Sengketa Entre Pemilik Saham Pualaka Petroleo Alves: "Mana Haruka Para"
Dili, Tempo Semanal
Primeiru Outorgante, Luis Geraldo Ximenes de Oliveira hanesan Manager Geral ba kompania Pualaka Petroleo Fuel, Lda., hamutuk ho segundu Outorgante, Joao Batista Fernandes Alves nudar Diretur Finansas, oras nee dadaun kadi hela kakutak atu hasoru terseiru Outorgante nebe
hanesan mos Diretur ezekutivu Pualaka Petroleo Fuel, Americo Luis Lourenco Lopes, tanba deskonfia "Ministra Justisa Lucia Lobato nudar Diretur Ezekutivu nia fen halo interferensia ba osan USD.1350.00 (mil trezentus e sinkuenta dolar amerikanu) no USD.6200.00 (seis mil e
duzentus dolares amerikanus) nebe hasai husi numeru de konta Puala Petroleo Fuel nian iha banku BNU Dili ho data, 23/09/2008 no 03/10/2008", alega Diretur Finansas Pualaka Petroleo hodi hatudu cek hasai osan nian nebe asina husi Diretur Finansas rasik ho Diretur Ezekutivu, maibe kansela tiha (la hasai osan) tanba tuir Diretur Finansas alega katak, Ministra Justisa halo interferensia. Problema ida nee fo fatin ba Manager Geral ho Diretur Finansas, Pualaka Petroleo atu lori Diretur Ezekutivu ba tribunal wainhira Americo Lopes lakohi buka solusaun ba problema nee iha nivel advogado, dehan Diretur Finansas, Joao Batista Fernandes Alves hodi konta liutan konaba Diretur Ezekutivu ninia intervensaun hodi hasai mos funsionarius nain 8 nebe durante nee servisu makaas ba kompania refere. "cek rua nee labele sai ba osan tanba gerente BNU depois de halo konsulta ba Ministra Justisa Lucia Lobato, Ministra dehan la aseita", alega Joao Alves.
Ministra Justisa nudar kaben husi Diretur Ezekutivu Kompania Pualaka Petroleo, nebe dala barak hateten ba jornalista sira nega ninia involvimentu iha asuntu kompania ninia kaben nian. "Dala balun kompania nee lori cek nebe asina husi Diretur Ezekutivu ho Diretur Finansas Pualaka Petroleo nian ba BNU atu hasai osan maibe gerente BNU nian telephone uluk ba Ministra Justisa hodi hetan bensaun. Nunee duni cek ida nebe hasai iha 03/10/2008 ho ida iha 23/09/08 hetan empata husi autoridade justisa nee", Alves alega liutan. Maibe wainhira jornalista Tempo Semanal ba husu komfirmasaun ba Gerente boot BNU nian iha Sesta-feira, 27/03/2009 lorokraik tuku: 04:15 konaba asuntus hirak refere, maibe Gerente boot ida husi BNU nee ho nervozu duni jornalista Tempo Semanal husi nia servisu fatin. Jornalista Tempo Semanal nebe hein ona durante oras ida ho balu nee ho pasensia sai husi sala laran tanba Gerente boot nee loke hela odamatan hodi obriga jornalista sai lalais. Alende duni sai jornalista, Gerente boot nee mos foti tiha cek transferensia orsamentu Pualaka Petroleu nian husi banku BNU ba Bank Mandiri nebe jornalista lori atu ba hatudu ba nia konaba naran ema hirak nebe asina cek nomos razaun ruma konaba alegasoens kontaku banku ba Ministra Justisa iha prosesu hasai orsamentu Pualaka Petroleu nian iha BNU. "sai husi nee, jornalista labele hatene segredu banku nian", dehan Gerente boot nee ho hirus no loke odamatan hodi husu jornalista sai lalais husi nia servisu fatin BNU. Maibe wainhira jornalista hateten, cek nee halo komfundi osan nain kompania Puala Petroleu tanba asinatura rua iha cek laran, osan nain Pualaka Petroleu la hatene, Gerente boot nee hirus liutan hodi koalia lian makaas atu jornalista sai lalais husi sala laran. Wainhira jornalista lao dadaun ba odamatan iha andar leten nee atu sai mai liur, jornalista tenta husu fila fali cek nebe gerente boot nee foti maibe gerente boot nee kaer metin cek
hodi subar tiha iha nia kotuk.
"senhor bele fo fila fali cek nee mai?...labele!, nee cek banku nian tanba sa imi hetan", husu jornalista no gerente nee hatan ho lian Portugues ho oin mean no loke odamatan luan liutan atu jornalista sai lalais tanba nia lakohi haree tan jornalista hamrik iha sala laran,fatin sekretaris Timor oan ida servisu ba. Iha loron hanesan, antes jornalista ba banku BNU atu halo komfirmasaun ba gerente boot BNU nian, jornalista Tempo Semanal tenta uluk halo comfirmasaun ba Diretur Ezekutivu kompania Puala Petroleo Fuel Lda., Americo Luis Lourenco
Lopes iha Hotel Timor, maibe Americo labele fo komentariu tanba Americo nia kaben, Ministra Justisa Lucia Lobato nebe lao sai dadaun husi fatin han meudia nian iha Hotel Timor nee hateten, "ba Tempo Semanal labele fo intervista", Ministra hateten ba nia kaben Americo
Lopes atu labele intervista ho jornalista Tempo Semanal. Antes Americo hetan samada husi Ministra, Americo prontu ona atu hateten sai buat ruma konaba alegasoens hotu hasori nia (Americo), maibe wainhira Americo hakbesik an ba Ministra hodi hateten orsida mak nia tuir tanba sei koalia ho jornalista, derepenti Ministra fila oin hodi hateten ba nia kaben Americo katak, "ba Tempo Semanal labele fo intervista", Ministra dehan ho lian nervozu. Tanba nee, Americo Lopes nebe prontu ona atu intervista mos tenki lao sai dadaun tuir Ministra Justisa sai
