Parlamentu Nasional Ezeji PM Xanana Tebe Sai Ministru Pedro

Tempo Semanal-Dili, 22.02.2011

Membru Parlamentu Nasional husu korajen PM Xanana Gusmao ninian, atu hasai Ministru Infra Estrutura husi ninia kargu tan ba tuir Deputadu husi Fretilin ho CRNT ninia haree Ministru refere inkapacidade hodi exekuta orsamentu ba halo manutensaun liuron iha teritoriu Timor Leste.

Foto La'o hamutuk

Tuir Deputadus sira ninia hatene iha orsamentu tinan-tinan, reprezentante povu ninian sempre aprova montante boot ba hadia no manutensaun ba liuron iha Timor Leste maibe populasaun sei halerik ba beibeik kondisaun estrada ne'ebe trava mudansa ekonomia sira nian.

"Tinan-tinan parlamentu nasional sempre aprova verba ida ke'e la'os kiik oan ba estrada maibe too ohin loron ita seidauk haree rezultadu ruma. Ita iha osan maibe la iha kapasidade nune'e duni ami husu remodelasaun," deklara deputadu Joaquin dos Santos husi Bankada Fretilin.

Lian fuan kroat hanesan mos hasai husi Deputadu CNRT, Aderito Hugu Da Costa ne'ebe dehan Ministru Infra Estrutura la iha kurang husi kapacidade atu halo manajementu, jestaun no manutensaun ba liuron sira iha Timor Leste.

Tuir Vorta Voz husi partidu Primeiru Ministru Xanana ninian ne'e katak Ministru infra Estrutura la iha insiativa rasik maibe hein de'it ema keixa husi komunidade maka foin halo atuasaun.

Problemas dalan ho ponte sai preokupasaun maka'as ba parte hotu-hotu hahu husi Prezidenti da Republika, Parlamentu Nasional, Governu, Sociedade civil inklui Igreija no populasaun tomak. Maibe Ministeiru kompentente tuir parte barak ninia haree ministru rasik ladun halo esforsu.

Tuir Observasaun Ministeiru Infra Estrutura dala barak foo projeitu hodi hariku kompania balun hodi taka kuak halo kuak iha liuron Dili ninian rasik. Hanesan bele nota iha liuron bairopite hudi laran ne'ebe gasta liu milaun ida iha tinan kotuk agora nakles fali ona nune'e mos iha besik diresaun ponte kais ninian.

"Ha'u hanoin ema ne'ebe ka'er ministeiru ne'e tenke kona sanksaun tan ba gosta foo nafatin projeitu ba komapania sira ne'ebe halo rehabilitasaun no konstrusaun dalan la ho kualidade. Ne'e kontra lei. Loloos ne'e kompania sira ne'e tenke kona black list inklui ema ne'ebe nain husi kompania sira ne'e," dehan Estudante finalista ida husi UNTL iha kampus Kaikoli ne'ebe husu ninia naran labele publika.

Mahasiswa ne'e mos konkorda ho deputadu sira no apoiu PM Xanana atu realiza promesa eleitoral iha 2007 ne'ebe dehan ministru ne'ebe "KKN no  LA HATENE SERVISU SAIIIII....."

Prezidenti da Republika DR. Jose Ramos Horta iha okaziaun balun publikamente deklara Ministru Pedro Lay hanesan lao neneik hanesan "Lenuk." (TS).