Tuesday, 3 November 2009

Investidór internasionál Kuda osan Kuda moos Moras ba Meiu Ambiente iha TL

Tempo Semanal Edisaun 163 2 Nov 2009



Tasi Timor daudaun ne'e hetan ameasa estraga husi kompañia Monara ne'ebé sira nia mina nakfakar dezde fulan Agostu tinan ne'e iha parte súl no ezijénsia husi kompañia malaysia atu hahú konstrui otél pelican Paradise ne'ebé halo ema balun preokupadu ho posu sintina tasi tolu sei sulin ba hamate korál no ikan iha parte norte tasi Timor ninian.





Iha fulan Maiu Ekipa boot ida mai iha Timor Leste ne'ebé kompostu husi grupu investimentu ho Grupu relijioza ninian. Grupu rua ne'e vizita Dili, Vikeke, Kom ho Tasi tolu. Ekipa Investidór to'o iha Dili halo enkontru ho autoridade iha Dili no asina ona akordu ida hodi nune'e rai estadu iha estatua amu Bapa Joao Paulo II ninia sorin ba Loro Monu sai ona Propriedade Privadu hodi harii otél Perican Paradise. Nune'e duni foin lalais liu kompañia ne'e notifika ona ba kompañia sira ne'ebé servisu lori fo'er sintina ho fo'er sira seluk ba soe iha tanke área ne'ebá atu hamamuk fatin ne'e. “Ne'e husi kompañia ida ne'ebé agora atu loke daudaun iha ne'e. Nia maka hateten hanesan ne'e. Foo surat ida maibé iha surat ne'e la iha asina husi Governu ka karimbu Governu nian moos la iha. Ne'e maka ami hakarak atu husu loloos ne'e haruka atu taka ne'e, husi Governu ka agora daudauk pelican Paradise ne'e?”


Dehan Melco Gonçalves, operadór tanke fo'er ida husi kompañia Anteater ne'ebé hamamuk fo'er husi ninia tanke iha loron kinta semana kotuk.

Nia hatutan katak maiske nune'e sira rasik sei konfuzaun hela tan ba to'o agora lahatene fatin ne'ebé Governu a loka fali ba fo'er ninian. “Ami seidauk hatene ida ne'e maibé foin daudauk kompañia ne'e haruka surat ida mai ami. Ami seidauk hatene atu soe loos iha ne'ebé? Hodi bainhira sira foo ami prazu loron 31 maibé to'o ida ne'e ami seidauk hatene soe fali iha fatin ne'ebé.

Fo'er sintina no bee fo'er sira ne'e mai husi otél, fatin ONU ninian iha Dili, Ermera ho Manatutu. “Fo'er UN sira nian labele soe arbiru iha ema nia fatin entaun tula hotu mai iha ne'e.”

Iha entre liurón boot ho posu prosesa fo'er sintina sira ne'e rai kuak kanu foun ke'e ona maibé jornál ne'e la konsege konfirma ninia objetividade. “Maun, ha'u rona ne'e atu halo bee dalan,” dehan Vitor Soares populasaun ida husi tasi tolu ne'ebe la'o liu husi fatin ne'ebá.


Tuir informasaun ne'ebé jornál ne'e simu husi fonte s balun iha UNMIT Kaikoli dehan relatóriu UNPOL ninian ida deskonfia katak dala ruma kona lixu ne'e sei transfere fali ba tasi mak besik hela iha liman loos bainhira husi diresaun Dili ba. UNMIT parte meiu ambiente nian preokupadu tebes ho situasaun ida ne'e no tenta atu ko'alia ho parte relevante ba asuntu refere.

Fatin prosesa fo'er sintina no restu husi materiál kímiku hanesan restu óleu fo'er ho bateria been iha tasi tolu lakleur tan tenke hamamuk hodi harii otél fitun lima Perican Paradise ne'ebé na'in husi ema malaysia ida.


Tuir relatóriu interna ida ne'ebé jornál ne'e asesu ba husi website hateten katak Datuk Edward Ong iha relasaun ne'ebé besik liu ba Igreja Evangelista Metodolojista iha Asia no misionáriu sira iha Timor Leste. “Ami hamriik iha foho ida nia leten hodi hateke ba rai rohan rua no hanoin katak ami rai sira ne'e fizikamente. Ami husu ba Na'i Maromak hodi hatudu mai ami ninia espíritu kona ba potensialidade rai rua ne'e ninian. Ami hahú husu Maromak ninia bensan no favoravel ba planu Datuk Edward ninian, “hakerek iha nota atividade grupu Edward ninian ne'ebé publika iha website.

Nu'udar nasaun ne'ebé ninia númeru dezempregu boot no populasaun moris iha mukit ninia kolonizasaun maka Governu loke ona kurtina nasaun ninian ba investidór sira atu kuda sira nia osan hodi bele halo mudansa ba situasaun ne'e. Ha'u konkorda atu governu bolu investidór mai iha TL. Balun kontribui duni ba dezenvolvimentu ekonomia maibé barak moos mai uza ita nia inosente hodi la respeitu ita nia kultura, viola lei arendamentu hanesan otél balun la selu arrendatariu to'o halai de'it nune'e Governu tenke hatene ema sira ne'e ninia latar belakang antes foo fiar ba sira, “Dehan manuel dos Santos Estudante Universidade ida iha Dili.