husi Hotel Timor. Liu tiha minutu 20 nia laran, hahu husi tuku 02:10 too tuku 02:30, jornalista tenta telephone ba numeru telephone 727xxxx nebe jornalista deskonfia Americo Lopes nia numeru telephone, atu husu Americo Lopes kumpri nia promete atu fo intervista ba jornalista maibe wainhira jornalista telephone, ema mane ida simu telephone nee hodi hateten katak, sala sambung. "nee senhor Americo ka?, sem!. Hanesan nee senhor ohin ita hasoru malu iha Hotel Timor ita dehan atu fo intervista nebe ami hein hela, oinsa?, Oo..laos,, imi sala samgung", dehan mane nee husi telephone. Tanba dehan sala sambung, entaun jornalista mos tenta telephone ba numeru telephone 737xxxx, nebe jornalista deskonfia hanesan numeru telephone Americo Lopes nian, maibe numeru nebe jornalista telephone fora da area do cobertura. Husi parte seluk, iha dokumentus kontratus kompania Pualaka Petroleu Fuel, Lda nebe asina iha Diresun Notariadu Ministeriu Justisa nia oin iha loron 17 Marsu 2008, deskonfia mosu tan falsifikasaun ba dokumentus nee tanba iha tan dokumentus kontratu ida nebe a hanesan. Ezemplu iha pagina rua nebe esplika konaba Estatutos kompania ninian, iha artigu 1 dokumentus nee nian asina husi ema nain 4 maibe iha dokumentus ida seluk deskonfia falsifikasaun tanba laiha asinatura nomos hakerek sala direisaun kompania nian. Iha dokumentus primeiru esplika katak, Kompania Pualaka Petroleu Fuel domisiliu "em Audian na Avenida 12 de Novembru, Santa Cruz, Distritu Dili", maibe iha dokumentus ida seluk hakerek "Rua Audian, Avenida 12 de Novembru, Suco Santa Cruz, Sub distritu Nain Feto do Distrito Dili". Deskonfia falsifikasaun ba dokumentus primeiru nee makaas liu iha parte fahe saham nian, iha pagina 2 dokumentus nee nian nebe iha dokumentus ida seluk ho asinatura ema nain 4 esplika katak, Luis Geraldo Ximenes de Oliveira ho saham 30%, Americo Luis Lourenco Lopes ho saham 30% no Joao Baptista Fernandes Alves ho saham 40%. Maibe ba dokumentus ida seluk nebe laiha asinatura husi ema nain 4 nee, esplika katak, Luis Geraldo Ximenes de Oliveira ho saham 20%, Joao Baptista Fernandes Alves ho saham 30% no Americo Luis Lourenco Lopes ho saham 50%. Koalia konaba dukumentus rua nee ida nebe mak loos, Diretur Finansas Pualaka Petroleu, Joao Alves duun katak, dokumentus ho saham Luis Oliveira 20%, Joao Alves 30%, Americo Lopes 50% nee la loos, dukumentus loos mak Luis Oliveira ho saham 30%, Americo Lopes 30% no Joao Alves 40%, esplika nia. Atu hatene liutan konaba akuzasoens, alegasoens no deskonfia sengketa ou perpecahan entre pemilik saham iha kompania Pualaka Petroleu Fuel Lda., tuir mai akompana deit intervista eskluzivu jornalista Tempo Semanal ho Diretur Finansas, Pualaka Petroleu Joao Baptista Fernandes Alves. (Sesta-feira, 27/03/2009)
TS: Iha loron 19/03/2009, iha trasferensia orsamentu Pualaka Petroleu Fuel iha Banku Nasional Ultramarino ba Bank Mandiri nebe benefisiariu ba kompania LIVRARIA MAU HURAN, (Americo Luis Lourenco Lopes nia kompania) ho total orsamentu USD15,000.00, karik senhor Diretur iha koinesementu ruma konaba transferensia nee?
JA: Hau foin hatene dehan katak iha tranferensia ida hanesan nee, tranferensia ida hanesan nee la hatene mai husi ida nebe, hau la asina nein cek ida, la asina nein dokumentu ida husi banku para halo transferensia ba banku seluk. Ultimu transferensia rua ke ami halo
maka transferensia ida nebe ke hau ho senhor Americo rasik mak asina para atu bele halo pagamentu ba funsionarius sira ho pagamentu sira seluk ka debitu sira nebe ke ami iha.
TS: Signifika senhor Diretur laiha koinesementu ba tranferensia nee nebe fo benefisiariu ba kompania LIVRARIA MAU HURAN?
JA: Ouu..se ba tan LIVRARIA MAU HURAN ida nee hau rezeita purke laiha relasoens servisu entre LIVRARIA ho Pualaka. Se iha karik transferensia nee, ami nain rua tenki iha akordu ida purke sistema pagamentu hotu nebe ami halo tenki tuir request pagamentu husi General Manager tanba ami tenki bazeia ba request pagamentu nee mak ami bele hasai cek hodi halo pagamentu.
TS: Se nunee, karik iha problema ruma iha Pualaka nia laran?
JA: Sem, tanba depois de Americo haruka labarik sira nebe servisu iha Portu nian para, ami senti katak iha diskriminasaun ida tanba se mak sai General Manager ba Portu Tibar nee mak Luis Geraldo Ximenes de Oliveira. Tanba nee, nia (Luis Oliveira) mak bele iha intendementu ho
funsionarius sira iha portu Tibar no nia mak bele haruka para. Se karik funsionariu sira halo atuasaun ruma ke ladiak ba kompania, entaun laos deit nia haruka para derepenti maibe nia tenki konsulta ami nain rua antes atu hasai ema ida no antes atu hatama ema ida. Purtantu, momentu ida nee mosu derepenti deit, Manager ho Supervisor iha Portu Tibar mai hateten ba ami nain rua katak senhora haruka para servisu.
TS: Funsionarius nain hira mak para servisu?
JA: Sira hotu hamutuk nain 8, maibe ami hakarak tenta atu sira nain 8bele servisu nafatin purke iha dezentenamentu. Se iha dezentenamentu entre ami, sira nain 8 la sala buat ida. Purtantu, direitu nebe ke sira iha desde sira tama servisu iha nee, sira tuir loloos tenki kontinua servisu tanba labele iha ema ida hapara sira nain 8 nia servisu kumformi ita nia hakarak.
TS: Karik senhor Diretor bele esplika oituan konaba Saham hamutuk parte tolu nian?
JA: Ami mantein nafatin tuir dokumentu legal nebe ke ami asina iha Ministeriu Justisa Diresaun Notariadu nia oin katak, Luis Geraldo Ximenes de Oliveira ho saham 30%, Americo Luis Lourenco Lopes ho saham 30% no Joao Baptista Fernandes Alves ho saham 40%.
Tanba nee enkuantu atu iha investimentu iha area seluk ka atu fo apoiu ba ema seluk, nee intendementu internal entre ami ke ami tenki kumpri intendimentu sira nee. Tanba nee hau hanoin katak, se derepenti mak haruka para deit ami nain rua (Luis Oliveira ho Joao Alves), entaun ami tenki abansa prosesu nee ba oin (tribunal).
