai husu dehan, "Se maka Zeeto?"

"Ha'u mos hanoin la iha bu'at ida ne'ebe ha'u dehan, ha'u maka Zeeto. Entaun sira la ko'alia tan buat ida tuku kedan dala rua iha ha'u nia ibun no ida seluk hodi ai mai baku iha kapas," dehan jornalista ne'ebe sempre bolu Zeeto ne'e.

Tuir informasaun ema sira ne'e mai husi fatin ida ho distansia lubun ruma iha suku Mertutu, Aldeia Hohotino.

Depois de akontesimentu Zeeto, ba halo keixa ofisial ba autoridade lei ho Ordem, PNTL sub estasaun Ermera mais ou menus tuku sia minutu rua nolu resin tolu oras Timor Leste. To'o agora sei hela parte PNTL ninia investigasaun.

Zeeto dala barak ona hakerek artigu balun kona ba lala'ok husi distritu ne'ebe kuinesidu ho produsaun kafee ne'e hodi publika iha jornal Tempo Semanal.

Iha parte seluk Aderito do Rosario vice Diretur jornal tempo Semanal triste no hahalok ema ne'ebe baku ninia jornalista no ezije atu polisia halo investigasaun profunda ba kazu ne'e hodi hatene ninia hun.

"Hha'u lamenta tebes no kondena maka'as violensia husi ema balun kontra ami nia jornalista iha Ermera. Ami husu atu PNTL investiga buka hatene razaun Zeeto hetaan agresaun fizika  ne'e," dehan Aderito do Rosario, Vice diretur jornal Tempo Semanal.

Nia espera, "Keixa ona ba PNTL ita presiza submete. Ita hein katak ho esforsu PNTL ninian bele aijuda rezolve problemas ne'e no evita atu ema asaltu jornalista ho razaun ne'ebe la klaru."

 "Ami deside ona katak Tempo Semanal la sai belun ka inimigu ba ema ruma maibe ami so publika notisia de'it," Aderito esplika.