PUBLIKU DUVIDAS HO SUCESU INVESTIGASAUN PNTL BA KAZU KILAT LAKON

Tempo Semanal, 23/08/2012

Presidenti Timor Leste informa ninia laran deskontentamentu kona ba kilat lakon ba sekretariu do Estado seguranca.

Presidenti husi PNTL buka hetan lalais fali kilat ne'ebe lakon. Maibe unidade Investigasaun kriminal PNTL sei hakdasak hela tan ba kilat lakon seidauk hetan no daudaun ne'e suspeitu balun mos haksoit liu ona rai ketan ba Indonesia. Maske parte barak mak preokupa ho kilat lakon maibe Komandante investigasaun kriminal PNTL Calistro Gonzaga dehan sei estuda hela despacho husi komandante jeral kona ba investigasaun.

Besik fulan ida ninia laran ulun boot sira nebe iha relasaun ba asuntus nee dehan kilat lakon nee tama iha investigasaun maibe ladauk la'o loloos hanesan komandante investigasaun PNTL Calistro Gonzaga hateten.

“Despaisu kona ba kazu kilat lakon tama ona iha Servisu Investigasaun Criminal (SIC) nia fatin. Maibe, Servisu Investigasaun presiza estuda klean liu tan despaisu ne’ebé hato’o husi Komandante Jeral PNTL” dehan Gonzaga ba Tempo Semanal iha ninia knar fatin, foin lalais.

Tuir Gonzaga, hare husi aspetu criminal, prosesu investigasaun ba membru PNTL ne’ebé halo lakon kilat hein atu hala’o. Tanba, husi parte Investigasaun simu ona despaisu husi Komandu.

Kilat lakon seidauk hetan feto ne'ebe deskonfia kolega ho komandante unidade intelijen PNTL ninian nee deskonfia halai ona ba Indonesia. Tuir fontes ida iha PNTL ninia laran dehan ohin (23/08) membru PNTL sira lori surat notifikasaun ba feto nee atu bolu fali ba tuir investigasaun maibe wainhira PNTL sira too iha ninia hela fatin palapasu Dili feto Timor oan nee ba tiha ona Indonesia.Advogadu Privadu ou Assesor Juridiku, Wilson D. Pereira Cabral "LOKI" duvidas ho kapacidade PNTL atu investiga didaik kilat ne'ebe lakon. Nia dehan iha diferenca rua kona ba investigasaun. Nia hateten katak despaisu ne’ebé Komandante Geral PNTL hato’o ne’e, kompentensia PNTL nu’udar Instituisaun. "Maibe, kona ba kazu kilat lakon ne'e, la’os kompetensia Komandu Geral. Tanba, iha ‘Dewan Keamanan Negara’ ne’ebé hare ba assuntu ida ne'e," dehan Wilson.

Nia hatutan, "tuir Lei Internasional, kuandu asaun ruma mosu hanesan ne'e, tenki hala’o investigasaun uluk ba hirarkia PNTL nian. Tanbasá mak membru ida lori kilat boot iha situasaun ida ne’ebé la’os perigu..?. Nune’e mós, kuandu iha armas ruma mak lakon,  so komisaun indenpendenti ida mak bele halo investigasaun la’os membro PNTL mak hala’o."

“tuir hau nia hare, Ministru Defesa no Siguransa, Sekretariu Estadu asuntu Siguransa, Komandante Geral PNTL no Komandante Unidade nebe'e mak membru refere obedese tenki submete mós ba investigasaun.” dehan Assesor Juridiku ba Tempo Semanal liu husi via Fece Book  iha loron, (23/8/2012)

Wilson kestiona katak, kompetensia atu hala’o investigasaun la’os Departementu Kriminal PNTL nian. Maibe, tenke komisaun indenpendente ida mak hala’o investigasaun.