TS: Ho saham nebe iha, kompania hetan lukru ona durante nee?
JA: Tuir kalkulus nebe hau halo hatudu katak laiha prejuizu nein oituan tanba investimentu sira nebe uluk ami investe, rekovre fila ona no ami senti katak lukru nebe ami hetan, nee direitu ami nian ba servisu nebe ami halao durante tinan ida liu fulan ida. Hau mos komesa haree ona katak, ami tenki investe fila fali lukru nebe ami hetan ba dezenvolvimentu nasional.
TS: Iha ona planu atu fahe lukru entre pemilik saham sira?
JA: Ami tenta buka solusaun ida entre ami, liu husi advogadu kompania Pualaka Petroleu ninian rasik maibe, too agora senhor Americo Lopes ladun iha interese para atu bele iha solusaun ida hanesan nee. Tanba nee, ohin (sesta-feira, 27/03/09) ultimu dia ke ami atu haruka karta
ida ba nia hodi husu atu nia bele lalais foti solusaun, se lae ami sei foti kazu nee ba oin. Ami sei foti kazu nee liu husi nivel advogado atu resolve maibe se labele karik ami sei lori ba tribunal.
TS: Bele esplika oituan konaba istoria Pualaka nian?
Despois de hau sai husi terseiru guvernu konstitusional, hau mai iha nee atu haree saida mak hau bele halo. Tanba nee, senhor Luis de Oliveira rasik hamosu ideias ida katak, se bele ami tuir kompania Pualaka nebe ke Luis ninian rasik. Tanba nee ami involve iha kompania
nee para atu bele haree tok saida mak ami bele halo. Husi nee, hau hamosu ideia ida katak, se Timor riku mina-rai, entaun Timor oan sira mak tenki kaer servisu iha area mina nian. Ho ideias ida nee mak ami konsentra servisu iha Pualaka hodi haree oinsa bele loke pompa gazolina iha Dili nomos distritu sira hodi fo apoiu ba dezenvolvimentu nasional. Ami konsege loke pompa gazolina iha Lospalos, Same, Dili, ami tenta kobre distritu hotu maibe tanba problema managementu
kompania nian mak halo ami la konsege halo buat ida ke boot liutan. Ami nain tolu, Luis Oliveira, Americo Lopes ho hau (Joao Alves), ba registu kompania nee iha Ministeriu Justisa, iha neba ami asina akordu ida nebe hateten katak, hau (Joao Alves) ho saham 40%, Luis Oliveira 30% no Americo Lopes 30%. Akordu nee ami asina iha Diretur Notariadu, Dr. Henrique de Oliveira Ximenes nia oin para depois bele abansa prosesu nee ba oin. Hafoin ami asina akordu nee, ami ba banku Caixa Geral de Depositos (BNU) atu loke konta bankaria. Maibe ami too iha neba, banku ejize atu kompania aprezenta dokumentu legal kompania nian atu bele iha kredibilidade iha banku. Tan nee ami lori dokumentu notariadu husi Ministeriu Justisa ba banku no banku simu hodi esplika mai ami prosedimentu saida mak ami tenki halo. Tanba nee, ami hatama osan oituan iha banku no banku husu se deit mak bele asina wainhira atu foti osan. Ami nain tolu halo akordu ida lalais hodi defini katak, hau (Joao Alves) ho Americo Lopes mak asina hanesan kompania nain no testamuna mak Luis Oliveira hanesan mos kompania nain. Ami halo ida
nee iha funsionarius banku nia oin. Tan nee, kolker atividade bankadia, tranferensias osan sai ba liur, foti levantamentu osan atu selu atividades, salarius, entaun asinatura iha cek laran minimu ema nain rua mak hau (Joao Alves) ho Americo Lopes atu legaliza osan iha kontra bankaria Pualaka ninian iha BNU. Mesmu atu halo tranferensia telegrafika ba pagamentu mina nian iha liur mos hau ho Americo mak tenki asina. Hanesan mos pedidu de pagamentu ba guvernu laos deit hau mak asina maibe ami nain tolu asina, maibe hanesan gestor principal mak Luis Oliveira. Tan nee, kolker intervensaun ba sistema managementu nebe ke iha teritoriu laran desde husi fornesementu mina husi Portu Tibar ba EDTL Dili no mina foer atu lori ba nebe, nee ami intrega ba Luis Oliveira mak toma konta. Ami nain rua nia servisu liu-liu hau halo konta konaba dokumentus administrasaun nian, halo kalkulus no Americo Lopes mak kadabes ami nain rua mak ba liur hodi negosia fila fali fornesementu mina nian. Nunee ami haree katak, sistema nebe ami uza nee kapaas teb-tebes tanba bele fo garantia ba guvernu mina ho koalidade diak atu labele iha failansu iha sentral eletrika EDTL nian. Purtantu wainhira buat hotu lao diak ona, komesa mosu intervensaun maibe la hatene husi senhor Americo Lopes ka husi nebe para depois
haruka para tiha servisu sira nee hotu, haruka para tiha funsionarius iha Portu Tibar, nebe mak durante nee servisu liu oras, servisu too kalan boot maibe ba haruka para tiha sira la hatene razaun saida.
TS: Funsionarius nain hira mak sai no se mak hasai?
