Komunidade Bibileo Hetan Ataka Husi Ninja

Tempo Semanal -Vikeke, 15/11/2012
  

SUKU-Bibileo fahi nunun distritu Viqueque daudauk ne’e, moris la hakmatek tanba hetan ataka husi grupu  deskoñesidu iha tempu kalan komunidade tenke hala’o seguransa ba sira nia bairo iha tempu kalan. 

Tuir informasaun ne'ebé Jornál korrespondente Tempo Semanál rekolha iha suku Bibileo krarás katak, iha kalan ninja ka ema ne'ebé tau metan mai ataka komunidade iha krarás konsege hakanek katuas Hia Susu.

Nune’e mós Jemito Gomes oan mane husi katuas Hia Susu  hateten, maizumenus tuku 4 dadeer saan Otl  sira toba dukur ema ne'ebé hatais  roupa metan ho oin metin tama ba laran. “ Hakat liu, ha'u nia aman ho katana atu tan ha[u nia aman nia ulun. Maibé, momentu ne'ebá ha'u nia aman hakfodak no hakilar ninja ne’e, mós hakfodak konsege lees kanek katuas nia ibun no buti kakorok.  Buhia nia oan mane ida mós halai sai mai ho diman tuda ema ne’e kona kois de'it iha liman loos. Maibé too agora seidauk kaer metin ninja ne'e. Mais, deskonfia iha ema balun, mais sei iha investigasaun nia laran seidauk hatene klaru katak loos ga lae ? ” Jemito konta tuir akontesimentu ba Jornál Tempo Semanál iha Suku Bibileo.

Aleinde ne’e,  Xefe suku Bibileo fahi nunun informa ba Tempo-Semanál katak, seidauk iha deklarasaun klaru husi vítima rasik. Tanba, iha momentu akontesimentu Xefe suku  ba tuir enkontru iha viqueque vila durante loron tolu.

Baihira fila husi enkontru ne’e, seidauk iha keixa ruma ka informasaun klaru husi vítima refere. Maibé, so rona de'it lia anin ka katak, ema ataka duni komunidade ne'ebé iha fahi nesun.

 Xefe suku ne’e duvidas  ninja iha duni ka lae. ? Tanba seidauk kaer metin hodi hatudu evidénsia katak, iha dunik ninja. Se karik komunidade kaer metin ema ne’e foin bele deklara loos dunik  ninja ne’e iha ?

Nia dehan, ita la bele ko'alia arbiru de’it. Se bainhira la iha dadus ne'ebé mak loos bainhira pasa informasaun ba polisia tenke iha evidensia ruma. Xefe suku mos rekonse katak,  iha duni ema deskoñesidu ne'ebé uza roupa metan hodi mai ataka komunidade sira iha suku Bibileo la'ós iha fahi nunun de’it. Maibé iha bubur laran mós iha. Tanba, kalan-kalan sira duni, mais nunka kaer. Maibé, bainhira sira kaer sei informa ba PNTL atu mai kaptura ema ne’e.  Agora daudauk deskonfia ona ema balun.

Korrespondente Jornál Tempo Semanál  hala’o konfirmasaun mós ho parte Polisia. Maibé, husi parte polisia rasik seidauk hetan informasaun mai husi suku refere. Parte polisia  so rona de’it lia anin, mais too agora  seidauk iha komunidade ida mai hato'o keixa ba iha PNTL. (**)

Dalan Aat Fatu Ahi Foo Fatin Ema Ataka Bis Hakanek Ema Tolu

Tempo Semanal-Dili, 30.01.2011



Dalan aat hanesan ne'e iha Fatu Ahi
maka foo mos oportunidade ba atakantes sira
asaltu beibeik iha fatin ne'e. (Foto/TS Dok).

 Situasaun seguransa jeralmente iha Timor Leste konduzivu tebes maibe grupu balun sei hamosu nafatin atividade kriminal hanesan hodi kalan (29/01) mais ou menus tuku 20.30 mosu grupu ida hodi asaltu karreta bis diresaun Baukau-Dili iha Fatu ahi.

Lala’ok ne’e mosu iha parte kruzamentu ida iha Fatu Ahi, dalan aat besik hali boot ninian diresaun wainhira bis Alin Ikun tula pasajeiru sira husi Dili ba Pazar iha Baukau.

Iha insidente ne’e rezulta ema pasajeiru bis Alin Ikun na’in tolu maka kanek no ida kanek todan. Vitimas sira ne’ebe kanek mane rua ho feto ida hanesan Sabino Ximenes, Pedro da Costa ho Esmeralda.

Bis Alin Ikun ho numeru matrikula 34.081, ne’ebe konduz husi Domingos Guterres ne’e, sofre maka’as tan ba pidru oin, kotuk no janela barak maka rahun rezulta husi fatuk.

“Ema barak maka asaltu karreta ne’e. Sira uza fatuk taka dalan depois tuda uluk sofer maibe tuda kois tiha mas bis nia vidru oin rahun tan sira koko tuda kona sofer entaun nia para. Se konsege karik ema bele oho ami barak. Tan ba karreta nia lampu leno ha’u haree hetan ema balun uza katana no rama ambon ,” dehan pasajeiru ida ho naran atino.

Iha akontesimentu ne’e autoridade seguransa la konsege kaptura suspeitu ruma tan ba sira too ba insidenti fatin hetan maka fatuk atakantes sira uza hodi taka dalan no fatun uza hodi tuda ninian.

Bis alin Ikun la konsege kontinua ninia viajen ba Baukau maibe fila hikas mai Dili para hela iha estasaun PNTL Bekora. Atu prevene akontesimentu hanesan maka parte seguransa hodi kalan hapara provizoriamente transporte publiku diresaun ba Manatutu, Baukau, Lospalos ho Vikeke.

Atividade asaltu iha Fatu Ahi ne’e hanesan ba dala ruma ona iha fulan ida loron lima nia laran. Iha kalan (24/12/2010) mosu mos atividades hanesan. Iha momentu ne’ebe suspeitu sira konsege hadau komunidade sira ne’ebe ba misa ninia motor rua.

PNTL halo intervensaun no konsege rekopera fali motor rua ne’e no konsege borgol suspeitu na’in haat.