Povu Halerik Presu Karun, MTCI Hamaus ho Karnaval?

Tempo Semanal-Dili, 05.02.2011

grupu Karnaval husi Brasil la'o besik postu Dili ninian

Durante loron rua Ministeiru Tourizmu Comercio no Industria (MTCI) halo esforsu wain hodi halo sucesu ba atividades promove tradisaun no kultural Timor Leste ninian.
"Ha'u hanoin karnaval ne'e la'os kultura Timor ninian. Ne'e Kultura ema estranjeiru ninian. Nune'e duni ema ne'ebe la'o rai sira maka hakarak promove sira nia kultura iha nasaun ne'e ho intensaun atu fakar saugate osan povu Timor Leste ninian ba bolsu balun," dehan Marciano de Araujo B. da costa joventude ida ne'ebe tuur bilan hela iha Merkado lama wainhira iha tasi ibun Palacio nia oin ema danca no kanta rame hela.

Atividade loron rua ne'e mos fakar orsamentu boot ne'ebe tuir observasaun populasaun Timor Leste barak maka sei susar atu asesu ba osan ho numeru boot ne'e iha loron rua nia laran.
"MTCI hanoin ami kontente ho Karnaval ne'e. Populasaun hakilar sasan folin sa'e sira hodi karnaval mai doko fali rai," Marciano espresa ninia deskontentamentu.

Grupu Karnaval husi Republika Indonesia ninian lori BandeiraMean Ho Mutin
 iha palacio do Governo

Tuir Ministeiru Tourizmu Comersiu no Industria atividade ne'e mos hodi promove nasaun ne'e ba nasaun estranjeiru hodi dada turista mai TL.

"Ha'u hakaraka hatene osan hira maka oin gasta ba atividade ne'e no turista hira maka sira konsege lori mai. Maromak tulun turista husi brasil barak entaun kmanek ba ekonomia maibe ita gasta osan besik US$100,000,- maka la hetan lukru ruma entaun MTCI gasta saugate duni," Marciano so'e piadas.


Daudaun ne'e komunidade Timor ninian preokupa maka'as ho folin ba necesidades baziku inklui konstrusaun ninian ne'ebe sa'e ba beibeik. Governu Timor Leste fasilita ona emprezariu ho ho hatun taxa de importasaun maibe MTCI falla atu aijuda kontrola presu iha merkadu hodi riva razaun Merkadu libre ba komunidade ninian matan.

Iha tasi ibun feto no mane lubun ruma la'o tuir liuron ho danca no doko aan. Iha fatin sira ne'e polisia halo seguransa metin no dalan balun taka hodi empata trafiku iha dalan boot besik Palasio oin ate Ministeiru Negosiu Estranjeiru ninia diresaun iha bairo dos kokero Dili.

Atividade karnaval ne'e hala'o durante loron rua iha Dili hahu husi loron 04/03/2011 no remata oin kalan iha palacio do governu ninian oin.(TS)