JA: Mumentu nee General Manager mantein ho servisu nebe ke iha maibe derepenti mosu senhor Amin (Americo Lopes nia alin) nebe ke senhor Americo Lopes mak hatama hodi ba iha Portu Tibar no hateten ba funsionarius sira dehan "mana haruka para". Purtantu ami nia
intendementu dehan katak senhora ministra mak haruka para. Nee ita bele konkretiza ho labarik sira nebe ke iha, tanba sira telephone mai ami nain rua (Luis Oliveira ho Joao Alves) hodi ba haree kedas tansa mak haruka para. Maibe tanba General Manager, Luis Oliveira haree
katak atu labele kria komfuzaun iha neba entaun Luis retira funsionarius nain 8 nebe senhora haruka para. (aro)
MJ Nega, Joao Alves Metin Alegasaun
Relasiona ho informasaun hapara membru kompania Pualaka nain 8 ne'ebe kompostu husi postu Tibar nain 5 no nain 3 husi parte Pon-bensin Luru Mata nian ne'ebe alega involvimentu ministra justice Luçia Lobato iha prosesu hirak ne'e iha loron 27/03 jornal ne'e tenta klarifika ho ministra justica ne'ebe hanesan mos fen Sr. Americo Lorenco Lopes nu'udar nain no direktur Exekutivu ba kompania Pualaka. Maibe Ministra ne'e rejeita katak nia hatama kanur ba Pualaka ninia bikan maske ninia kaben maka sai hanesan direktur ba kompania refere. "Hau nu'udar
membru Guvernu ida ne'ebe la iha 'urusan' ho ida ne'e, maibe ita boot nia pergunta ne'e kona ba saida?" ministra nega no finji la kompriende perguntas jornalista ninian. Maibe Ministra Lucia tenta atu esplika katak nia la hatene buat ruma ho lalaok kompania refere maske staf balun alega katak osan husi Pon bensin laos tau iha edificiu Pualaka iha Audian maibe tau iha edificiu Pualaka ida iha Ministra ninia uma. "Hau Ministra Justisa, laos diretur Kompania Pualaka, ne'e duni ita boot husu pergunta ne'e sala karik?" Tenik Lucia. Ministra Justica mos rejeita akuzasaun sira seluk ne'ebe halo husi membru kompainia Pualaka balun hasoru nia. Maibe ho firme Ministra lucia defende ninia parte la hetene kona ba kestaun ida ne'e, tan ne'e nia hateten ba jornalista Tempo Semanal katak, "Ha'u la hatene kestaun ida ne'e, tan ne'e ita boot sira bele ba husu ema hirak ne'ebe mak halo akuzasaun." Hafoin loron rua jornalista sira halo esforsu buka atu hetan malu ho direktur kompania Pualaka iha ninia knua knar fatin Audian no Pon Bensin Luru mata maibe la konsege. Iha loron 27/03, mais ou menus iha tuku 2,20 otl jornalista konsege hetan direktur pualaka ne'e iha hotel Timor. Fou-foun Direktur Pulaka ne'e lakohi fo intervista no husu ba jornalista TS hodi dehan, "imi bele ba hasoru hau nia advogadu Tito."
Maibe Jornalista tenta nafatin no ikus mai Direktur ne'e loke neon hakarak ona no husu ministra atu lao uluk ona, maibe derepente deit direktur ne'e troka fali ninia hanoin hodi dehan fali, hodi fo esperanca husu jornalista dehan, "imi hein wituan tan lai." Hafoin Direktur Pualaka ne'e koalia lia fuan ne'e ministra justica ne'ebe ninia kareta ho numeru matrikula 05 para hein hela iha hotel Timor nia oin ho lalais interven hodi hateten ba direktur Pualaka dehan, "ba Tempo Semanal labele fo intervista," hateten Ministra Justica ne'ebe keixa ona Tempo Semanal ba ministeiru Publiku ho alegasoens komete krime difamasaun hasoru nia onra hafoin de noticias iha edisaun 108 jornal ne'e ninian. Maske nune'e jornalista TS iha responsabilidade sei hein nafatin tuir pedidu direktur pualaka ninian ne'ebe dehan jornalista hein lai maka nia fila mai maibe to'o ikus direktur ne'e la fila no halo jornalista sira hein durante oras ida ho balu nia laran. Iha 29/03 dader jornal TS tenta kontaktu telefone director pualaka via telemovel maibe sorte at nafatin. Depois de meiu dia 29/03 jornalista jornal ne'e tenta kontaktu telephone Sr. Tito ne'ebe nu'udar advogado mak indika ona husi Direktur Pualaka. Maibe advogado ne'e dehan lakohi problema interna kompania sai konsumsi publiku maske staf kompania rasik maka ke'e sai karekas kompania nian inklui halo akuzasoens balun. Iha 27/03 lokraik tuku 16.00 OTL Jornalista TS hit ain ba BNU. Hafoin de resepsionis BNU atende jornalista TS hodi lori kopia Cheque kompania Pualaka ne'ebe polimika maka jornal ne'e konsege asesu atu hodi hatudu ba gerente BNU hodi bele klarifika alegasaun katak gerenti BNU aprova cheque US$ 15,000.00 maske Joao Alves la asina maibe derepenti deit ema bot BNU nian ida ho naran Artur hadau tiha kopia cheque problematiku ne'e hodi dehan katak, "dokumentus ne'e konfidencial no jornalista nain rua husi jornal ne'e suta sai husi uma servisu fatin BNU. Nune'e duni TS la konsege konfirma ho gerente BNU ninian kona ba asinaturu autorizasaun iha cheque hodi halo tranferencia osan husi konta kompania Pualaka iha BNU ba kompania Mau huran iha banku Mandiri iha loron 19/03. Iha transferencia ida ne'e Joao Alves hateten nia la asina cheque ne'e. "Ha'u la hatene iha
transferencia ba Mau huran no ha'u la asina cheque transferencia ne'e." Nune'e duni direktur Financas kompania Pualaka konfundi ho cheque ne'e no alega katak buat ruma lao ladun los iha BNU. Tan ba desde 20 de Marsu nia parte tenta atu hetan print out husi konta Kompania Pualaka ninian maibe gerente BNU promete hela deit I too ohin loron halo susar ba nia ho Luis Oliviera atu hetan asesu ba bankaria kompania ninian. Joao Alves hateten normalmente kualker cheque ba transferencia no nominal sa deit husi pualka tenki iha asinatura ema rua entre Direkur exekutivu no direktur financas ne'ebe testamunia husi Luis Oliviera. Joao Alves mos aprezenta alegasaun seluk hasoru BNU hp Ministra Justica halo kon kali iha prosesu pagamentu kompania refere.
