TS BREAKING NEWS JOVENS BECORA CELEBRA 12 DE NOVEMBRU SUNU RODA, TUDA FATUK NO PNTL TIRU GAS MATAN

POPULASAUN HAHI 12 NOVEMBRO HO SUNU LILIN JOVENS BALUN HUSI BEKORA HAFOER LORON ISTORIKU NO PNTL TIRU GAS MATAN 

Jerasaun foun sunu lilin hodi lembra sira nia heroi nasaun RDTL

Tempo Semanal-Dili 12/11/2012

Hahu kalan Tuku walu (12/11) dala ida tan miliaun lilin haleu liuron sira hahu husi rate Santa Cruz tama to’o bairo sira iha Cidade Kapital nasaun RDTL, hodi hahi no onra sakrificiu ho korajen ne’ebe jovens Timor oan sira foo ba prosesu libertasaun nasaun ne’e iha 12 de Novembru 1991.

Iha bekora ema husi idade oioin sai ba liuron hodi sunu lilin iha alkatraun ninin. Tuir observasaun jovens, ferik, katuas labarik nakonu iha estrada ninin mak sunu lilin maibe iha besik UNITAL ninian oin dada spanduk iha rate saudozu ida ne’ebe TNI sira tiru mate iha Santa Cruz depois ba hakoi iha rate hera ne’ebe foin lalais maka kee no identifika husi ekipa forensik internasional ida husi Australia no entrega ona ba ninia familias hodi hakoi besik iha uma oin liuron ninin iha vila harmonia nia oin.

Tuir observasaun jovens lubun ida sunu roda kareta nian rua iha liuron sorin ba fali diresaun UNITAL ninian. Maske tuir liuron ninin komunidade sira nafatin sunu lilin maibe iha dalan ninin besik eis markas 744 ninian mos jovens sira sunu tan roda rua ne'ebe halo ahi bo'ot tebes.

Hakat liu tan ba besik prizaun Bekora ninia oin, jovens balun mos sunu roda iha Estrada klaran hodi halo trafiku ses araska. Atividade provokatoriu husi jovens sira ne’e grave tebes hodi sunu roda liu tolu iha kedan ponte leten besik terminal bekora hodi taka total dalan nune'e transporte labele liu ba mai.

Nune’e duni tuir observasaun kareta PNTL ida halai ho velocidade maximu husi diresaun kuluhun ba koko hases roda ne’ebe ahi hahu boot tebes ona iha ponte leten. Maibe sira la konsege no tuir observasaun PNTL uza HT bolu hikas ba ninia maluk hodi lakleur de’it kareta PNTL ida seluk akompania husi bombeiros ida sa'e ba diresaun ne’eba hodi halo mate tiha ahi iha ponte leten no prizaun ninia oin.

“Jovens sira ne’e hakarak duni foo onra ba herois sira ka sira hakarak provoka ordem publiku?” dehan Isabel Soares ne’ebe asiste atividade sunu lilin besik iha fatin refere.

Tuir observasaun PNTL sira koko ona hateten ba jovens sira ne’e atu labele sunu roda maibe hetook aat liu tan no jovens balun koko tuda malu fali. PNTL sira halo atuasaun maibe jovens sira tuda nafatin nune’e obriga PNTL tiru gas mata nian hodi despersa jovens lubun iha besik liuron ninin kulau ninian.

Estudante TL Iha Jogjakarta Relembra 12 Novembru Komunidade Sente Joventude Agora Pasivu Liu

Tempo Semanal - Dili, 12/11/2012

Monumentu 12 de Novembru 1991 iha
Igreija motael ninian oin ne'ebe ema balun
 la konkorda tan ba la uza Saudozu Sebastiao gomes ninia oin
 maibe uza fali joventude nain rua ne'ebe sei moris nia ilas (foto Dilma sujete)

Hanoin hikas Aniversariu 12 de Novembro 1991 la’os de’it hala’o iha rai laran maibe mos estudante no joventude Timor oan sira ne’ebe daudaun ne’e hala’o hela sira nia estudu iha estranjeiru mos hola parte hodi lembra fali sakrificiu ne’ebe herois juventude sira hatuur ona liu husi sofrementus no mate iha tinan rua nolu resin id aba kotuk. Hanoin hikas fila fali 12 de Novembro hanesan momentu ida ne’e furak no bele lori lembranca vida pasado oin oin. Kolia konaba loron 12 de Novembro , Juventude Timor - Leste sai pajina interaktivo iha vida mundial ne’ebe fanu espiritu de nasionalismo no patriotismo makaas tebes,” dehan iha nota de imprensa ne’ebe redasaun Tempo Semanal simu husi Jogjakarta iha 12/11/2012.

Nota de imprensa ne’ebe direje husi Presidenti Associasaun Dos Estudantes de Timor Leste Em Jogjakarta (AETIL) iha ninia deklarasaun hatutan katak, “situasaun ne’ebe mak ita labele hanoin too iha ne’eba, joven barak lakon vida, barani hakilar viva Timor – Leste iha funu baluk sira nia oin, barani haklaken Timor – Leste ninia libertasaun. sira mak ami tau hanesan herois do libertasaun.”

