PARTE IV : Opinaun Husi Estudante Kona Ba Alegasaun Emilia Aprova Fundus Ba Mac’s Metalcraft

 Ministra Financas Emilia Pires to'o agora sei nonok nafatin no rejeita atu klarifika ba publiku kona ba Mac's Metacraft ne'ebe deskonfia nain husi ninia kaben mos hetan projeitu single souce husi Governu ho orsamentu husi fundus kontijencia.

Estudantes Universitariu sira lubun ruma maka foo sira nia komentariu kona ba lala'ok Ministra Emilia ninian ne'ebe tuir mahasiswa sira katak la iha moral tan ba hatene hela hahalok ne'e viola leis maibe husi liu de'it.

Mahasiswa mos alega katak Ministra Financas RDTL uza ninia poder hodi bele hariku ninia kaben nia kompania. Tuir mai ita ba akompania hamutuk komentarius husi estudantes sira.

Naran             : Izac Saramentu

Estudante     : UNITAL

Alegasaun KKN hasoru Ministra Finansas ne’ebé aprova fundus ba ninia kaben injustisa boot. 

Tanba, Ministra Finansas uza ona ninia poder hodi hakat liu Lei. Klaru katak, nia (red-Ministra Finansas) viola ona Lei juridiku aprovizionamentu nian tanba kompaina ne’ebé suplay ekipamentus ne’e la eziste iha rai laran.

Tuir hau nia hatene ema ne’ebé mak komete iha Korrupsaun ema ne’e la iha responsabilidade moral. 

Maibe, iha sira ninia kakutak ne’e oinsá bele naok hodi hariku an no familia. 

Hanesan estudante ha’u husu ba Parlamentu Nasional no KAK presiza hare kazu ne’ebé deskonfia iha envolvomentu Ministra Finansas hodi bele hahú hala’o investigasaun ona.

Naran             : Miguel Soares       

Estudante     : UNITAL

Ha’u hanoin kazu Ministra Finansas aprova fundus ba ninia kaben injustisa boot. 

Tanba, Ministra uza ona ninia poder hodi viola Lei aprovizionamentu. 

Atetudi Ministra Finansas ne’e hatudu katak Ministra Finansas rasik la iha responsabilidade morál no felizmente nia rasik hafoer ona estadu nia naran. 

Tanba, iha fatin barak nia (red-Ministra Finansas) sempre koalia barak kona ba boa Governasaun.

Ho ninia kompetensia nu’udar Ministra Finansas, Emilia Pires komesa uza ninia poder hodi aprova fundus ba ninia kaben hodi hariku ninia familia. 

Klaru katak osan ne’ebé Ministra Finansas aprova ne’e osan povu nian. Ne’e duni, hanesan estudante ami husu ba KAK atu hala’o investigasaun ne’ebé profunda.

Naran             : Mesquita Soares

Estudante     : UNITAL

Dala barak nai ulun sira sempre koalia kona ba Boa Governasaun, transparansia no akontabilidade. 

Maibe, oinsá mak ita bele garantia kona ba boa governasaun se bainhira Ministra Finansas rasik tau as interese nasional hodi aprova fundus ba ninia kaben hanesan fó sai iha jornal nasional balun.

Atetudi Ministra Finansas hatudu katak, Ministra Finansas la iha responsabilidade moral. 

Ne’e duni, ba ha’u atetudi ida ne’e kategoria hanesan korrupsaun no krimi boot ida, tan ne’e estudante husu ba orgaun kompetensia atu toma responsabilidade. 

Tanba, agora daudauk publiku hakfodak ba ema sira ne’ebé involve kazu korrupsaun. Maibe, lidera hela nasaun ida ne’e.