"Ne'e cheque ne'ebe normal no tuir lolos tenki selu tan ba iha asinatura direktur ninian ho ha'u nia asinatura," esplika joao ho liman fuan hatudu ba asinatura ne'ebe iha cheque laran. Maibe cheque 2 ne'e la selu tan depois de BNU simu cheque ne'e teleone uluk ba ministra Justica hodi husu autorizasaun maka ministra hateten labele selu maka la selu to'o agora," alega Joao. TS
Direktur Pualaka Atua, Staf Dun MJ interven Lalaok Kompania
Fungsionarius balun maske naran sei iha estrutura maibe hasai husi pualaka la ho surat resmi ruma nune'e sira mos hahu loke karekas Pualaka ninian inklui hato'o alegasaun hasoru Ministra Justica ninia involvimentu iha kompania refere.Hanesan Joaõ Pereira da Silva nu'udar superviser teknik iha portu Tibar hato'o alegasaun hasoru ninia direktur inklui Ministra Justica. "Nia dehan ha'u naok ten," alega da silva. Superviser pulaka nian ne'e lekar sai akontecimentu iha loron Tersa feira, (17/03/09) tuku 19.00 no dun katak atetude Direktur Pualaka ne'e, "hanesan abuzu de poder. Ne'e hanesan uza kekuasaan. Primeiru nia hanesan direktur nia hanoin nia iha osan bele halo hot-hotu. Yang kedua tan ba posisi. Ba nia ne'e hanesan ninia senyora ne'e kan hanesan ministra justica." Tuir Pereira da Silva ninia hare direktur ne'e bele hanlo atetude hanesan ne'e hodi dun ema arbiru deit. "Jadi nia pada waktu nia koalia nia la hatudu bukti maka iha ne'ebe hodi hateten ami naok ten. Ami naok ninia sa ida?" Da silva
koalia ho lian husu. Joao Pereira da Silva nia knar hanesan superviser tekniku hahu servisu hodi halo instalasaun dada mina ne'ebe iha konstrusaun ne'ebe Pualaka la uza konsultan ruma hodi halo servisu maibe ideas husi sira rasik deit maibe ho intenvensaun husi "pihak seluk" haruka sira para servisu. "Husi Sr. direktur ninia alin sira pois haruka tan ema ida ba iha ne'eba dehan senyora Ministra maka haruka momentu ne'eba sira uza naran dehan "mana, mana maka haruka ema ne'e ba iha ne'eba." Nune'e duni tuir Pereira da silva ninia hare estrutura ne'ebe monta ona iha ne'eba la iha etika tuir servisu ninian. "Tan ba sira tau uluk ami iha ne'eba haruka fali ema ba, la fo hatene resmi dehan ema ne'e agora mai tan ba imi servisu la diak agora ema ne'e ambil alih," nia alega. Tuir superviser ne'e katak durante servisu iha stasaun Tibar sira nungka estraga mina, "maibe iha kazu mina ba to'o EDTL no EDTL tolak. Tolak tan laos foer, mina berubah warna. Warna la hanesan entaun EDTL haruka fila fali." Tuir Joao Pereira da Silva katak se karik la hetan ona dalan sai ba problema ne'e maka sei lori ba tesi iha tribunal tan ba difamasaun para ninia naran diak. Nune'e duni tuir nia hanoin "Tenki lori ba, para hatene
lia los. Tan ba senyor ne'e hateten ha'u naok tenki iha provas. Para buktikan ha'u naok ten duni ka lae," Pereira da silva sadik ninia direktur atu prova. Nia konfeza katak ho alegasaun husi direktur ne'e halo ninia oan sira mos sofre moral kuandu rona ema dun sira nia aman naok ten tan ne'e tuir ninia hanoin, "diak liu kazu ne'e tesi iha tribunal, instituisaun independenti mak tesi par abele hare se mak los no se mak la los.Se ha'u naok ha'u tenki ba kadeia no se ha'u la naok
nia mos fatin hanesan deit, iha kadeia hotu tan ba ida ne'e difamasaun. Nune'e duni fungsionariu hirak ne'e prepara atu lori kazu ne'e ba tesi iha meja verde no tuir Joaõ fiar an katak nia parte sei manan wainhira kazu ne'e lori ba tribunal tanba nia la naok mina. Fungsionariu ne'ebe hasai husi sira nia servisu iha Pualaka iha Tibar hasai nain lima no iha pon bensin nain tolu ho nune'e total staff ne'ebe hasai hamutuk lubun ruma ona. Atu semente liu tan lia fuan trata la murak husi direktur Pualaka hasoru Joao Pereira da silva iha ninia oan mane Gerson Pereira da Silva (Siquito) nia oin maka Rogeiro nu'udar fungsionariu Pulaka ninian ida mos marka prezenca iha
akonecimentu ne'eba hahu loke ibun. "Primeiru ne'e trata tiha primu siquito. Trata dehan be tiu ne'e, naok dor. Nia naok mina mak hola motor. Depois mai fali ami husu osan iha pon bensin nian ne'e." Nia mos alega katak direktur Pualaka hodi policia (PNTL) ameasa sira hafoin de husu osan iha pon bensin no rona resposta husi staf sira ne'ebe la satisfas nia. "Nia dehan imi sira mai mangame iha ne'e, ha'u haruka policia tiru hotu imi," Rogeiru konta tuir. Tuir staf ne'e
katak sira tur hela sira nian wainhira sira nia direktur ba ameasa sira. Nia kontinua alega tan katak laos lia fuan trata ne'e laos deit ba Joao Pereira da Silva maibe iha momentu ne'eba direktur Pualaka ne'e mos trata ema nain 2 seluk ne'ebe mos nain ba Pualaka. "Koalia kuandu trata maun Luis ho tiu Joao dehan ne'e laos Fretilin maka ukun. Ne'e AMP maka ukun. Ne'ebe halimar haruka policia maka tun. Tiru deit," alega Rogeiro.Wainhira akontesimentu ne'e mosu tuir Rogeiro ninia alegasaun katak Direktur Pualaka ne'e hetan segurnca husi membru PNTL nain rua ne'ebe hatais hela roupa civil. "Policia nain rua maka lao ho maun Americo," nia fo lembra. Nia hateten katak sira labele simu hasoru direktur ne'e ninia lia fuan tan,"ba ho policia." "Ami simu hasoru ladiak. Ami simu hasoru maka senti la diak baku fali ami ne kan ladun diak ida," nia hateten. Nune'e duni ho paciencia nonok deit hodi ba fo hatene ba ninia maun hp tiun sira. Tuir Rogeiru katak ne'e lolos ne'e bisnis la iha buat ruma ho politik." Tuir fali staf seluk ida ne'ebe husu jornal ne'e labele fo sai ninia identidade informa katak,"Sr. Americo ne'e ninia ferik oan Ministra Justica entaun nia loke fali kantor ida iha ninia uma ho ida ne'e la rezolve