Deklarasaun ne’e konfirma lia fuan ne’ebe hato’o husi Augosto Ximenes, ne’ebe dehan estudante liu-liu universitariu sira agora ne’e pasivu hodi hola iniciativa hodi kontribui ba dezenvolvimentu nasional.

“Ita Bele joventude uluk iha luta ba Ukun Rasik aan ninian maske iha presaun husi kanu kilat TNI nian maibe sira ativu tebes iha sira nia hanoin no komportamentu hodi la tauk risku atu atua hasoru lala’ok ne’ebe la kontra Direitu ba povu ninian. Sira la tuur nonok maske inimigu obriga atu nonok. Sira estuda maibe sira mos participa iha luta Libertasaun Nasional ho risku ne’ebe maka bo’ot,” dehan Augosto Ximenes ne’ebe ba Jornal, (12/11) iha besik rate Santa Cruz, Dili wainhira participa iha aniversariu masakre hasoru Joventude sira iha 12 de novembro iha tinan 1991.

Nia hatutan, “Joventude ohin loron moris iha independencia ninia laran maske sira rasik haree ka rona katak mosu injustica hasoru povu mas povu ninian oan sira ne’e nonok de’it. Dala barak komunidade ko’alia kona ba KKN tama sira nia tilun maibe futuru jerasaun sira kala finjidu la rona ou ladun preokupa lala’ok ne’ebe sei estraga nasaun ne’e ninia vida.”

Nune’e Augusto ne’ebe tinan besik 6o ne’e husik hela mensajen rum aba foin sa’e sira katak, “ita espera joventude sira sei onra nafatin joventude sira ne’ebe masakradu iha ne’e ninia espiritu hodi nune’e jerasaun foun ohin loron liu-liu Universitariu sira uza sira nia matenek ba Nasaun ne’e nina di’ak la’os ba interese grupu ka pesoal ninian.’

Husi Jogjakarta presidenti AETIL, Cipriano Manuel das Neves mos rekuinese katak, “Joven barak ohin loron la hanoin too iha ne’eba, maibe balun ne’ebe husi uluk too agora sei hanoin ba timor nia vida dezenvolvimento. Barak iha inerese ba dezenvolvimento no barak la iha. Oinsa joven hirak ne’e bele???.”

Iha Jogjakarta- Indonesia , AETIL hanesan orgaun non-formal ne’ebe hari husi Timor Oan sira desde 2000 depois de Impetil. AETIL mak sai hanesan momentu ida ne’ebe Estudante Futuro Timor oan sira nian tau sira nia idea no halibur malu hodi bele fahe esperiencia ke iha.

Iha aniversariu herois joventude sira ohin 12 de Novembro 2012, AETIL iha inisiativa ke boot no hakarak fo inspirasaun ba estudantes timor oan sira liu husi programa misa. Tuir Presidenti AETIL katak  misa ne’e ninia objektivo mak hanesan dahuluk, “fo agradese ba Aman Maromak ne’ebe ke fo Libertasaun Independencia ida ne’e ba povu Timor – Leste liu liu ba gerasaun foun liu husi momento 12 de Novembro. Tan ba Nasaun nia independensia ida ne’e mos hanesan grace husi Aman Maromak.”

Daruak, AETIL, “rekonese no valoriza Sacrifisio ne’ebe joventude sira nian liu husi aksaun ne’ebe sira hatudu iha loron 12 de Novembro 1991.”

“Hanesan joventude ohin loron ne’ebe maka dehan herois ba dezenvolvimento nasaun doben Timor – Leste, liu husi misa ida ne’e bele hasae konsensia nasionalismo no espiritu vida foin sae nian ba Rai Doben ida ne’e.”

“Objectivo hirak iha leten ne’e mak sai hanesan motivasaun boot ba ami lideransa Associasaun hodi kria programa missa agradesemento ba loron ida ne’e.”

Presidente AETIL(Associsaun dos Estudantes de Timor – Leste) Yogyakarta. Cipriano Manuel Das Neves, iha ninia mensajen dehan, “ba maluk juventude no Estudantes Timor oan tomak mak ami hadomi. Mai ita hamutuk no nafatin fo valor ba future nasaun doben Timor – Leste. Uluk ita joven sai herois tamba berani sacrfica an. ohin loron ita hatudu nafatin ita nia aerani ida ne’e ba nasaun katak ita mak Makina Dezenvolvimento.Tau liman hamutuk no tau aas mak Establidade no Dezenvolvimento Timor – Leste.”

Iha Kapital Nasaun ne’e Joventude wain hamutuk ho komunidade akompania husi lider politiku sira inklui korpu diplomatika hola parte iha misa no vizita ba rate Santa Cruz. Ema wain tebes hakat tuir dalan ne’ebe uluk Joventude la’o liu hodi hakilar Viva Timor Leste Independencia to’o hetan tiru husi TNI sira iha 12 de Novembro 1991.