Klaru KAK presiza hala’o duni investigasaun ba prosesu ida ne’e. Tanba, hahalok hirak ne’e fó ameasa boot ba nasaun nia futuru.(**)

REASAUN HUSI ESTUDANTES UNIVERSITARIU BALUN HARII RESIDENCIA OFICIAL LUXU BA MF

Konstrusaun ba residensia Oficial ba Ministra Finansas Emilia Pires, besik Igrieja Motael ninia sorin hamosu reasaun maka’as hasoru Ministra senior ne’e. Iha komentariu balun ne’ebe dehan balun ne’ebe dehan Ministra Financas merese duni atu hetan uma ne’e tan ba sucesu iha ninia servisu maibe iha parte seluk  hamosu preokupasaun ba reprezentante povu iha uma Fukun Parlamentu Nasional ne’ebe,     kestiona etika ho moral husi Ministra Financas no sira argumenta katak seidauk to’o tempu atu hadia     uluk uluk ne’ebe luxu ba Ministra financas wainhira PR, PM,ho membru do governu barak maka ladauk hela iha residencia official. Iha komunidade ninia leet, inklui estudante sira mos dulas ibun ba Ministra Financas ne’ebe hanoin uluk ninia palaciu official duke hadia uluk bu’at ne’ebe preokupa husi Parlamentar. Orsamentu ba konstrusaun Uma residencia official ne’e gasta osan liu milaun ida ho sorin   devia aloka uluk ba hadia eskola ho aranja kadeira ho meja ba eskola sira hanesan deputada Brigida Correia hateten. Tuir mai it aba akompania hamutuk saida maka jovens no eskola oan balun hateten ba Ministra financas. 

Naran : Nolasco Mendes

Estudante : Universidade Nasional Timor-Leste (UNTL)

Fakuldade : Fisipol

Tuir ha’u nia hanoin agora daudaun ne’e povu barak moris sei kiak no mukit hela. Ne’e duni,   membru Governu sira labele hanoin atu hariku an. Tanba, povu sira nia kondisaun moris seidauk diak. Hare ba estrada mós seidauk di’ak  maibé boot sira hanoin mak atu riku de’it. Signifika,  halo koorupsaun iha Ministeriu Finansas laran tanba ne’e mak  nia halo uma ne’ebé di’ak no kapas loos.

                                                   

Naran : João da Silva

Estudante : Universidade Nasional Timor-Leste (UNTL)

Fakuldade Siensia Estudu Dezenvolvimentu

“Membru Governu ne`ebe mak agora kaer ukun iha nasaun Timor-Leste sira hahu buka lukru ba sira nia an no hariku ba sira no familia iha rai ida ne`e. Dala barak sira hakilar atu hasai povu ida ne`e husi pobresa, kiak maibe realidade povu kontinua sei kia`ik iha base. Agora ita hare  Ministra Finansa nia kondisaun uma ne`ebe mak hanesan istana ne`e hatudu katak buat ruma la los ona iha ni-nia serbisu tanba ita hatene nia kaer pasta Finansa nian. Orsamnetu timor-Leste tenke liu husi nia hodi nune nia bele aproveita.

                                         

 Naran : Marcelino Paul Soares

 Fakuldade : Ekonomia Jestaun

Estudante : UNTL

Tuir ha’u nia hanoin membru Governu sira ne’ebé tuur iha pozisaun ne’ebé di’ak, tenke servisu ho onestu ne’e duni labele hanoin de’it atu hariku an. ”

Naran : Anito Cardoso Ximenes

Estudante : UNTL

Fakuldade : Agrikultór

“Tuir ha’u nia hanoin, membru Governu tenke hadia uluk kondisaun povu nian, labele hanoin atu riku an."

Madalena de Jesus Mendonca

Estudante : UNPAZ

Fakuldade : Direitu

"Tuir lolos sira tenke hare uluk povu nia susar no terus la’os hanoin maka halo uluk uma mewah. Hau hanoin parese deskonfia akontese buat ruma ne’ebe la loos."

Juliandina P. Soares

Estudante : UNPAZ

Fakuldade : Direitu

“Tuir loos membru Governu tenke hare povu nia terus no susar labele hanoin de’it atu hadia uluk sira nia moris”   

NOTA : Karik maluk sira hakarak atu tempo seminal publika ita bo’ot sira nia hanoin favor ida hakerek ita nia nia menon kompletu ho ita bo’ot sira nia endersu ho servisu no retratu atu nune’e Tempo Semanal sei publika iha online no jornal. Bele haruka ba iha tempo.semanal@gmail.com