kazu refere no husik staf sira sai abandona ou nia kasar ne'e bele hateten atu soran fali staf sira tan ba ne'e, "ami ejiji direktur nain tolu atu tur hamutuk hodi rezolve problemas ne'e ho lalais." Zito Alves nu'udar manajer Pon bensin haktuir katak problema ne'e mosu husi Direktur Exekutivu Kompania Pualaka Sr. Americo Lopez tanba falta konsiderasaun ba staff sira ne'ebe servisu iha Tibar. "Ami hanesan staff husu ba diretur nain tolu bele hamutuk hodi rezolve problema Pualaka, se problema ne'e mak hanesan ne'e nafatin ami senti katak dalan atu hetan rezolusaun mak ba tribunal" katak zito ba Jornal ne'e iha edifisiu pualaka Audian. Zito informa katak, "problema ne'e mosu tan ba deit iha deskonfiansa la masuk akal," nune'e mos tan, "ami
servisu hela, sira lori ema ke laos iha estrutura pualaka ninia laran,ami bolu dehan ema ilegal ba hatama tan, para hodi hasai fali ema hirak ne'ebe ke iha estrutura pualaka ninia laran ne'ebe servisu hela." Tuir Zito ninia alegasaun katak, "problemas ne'e mosu husi yahh.. Sr. Americo tan ba la konsidera ema sira ne'e servisu iha tibar ne'eba."Ba oin Zito apelu ba nain pulaka sira nian atu hamutuk hodi resolve sira nia problemas. Maibe "Se problemas ne'e maka la konsege
resolve maka dalan ba rezolusaun maka tribunal." Fungsionariu Pualaka ne'e sei senti an nafatin hanesan staf. Tuir Zito Alves to'o loron ne'ebe dada lia ho jornal ne'e ninia naran sei iha nafatin estrutura Pualaka ninian maske ninia labele ona halo servisu iha Pualaka. "Sei dehan sai lae karik tanba ami hare ba estrutura i ami mos halo servisu iha Pualaka ne'e ami hatene informasaun se mak iha prosentu barak no menus ami hatene" salenta nia. Zeca Alves hateten katak tuir estrutura no formasaun kompania pualaka rasik staf sira hatene katak se maka iha
por sentu barak liu no witua liu sira hatene. "Ami hatene estrutura tuir profile ami nia kompania ninian katak hakerek mos hela katak, "sr. Americo Lopez iha direitu 30%, Sr. Luis 30% no Sr. Joaõ Alves maka iha 40%, ne'e buat ne'ebe legal husi kontratu ne'ebe sira halo iha notariadu." Lia fuan ne'e konfirma husi dokumentus kompania pajinas tolu ne'e jornal ts hetan hatudu asinatura no paraf husi ema nain tolu husi kompania Pualaka ho direktur Notariadu Ministeiru
Justica ninian nu'udar notairadu firma: " pualaka petroleo Fuel, Lda" TIN: 1054954, maka defini iha artigu uluk liu nian hodi fo naran ba kompania ho " Pualaka petroleo feul, Lda". Wainhira kompania ne'e hahau ninia aktividades iha Janeiru 2008 staf sira ne'ebe agora dadaun ne'e hasai ona husi sira nia fungsaun, halao sira nia knar la ho salariu maibe servisu ho vulontariamente. To'o kompania ne'e konsege lao ona no foin lalais ne'e direktur kompania liu husi advogadu nain
rua lori surat ba sira no sei define nafatin katak Zito Alves nia pozisaun sei nudar manajer pon bensin. "Iha loron rua liu ba Sr. Americo, liu husi ninia advogadu nain rua ahh..lori surat ida mai ami, hau mos simu i hau nia pozusaun sei nafatin. Iha ne'eba hakerek dehan katak, Zito alves manajer pon bensin. Ne'ebe ha'u senti katak ha'u nia pozisaun sei nafatin." Maske nune'e kompania la simu Zito Alves ninia prezenca iha stasaun pualaka iha terenu hanesan Tibar ho Pon Bensin Luru Mata no la fo asesu bat au mina iha kareta. Kuandu kompania ho ninia direktur hasai duni staf sira ne'e maka sira sei ejiji sira nia direitu subsidiu se karik hasai duni ona sira husi Pualaka. "Se sai duni sira teki selu ami nia subsidiu." Zeca hateten katak sira nia parte konta subsidiu hahu husi sira nia servisu desde sira servisu ba kompania ne'e komesa husi NOl husi NOL BESAR to'o agora Pualaka komesa iha buat hot-hotu ona." Nune'e duni nia alega katak direktur kompania hatama ema foun ne'ebe ke uluk nungka halo servisu ba Pualaka hodi
tebe sai sira ne'e uluk ho sakrificiu hodi tane Pualaka nia naran sa'e ne'e. Kompania Pualaka hari'i husi Sr. Luis de oliviera iha tinan ruma liu ba ne'ebe ikus mai bolu hetan tan membru nain rua maka Joao Alves ho Americo Lopes hodi tau sociu hamutuk pualaka. Maske ho kbi'it osan
ladun iha maibe Kompania ne'e konsege sai hanesan vencedor ba fornecedor Mina ba Central EDTL Timor Leste iha tinan kotuk ne'ebe hamosu deskonfianca no kestaun LC husi Governu ho valor liu US$ juta tolu. Hanesan Vice Primeiru Ministru Ir. Mario Viegas Carrascalao ne'ebe iha momentu ne'eba sei hanesan membru Parlamentu Nasional husu atu iha investigasaun ba kestaun ne'e tan ba iha indikasaun, "Kon kali kon." Ho problemas entre nain sira husi kompania Pualaka mak ninia konsekuencia problemas trabaliadores sira ne'ebe hasai husi stasaun
Pualaka iha Tibar no Pon Bensin nian budu liu tiha ona semana rua "korban kan fali ami hanesan trabailiador sira ne'e. Staf ne'ebe husu jornal ne'e atu labele hakerek ninia identidade ne'e alega katak, "senyor Americo ne'e kom nia hanesan ministra ida nia laen bele loke fali kantor ida iha uma ministra ninian ne'eba." Ho lalaok loke kantor ida tan iha uma Direktur ninian ne'e maka "Pegawai sira iha ne'e terlantar tiha." Ho lian "kasar" karik kompania pualaka atu soran fali fungsionarius sira bele baku malu tan ba loke tiha kantor ida iha ne'eba hodi tau sira nia emar iha Pon bensin no tibar ne'eba be ema sira be uluk fou-foun hahu ne'e oin?" nia alega. Nune'e duni staf oan ne'e hatudu ninian neon diak hodi hateten katak, "Tuntutan lolos ne'e
maka sira nain tolu enki tur hamutuk resolve problema." Lolos ne'e problema ne'e besik resolve tiha ona maibe iha momentu dader ida fali grupu, "sr. Americo ninian hadau tiha tibar husi nain rua ne'e no Sr. Americo haruka ninia alin ba iha ne'eba hodi ba hasai mangeira husi roh ida seluk tau fali bar oh ida seluk sem kuinesimentu husi sira. Depois husu ba Sr…sira dehan ne'e…Ministra maka haruka. Agora kompania ne'e ministra mos iha direitu iha laran ne'e oin sa los?" nia alega ho husu. Tuir staff Pualaka ne'ebe halao nia knar iha Tibar ne'e hateten katak, problema ne'e mosu tanba Direktur Exekutivu Americo Lopez ne'ebe tau saham mos iha kompania pualaka ne'e deskonfia staf Pualaka mak halo kna'ar hanesan manejer iha Tibar ne'e naok mina no osan hodi sosa motor ba nia oan nu'udar staff mos iha pualaka. Wainhira jornal
