Filme Konstrusaun Palacio Residencia Oficial Ministra das Financas

Tempo Semanal - Dili, 15/11/2012

Letratu ne'e hasai iha tasi
ninin besik palaciu do Governu nia oin.
Ne'e maka realidade moris
aileva ho roda tolu sira nian

Iha tuku haat liu ekipa video tempo semanal hakat liu ba parte jardin Motael nia oin, atu observa estatua ne'ebe harii daudaun husi kompania balun hodi onra vitimas masakre santa Cruz e'ebe oras ne'e hamosu fali polimika. Tuir observasaun Tempo Semanal ninian, interesante mak estatua ne'ebe tuir orariu loloos atu inagura iha 12 de Novembro 2012 ne'e, sei iha hela prosesu konstrusaun nia laran. Maibe  wainhira observa hela prosesu konstrusaun estatua 12 de Novembru foti matan hateke ba sorin hateke ba estrada sorin eis residencia Francisco Lopes da Crus, grupu trabaliadores Timor oan ho Indonesia lubun ida kontrui namanas palaciu residencia oficial ba membru governu ida ne'ebe tuir trabaliador ida dekreve katak uma ne'e membru do governu ida ninia residencia.

"Uma ne'e senhora ministra ida ninian. La hatene ministra ba saida ninian maibe Ministra ne'e la'o kudeik uitoan," katak trabaliadaor ne'e ba jornal Tempo Semanal.

Publiku la hatene uma ne'e tama iha projeitu estadu ninian ka la'e, tan ba la iha kuadru anunciu ruma hodi esplika kona ba projeitu ne'ebe la'o daudaun hela iha eis residencia Francisco Lopes da Crus ninian ne'e. Tuir prosedur normal kualker projeitu estadu ninian sempre iha informasaun iha plaka hodi esplika ba publiku kona orsamentu, tipu de projeitu, durasaun no kompania ne'ebe ke ezekuta projeitu ne'e.

"Ne'e ezajeradu," dehan Materestu ida husi Masakre Santa Cruz ninian. 

Uma andar tolu husi parte leste igreija motael ne'e, kompleta ho eskada maibe interesante liu tan sai hanesan uma residencia membru do governu dahuluk mak uza elevador. Tuir observasaun Tempo Semanal ninia, husi dizeinu no terenu ne'ebe iha hatudu katak uma luxu ne'e sei kompleta ho picina no sei nahe azuleizu iha rai no mos didin lolon balun.

Tuir informasaun ne'ebe tempo Semanal hetan husi parte balun hateten katak."Projeitu uma palaciu ba ministra Financas ne'e sei gasta osan ho montante liu milaun ida."

"Ne'e terlalu, tan ba projeitu ne'e single source depois maka entrega fali ba kompania seluk ida hala'o," dehan ema ne'ebe besik liu ba kompania ida agora daudaun ka'er hela obra ne'e.

Nia haktuir, "Projeitu ne'e loloos tender internasional tan ba liu milaun ida."

Tuir situasaun nasaun RDTL hatudu katak to'o agora la iha membru do Governu ida mak iha residencia luxu kompletu ho elevador. Realidade mos hatudu katak neim Presidenti da Republika, Presidenti Parlamentu Nasinal, Presidenti Tribunal no mos lider numeru Governu ninian (PM) seidauk hetan oportunidade atu iha residencia luxu hanesan uma ne'ebe konstrui daudaun ba Ministra Financas.

Ironi tebes, iha momentu ida ne'ebe povu sei moris iha mukit nia laran, alunus ho mestre sira loron-loron halerik kona ba kondisaun eskola ne'ebe la favorese atu hala'o prosesu apriendijazem, komunidade ruun nehan tan kuran bee mos, publiku ezije hadia estrada, iha parte seluk Ministra Financas preokupa harii uluk ninia palaciu.

Tuir enjineira teknika ida dehan atu halo eskola ida ho kondisaun andar ida, sala nen (tolu iha andar leten no tolu iha okos) kompleta ho sala ba profesores no toilet, estadu sei gasta orsamentu ho total US$900,000 tan ba tinan estadu tau mos edukasaun hanesan prioridade ida.

Iha mos lamentasaun kona ba konstrusaun residencia oficial luxu ba Ministra Financas ne'e. "Tan ba sa maka ita la uza osan ne'e ba harii eskola, klinika ho efisiu publiku iha area rurais ho responde lia halerik povu iha baze. Se Ministra Financas iha fuan, bele auguenta tan uitoan hodi okupa lai residencia balun iha farol ne'ebe sei mamuk hela," hato'o Mate restu 12 de Novembru ida seluk ne'ebe servisu mos iha governu nia laran.

Wainhira jornal ne'e dada lia ho membru do governu ida seluk kona ba kontrusaun ne'e nia konfirma duni katak uma ne'e halo ba residencia oficial Ministra Financas ninian. "Pak, uma ne'e residencia oficial ministra financas ninian. Bapak, karik hatene ona maibe uma ne'e mos lengkap ho lift (elevador)," dehan membru do governu ne'ebe jura kedas lakohi ninia naran tama iha jornal ne'e.

Membru do V Governu Konstitusional hamutuk nain lima nolu resin lima. Se karik kada membru do governu ezije residencia ida ho kustu (US$1.5miloeins ) hanesan mos ida ne'ebe Ministra Financas atu hetan, ne'e signifika katak estadu tenke aloka tan osan ho montante total US$ 82,500,000 para konstrui residencia ba membrus governu tomak. Maibe wainhira jornal husu ba membru do Governu balun, haktuir katak sira iha opsaun atu hili entre hela iha residencia privadu maibe fulan-fulan hetan subsidiu de habitasaun ou hela iha residencia oficial governu ninian.

Jornal tempo Semanal koko konfirma ho Ministra das Financas, Emilia Pires liu husi numeru telemovel Oficial 772300XX, maibe ministra rasik daudaun ne'e iha hela estranjeiru no ninia sekretaria mak hatan telefone ne'e hodi konfirma katak, "uma ne'e residencia oficial ba ministra financas ninia."

Sekretaria ne'e mos konfirma katak residencia oficial ne'e mos sei kompleta duni ho, "picina no elevador."

Wainhira jornal ne'e tenta atu hatene detalhus kona ba projeitu konstrusaun uma Luxu ba ministra financas maibe sekretaria ne'e hateten atu konfirma direitamente ho Xefe Gabinete ministra Financas ninian. Jornal ne'e kontaktu duni dala rua ba Xefe gabinete Ministra Finanacas ninian maibe infelizmente Xefe gabinete ne'e la hatan Telefone.