Tempo Semanal-Dili, 16/09/2011
Iha loron Sexta feira (16/09) dader hahu tuku hitu oras Timor Leste, polisia nasional hahu taka dalan iha kruzamentu kapital nasaun ninian hodi hapara huu arbitu hapara roda kualker transporte publiku. Ohin loron polisia bele hamriik iha kualker kruzamentu hodi halo sucesu ba atividade Tour de Timor. "Ha'u hanoin atividade ne'e di'ak maibe atividade ne'e trava mos ekonomia povu ninian," dehan Agustinho da silva, motorista iha bekora.Nia lamenta ho inisiativa Prezidenti da Republika ho Governu ninian hodi anima mala'e sira no hamate ekonomia ho atividade Governu ninian. Atividade ne'e paraliza atividade Governu ninian mos. "Ami ohin feriadu tan ba cirkulasaun ida husi prezidenti da republika," dehan funsionariu ida husi Gabinete Primeiru Ministru ninian ne'ebe husu atu jornal ne'e labele foo sai ninia naran.
Iha liuron kapital nasaun ninian ne'ebe lor-loron kareta ho mtotor nakselok malu ne'e paradu total duni ho kurida dili cidade paz. To'o ona tuku sia mos ema ladun barak iha liuron kapital ne'ebe haksumik aan husi ema liu rihun atus rua ne'e. Sofer Mikrolet sira mos hato'o sira nia hanoin ba Prezidenti. "Ha'u triste tebes ho Prezidenti ida ne'e ninia hahalok. Maibe iha realidade ninia planu la'os aumenta ki'ak. Se karik uluk ha'u hatene nia sa'e ba hodi halo fali Sr. Miguel Manitelu ninia servisu halai taru bicikleta karik ha'u hanoin povu barak mos la tuir nia. Maibe ami mos beik ne'e maka tuir nia ona," dehan Manuel, sofer mikrolet 02 ne'e opera diresaun bekora ho merkadu lama.Nia hameno ba Prezidenti katak atu hametin paz maibe povu sei ki'ak no kabun mamuk sei susar. "Ami sei la bodu ho halai taru bicikleta ida ne'e," nia hatutan.
Iha parte seluk otel ho kafe balun mos lakon sira nia rendimentu tan ba too ona tuku sia liu fatin sira ne'e seidauk hetan vizita husi konsumidores sira. "hai....ohin ne'e la hanesan bainbain. La iha ema maka mai hemu kafe," dehan servente ida iha kafe Otel Timo ninian.
Liu tiha minitu balun vizitante mala'e lubun ida tama daudaun ba Otel refere ho la'o ain de'it no servente ida seluk dehan ohin husu mala'e sira mai daudaun. "Hare to'o sira la'o kosar hanesan ne'eba," nia hateten liu tan.
Lakleur de'it Vizitante Portuges ida ko'alia ho jestu komiku no goza dehan, "cidade ne'e fila ba sekulu uluk ninian. kapital nasaun ne'e paradu."
Lakleur de'it, falta minutu lima tama ba tuku sanulu (09.55 OTL) Vice Primeiru Ministru ne'ebe hatais hanesan mos hakat tama ba kafe Otel Timor ninian hodi tuur iha kafe kahor ho mala'e sira.
Kurida bikleta ne'e ninia rezultadu mos maka forsa FSI ida mate no rua seluk kanek tan ba kareta tula aijuda lojistiku ba atividade refere monu iha area baukau besik diresaun aeroportu ninian.