ne'e ba kruza informasaun ne'e ho staf Joaõ Marcos Correa nudar manajer finansas iha Tibar ne'e los duni no sira tenta atu okupa pon bensin iha luru mata. Nia fo razaun katak sira, "atu okupa kompanha Pualaka tanba sira mos nudar staff kompanha Pualaka iha tinan 2008 fulan Juli to'o tinan 2009 ne'e sira halao buat hotu ho normal maibe agora xefi nain tolu ne'ebe tau saham hapara sira nia servisu," haktuir Joaõ Marcos ba jornal ne'e iha kompanha Pualaka
Comoro-Luru-Mata. Iha semana kotuk fungsionarius Pualaka ne'ebe hasai ona husi Tibar tenta atu okupa pon bensin Pualaka nian iha Luru Mata hodi obriga manajemen pualaka resolve sira nia problema. Hanesan Joao Marcos correa ne'ebe lakon mos ninia servisu iha Tibar hateten ba
jornal ne'e iha Pon bensin Pualaka Luru mata katak "Ami ejiji liu maka ami nia servisu no kantor ate a data, kantor mos rua fali ona, laos ida deit ona. Ida iha sr. Americo nia uma no ida iha kantor pusat nafatin I to'o agora la iha koalia kona ba ami nia kazu hapara ami ne'e oin sa, tan ba sa ami la hatene," dehan manajer financas ne'e iha pon Bensin Luru Mata. Tuir ninia hanoin katak problemas hapara sira nia servisu ne'e razaun lolos ne'e konsekuensia husi kudeta entre ema nain tolu ne'ebe sai nain ba kompania Pualaka maibe sira lakohi interven iha laran so nia husu atu parte manajemen resolve staf sira nia statutes, direitu de servisu ho salariu. Tuir staf ne'e konfesa katak se kuandu kompania la konsege resolve sira nia problema maka sira sei lori ba parte autoridade ne'ebe relevante ba kestaun trabailiadores ninian hodi husu aijuda. Nia hatutan katak problema ne'e mosu husi sira nain tolu mak hanesan Sr Americo Lopez ne'ebe
Ministra Justisa nia kaben, Joaõ Alves no Luiz Oliveira no karik problema ne'e husi mina ou buat seluk sira la bele hatene tanba atu hatene liu ne'e sira nain tolu. Ba fungsionarius sira ne'e hakarak koalia kona ba direitu salarial ne'ebe sira iha no hatene tanba sa mak hapara sira no oinsa ho sira nia salariu. Sira hakarak ejiji atu parte manajemen rezolve lalais atu sira hatene hodi bele buka fali servisu seluk, realsa manajer ne'e. Tuir nia katak saham ne'e sira nain tolu nian "ami hatene sira nain tolu nian, ikus mai problema ne'e mosu ami lakohi intervene iha laran, ami ejiji liu ami nia direitu no tan sa hapara ami la iha kuinesementu ate a data ami ba kantor laos ida deit ona maibe rua, ida iha Sr. americo nia uma, ida iha kantor pusat Audian nafatin" esplika nia. Joaõ Marcos mos ejiji ba xefi nain tolu ne'e atu rezolve staff sira nia problema se lae nia rasik sei levanta problema ne'e ba sindikato trabailiador iha ministeiru solidaridade nia mahon hodi kanaliza tutan ba parte ne'ebe kompetente inklui parlamentu nasional. Depois jornal ne'e dada lia ho Joaõ Marcos correa iha pertamina pualaka derepenti juven ida mai ho kamijola mean no hateten ba jornal ne'e atu la bele publika informasaun ne'ebe jornal ne'e hetan husi staf pualaka ho razaun katak kompanha Pualaka problema hela ho staf refere no staf refere la iha kompetensia atu kualia konaba Pualaka " imi jornalista la bele hatun informasaun husi sira tanba sira problema hela ho Pualaka no ami lakohi sira hatun Pualaka no sira la iha kompetensia atu koalia" hateten joven ne'ebe tau hela kamijola mean ne'e na jornal Tempo Semanal. Jornal ne'e husu karik direktur iha fatin servisu ninian nune'e jornal ne'e ninia jornalista bele hasoru maibe nia dehan la iha pon bensin maibe iha ninia residencia Bidau. Wainhira jornal ne'e tenta ba halo konfirma ho nain ida seluk husi kompania Pualaka hateten katak, "Tuir Akte notariadu iha Ministeiru justica ne'e hateten katak, hau iha 30 porsentu, Sr. Amerco iha 30 porsento no sr. Joao Alves iha 40 porsento. Ne'ebe agora ha'u ho Sr. Joao Hamutuk ami rua iha 70 porsento. Dasar hukumnya kuat sekali," fo sai Luis Oliviera. Maibe ate agora sira nia parte la involve iha hasai staf sira ne'e. "Jadi ami to'o agora la hanoin atu hasai pegawai sira ne'ebe uluk terus hamutuk to'o agora." "Maibe Sr. Americo tan ba hodi deit nia forca, lori deit nia ferik oan ministra I nia fen mos terlalu ikut campur iha laran," Luis Oliviera alega. Tuir manejer jeral Pualaka ne'e nia hakarak atu lei ne'e lao los katak, " bisnismen. Bisnismen, no pejabat Negara, pejabat Negara." Nune'e duni tuir fundador ba kompania Pualaka katak, " ami sei husu ba estadu para tenki halo tender ulang. Tenki hasai pualaka ne'e tan ba pualaka ne'e ami nian," nia husu. (diz/ico)
PNTL Simu Responsabilidade,
Khare Kontenti Sela Naha PNTL ba Xanana
Dili, Tempo Semanal
Tuir nota ba emprensa ne'ebe redasaun jornal ne'e simu hateten katak iha loron 27 Marsu 2009, Primeiru Ministru Kay Rala Xanana Gusmão no Reprezentante Espesiál Sekretáriu-Jerál Nasoins Unidas nian (RESJ), Atul Khare anuncia hamutuk katak PNTL husi distritu balun iha TL prontu simu hikas fali responsabilidade. Sira desidi katak simu fila fali responsabilidade ne'e sei hahú iha Distritu Lautém, tuir fali ho Distritu Manatuto. Simu filafali responsabilidade iha distritu rua ne'e sei depende ba iha konkluzaun akordu entre Governu Timor-Leste no Misaun Integradu Nasoins Unidas nian iha Timor-Leste (UNMIT) kona-ba prosesu simu filafali responsabilidade no kumpri ho prosedimentu sertifkasaun nian. 