“Hau mós le’e iha jornal balu, Komandante Jeral PNTL hateten, kilat ida mak lakon. Maibe, la’os nasaun mak lakon. Liafuan hanesan ne’e so ema bulak de’it mak bele koalia, karik nia hare ona impaktu husi kilat ne'e, bele kilat ida mak lakon. Maibe, kilat ne’e bele halakon ema barak nia vida.” dehan Wilson hodi suzere ba Komandante Jerál PNTL atu husik ninia kargu duke halo moe Timor nia naran.

Wilson fó razaun katak, tuir buat ne’ebé nia hatene, iha tempu rezistensia nia laran kilat importante teb-tebes ba ita nia luta. Maibe, iha faze ukun an ida ne kilat la iha valor, ida ne'e erro boot ida.

Ho fiar an ha’u brani hateten katak, proseus investigasaun ba kazu kilat lakon sei la susesu. Tanba, relasiona ho razaun hirak ne’ebe ha’u temi iha leten.” tenik Wilson  

Molok taka nia liafuan, Wilson argumenta katak, Komandante Gerál PNTL agora komesa hala’o ona politika ida hanaran politik tambal sulam, hodi taka nia hahalok foer.(**)

Trafiku Kusa Ponte Komoro, PNTL Habai iha Alkatraun Manas, UNPOL Sulan Aan Iha Karreta AC

Tempo Semanal-Dili, 28.02.2011

Mikrolet ho koor mutin ida hetaan dezastre iha entrada ponte Komoro husi diresaun kapital Dili ba oeste sakrifika maka'as husi parte lafatik ba to'o igreija ai mutin no dalan tun fali ba pantai kelapa besik eskola STIE ninian.

Falta prezensa polisia nasional Timor Leste liu-liu husi parte Polisia trafiku ninian hamosu problema tafiku iha area ne'ebe hanesan ba dala rua iha fulan Fevereiru ninia laran.

Akontesimentu ida ne'e hahu mais ou menus besik tuku rua loron kraik no movimentu tafiku hahu normal fali loloos liu tuku sanulu resin loron kraik.

Tuir observasaun Karreta ne'ebe mai husi diresaun aeroportu ho cidade tranka malu iha ponte leten no lori oras balun ninian laran maka PNTL to'o hodi atura trafiku ne'e fila ba normal. "Tan ba problema ne'e maka komandante distritu Dili daudaun ne'e hirus hela komanadante polisia Trafiku Dili ninian," dehan fontes Tempo Semanal ne'ebe besik liu ba komandante PNTL Pedro Belo.




La'os tranporte roda haat de'it maka labele la'o maibe motor mos sofre boot iha loron manas nia okos tan ba la konsege atu ses hodi liu ponte refere.

Iha distritu ne'ebe ninia seguransa sei iha responsabilidade UNPOL ninian ne'e mosu trafiku fila-fila ona maibe iha akontesimentu sira ne'e susar atu haree Polisia internasional sira la sai husi sira nia karreta mutin ho marka sinal UNPOL hodi husi membru PNTL ninia oan sira habai aan iha aspal nia manas leten.

UNPOL sira tuur iha sira nia karreta laran la liga rai no hetook aat liu tan sira hirus fali jornalista ne'ebe koko atu hasai sira nia filme.

Ponte komoro uniku ligasaun entre kapital ho parte oeste cidade ninian ne'e, iha lina ida fasilita transporte ba cidade no ida seluk sai ba diresaun aero porte ninian.

Ho medidas dalan ne'ebe klot maibe Komunidade kapital agora fakar osan wain ba sosa karreta hodi aumenta trafiku maka'as, nune'e tuir sofer taxista ida ne'ebe sofre mos trafiku ohin loron ne'e ninian dehan la kleur de'it numeru trafiku iha Dili sei aumenta barak liu maka'as tan ba lakleur de'it ema barak sei sosa karreta segundu mau husi Singapora ho Japaun hafoin hetan subsidiu no pensaun ba veteranus ninian. (TS).