Aranju prátiku sira ba simu filafali responsabilidade nian oras ne'e daudaun hala'o hela iha distritu rua ne'e. Iha nota emprensa ne'e mos informa katak avaliasaun sira mós kompleta tiha ona iha Aileu no Ainaro. Maibé, distritu rua ne'e sei rekere melloramentu molok distritu sira-ne'e deklaradu prontu atu simu filafali responsabilidade. Maibe tuir observsaun jornal ne'e ninian katak PNTL komunitariu iha area ne'eba halo servisu todan tebes ho sukat rai ho ain haleu sukus sira iha area ne'eba. Sira ladun iha transporte maibe UNPOL sira uza Prado hodi pasiar entre estrada dili ho aileu. "UNPOL sira servisu mes-mesak iha sira nia kuartu no ami dala ruma maka ba impresta sira nia komputador hodi hakerek ami nia surat," dehan komandante PNTL ba jornal ne'e iha Aileu momentu ruma liu ba. Primeiru Ministru Gusmão kongratula PNTL no simu akordu ne'e. "Ami sei hahu husi distritu rua (2) tamba prosesu ne'e lao neneik sei ba mos
distritu sira seluk bele halo tuir . Neduni ami husi estadu no governu maka tau kondisoens, nebe'e dehan iha duni fasilidade, lojistika rasik no komando sira mos iha preparasaun atu asumi lideransa", hateten Primeiru Ministru. "Ohin loron aniversario PNTL nian, ita hotu kontente tamba komemora ba sia (9) loron PNTL nian, katak ita iha esperansa ba polisia, maske infrenta problema oi-oin, sira mos hakat ona ba oin hodi kumpri didiak sira nia dever nudar polisia nebe
profisionalismo duni", hateten Primeiru Ministru Gusmão. Maske PM kontenti hahi UNPOL fo hikas fali responsabilidade ba PNTL maibe la hanesan ho komunidade husi distritu fatin moris Xanana ninian. Sira diskorda ho lia fuan ne'e tan ba iha moris lor-loron PNTL oan sira maka servisu dolar maske kondisaun menus. "Ha'u hanoin ne'e teatru ida deit. Tan lia fuan transferencia de poderes husi UNPOL ba fali PNTL oan sira ne'e maka halo ha'u konfuzaun. Se hakarak hatene realidade UNPOL mai so hatene simu vencimentu bo'ot, perdiem wain maibe lalaok laek tan sira servisu mes-mesak ho kondisaun ne'ebe diak husik PNTL oan sira maka servisu dola konsege tau seguranca mai iha ami," dehan abel soares jovens ida husi Manatutu ba jornal ne'e iha sabadu(26/03) iha manatutu vila. Tuir foin sa'e ne'e ninia hanoin katak se UNPOL mak apoiu tebes PNTL entaun sira mos tenki preokupa ho kondisaun servisu PNTL iha fatin ne'eba ninian. Desde akordu suplemetar entre governu Timor Leste UNMIT iha dezembru 2006 PNTL horik iha kalilin okos UNPOL ninian maibe postu central manatutu deit mos ninia kakuluk la taka hodi autoriza udan ho loron tama let ba uma servisu fatin PNTL distritu ne'e ninian. "PNTL ne'ebé hahú atu asumi responsabilidade tomak ba polisiamentu sai nu'udar pasu ida tuir mai iha esforsu katak estabilidade ida-ne'e sai sustentavel iha tempu naruk," dehan RSSG
Atul Khare ulun bo'ot UNMIT ninian. Khare sauda tebes Governu ho UNMIT wainhira alkansa tiha ona desizaun atu PNTL oan sira simu hikas fali sira nia responsabilidade policiamentu iha Manatutu inklui mos Lautem. Maibe PNTL ne'ebe halao sira nia knar iha manatutu sei horik iha kuran meus balun hodi apoiu sira nia servisu hanesan radio komunikasaun hodi empata ligasaun entre distritu ho sub-distritus sira iha area ne'e. "Dala ruma iha situasaun urjenti ami husu apoiu ba uzu radio servisu Saude ninian," konta tuir pntl ne'ebe servisu iha sub-distritu ida iha Distritu refere. DR. Khare hahi tebes situasaun seguranca Timor leste ne'ebe hahu konduxivu dadaun fali hodi hateten, "Timor-Leste foti tiha ona pasu sira ne'ebé boot iha fulan 12 liubá hodi restaura
estabilidade." Maibe Agusto da Costa Pinto vendedor ida iha Merkadu Komoro dehan ho sinista, "hato'o hela ha'u nia parabems ba sr. SRSG ne'e tan ba konsege ona akordu ida tan iha surat tahan leten." Maske foin iha muda negociante ne'ebe fa'an folin besik dalan ninin Da costa
Pinto moris iha distritu baucau ne'e senti laran moras ho instituisaun PNTL maibe, "ha'u tur hodi hanoin ho didiak katak sira ne'e mesak ita nia maun alin no sira merese apoiu husi ita." Governu Timor-Leste no UNMIT konkorda tiha ona katak simu filafali responsabilidade ne'e sei
sai prosesu ida hala'o ho faze, ne'ebé bazeia ba iha avaliasaun konjunta ida kona-ba preparasaun PNTL nian, tuir kritéria ne'ebé konkorda mutualmente. Polísia ONU nian sei kontinua hela iha distritu sira ne'ebé PNTL asumi tiha ona responsabilidade hodi fornese konsellu no atu monitoriza PNTL, inklui iha área protesaun direitus umanus nian. Tuir mane ne'ebe mai husi rai kulu tunu maka dadaun ne'e fa'an hela folin iha merkadu ne'eba hateten katak nia mos akompainya problemas mundu dadaun ne'e wituan. Tan ne'e nia hein katak, "Se UNPOL
sira ne'e maka sei hetan oportunidade atu hela kleur liu tan, ne'e diak oan ida tan ba UNMIT no ha'u mos kontenti. Tan ha'u lakohi krizi financeiru mundial ne'e bele halo UNPOL oan sira ne'e balun lakon sira nia servisu no se sira fila sedu husi Timor Leste maka sira sei lakon mos oportunidade atu ba pasiar iha Bali," Pinto kari biadas ba ONU nia matan. "Mai ha'u katak PNTL oan sira ne'e halo servisu diak liu fali UNPOL nune'e duni husu deit ba ministru Seguranca hadia facilidade no kondisaun naton ona," lia espera vendedor oan ne'e. (ts)