Estudante ne'e hatutan katak Tasi Timor daudaun ne'e hafoer husi mina ho óleu mak nakfera husi kompañia operadór mina no gás Monara iha parte súl maiske Sekretáriu Estadu Meiu Ambiente dehan distancia dook maibé tasi ninia baliza la didin ho moru ruma. Husi parte norte bele mosu problema boot seluk kuandu fo'er sintina no fo'er obriga soe tama ba tasi laran tan ba interese kompañia pelican paradise ne'e sei estraga fali akordu Triangel Koral ne'ebé foin lalais ne'e asina husi nasaun neen iha maiu tinan ne'e iha manado indonézia. Karik Governu la evita no mosu estragu s ba ahu ruin sira maka maka ema sei duvida s ita nia asinatura iha CTI ho nasaun lima seluk.” Iha Setembru 1999 karreta ida sunu mutuk ho ema Timor oan lubun ruma no hafoin de ukun rasik an sai hanesan treina tiru fatin ba Forsa da pás ho PNTL sira.


Bee fo'er ne'ebé sulin husi kanu parte leste tama husi estrada okos hodi sulin daudaun tama ba kahur ho tasi been ne'ebé halo preokupadu ba ema sira ne'ebé hala'o atividade nani iha tasi ne'ebá. Tuir informasaun husi kompañia nani tasi ninian balun dehan ema turista husi Austrália gosta liu nani tasi iha fatin ne'ebá tan bele haree riku tasi hanesan korál ho ikan ne'ebé konfirmandu ona hamutuk oin haat nulu resin neen. “Ema liu-liu labarik sira ne'ebé hariis besik fatin ne'e bele hetan moras no ikan ne'ebé kaer iha fatin refere bele moos foo impaktu la di'ak ba ema nia saúde,” dehan espesialista ba nani tasi nian ida ne'ebé hatudu letratu animal oin-oin maka sira konsege hasai letratu iha tasi tasi tolu nian. Maibé sekretáriu Estadu Meiu Ambiente hateten katak bee uitoan maka sulin tama ba tasi ladún foo impaktu importante atu halo koordenasaun hodi nune'e polimika ne'e labele empata fali investimentu no dezenvolvimentu nasionál.


Bainhira jornál ne'e husu ba Sekretáriu Estadu Meiu Ambiente kona dezenvolvimentu situasaun Tasi Tolu Sr. Abilio Lima hateten katak iha semana kotuk nia haruka ona ninia diretór ida ba konfirma lala'ok iha fatin ne'ebá. “Hodi seik ha'u haruka ona diretór ida ba haree iha ne'ebá Kerdizér transaksaun la sai to'o tasi, nia mai haree bee maran hela nune'e restu ne'e maka sai uitoan uitoan iha ne'eba,” dehan Sekretáriu Estadu Sr. Abilio Lima ba jornál ne'e (01/11) via telemovel.


Sekretáriu Lima promete katak hafoin de finadu ne'e nia sei haruka ninia emar atu ba tau atensaun ba lala'ok ne'e. No importante liu tan ninia parte moos halo kontaktu kompañia ne'ebé sei hala'o konstrusaun otél ne'e atu haree. “O ke certu ita kontaktu ona ho kompañia paradise atu haree buat ne'e,” dehan Lima.


Kona alegasaun bee dalan foun Sekretáriu Lima dehan, “Parese ke sira atu tau aliserse ruma iha ne'ebá.”


Fatin refere entrega ona ba Pelican Paradise nune'e Abilio Lima foo anin kmanek no promete ba ikan ho ahu ruin ka korál oan sira ne'e horik iha área ne'ebá katak sira iha koordenasaun ho staf atu fo'er ne'e sei la soe ba tasi laran. “Ida ne'e, iha koordenasaun ho staf. So depois hetan ona fatin ida be atu hasai fo'er ne'ebá mak foin hasai husi ne'ebá,” Lima hateten.


Kona ba prazu ne'ebé foo husi kompañia atu hamamuk fatin Refere Lima hateten katak, “Presiza koordenasaun entre ministeriál sira ne'e tan ba kontratu paradise ne'e ho Primeiru Ministru rasik. Tan ba ne'e iha relasaun servisu entre Ekonomia dezenvolvimentu, Turizmu ho komérsiu, Infraestrutura atu nune'e husi parte governu nian ne'e bele iha intervensaun ida ke di'ak atu bele fasilita kompañia ne'e hala'o ninia servisu ne'e di'ak. Ne'ebé ha'u sente katak importante iha ne'ebé koordenasaun. Karik buat ruma la'o ladún di'ak tan ba problema koordenasaun,” esplika Lima.


Pelican Paradise taka tiha ona kuadru boot ida iha fatin ne'ebá no du'ut ho ai oan sira lere moos hotu ona hein de'it atu halo konstrusaun ba otél ho kuartu liu atus tolu no fatin joga golfu ninian ne'ebé sei gasta liu osan hamutuk millaun 200 resin.


Tempo Semanal sei halo kovertura klean liu tan kona ba Pelican Paradise ho kazu ambiental iha edisaun tuir mai. Favor ida sani nafatin jornál ne'e.

1 comment:

Dasilaku said...

Sewage ponuds iha tasi tolu ne la foverese ona ba ambiente iha area ne ba, diak liu governu AMP tengki hanoin hodi buka fali fatin seluk, no halao konstrusaun foun ba asuntus importante ne. HAre ba konstrusaun fisiku infrastrutura fatin ne at hotu ona, e fungsaun original tuir design prinsipiu la fungsiona tiha ona desde 2002. so taka tiha deit fatin ne diak liu, e halao konstrusaun foun iha fatin seluk ne be dok tebes husi tasi ibun, e tengki iha mos stagem ba trata be foer hirak ne antis husik sulin be tasi. Sekretari de Istadu ladun koresponde diak ho problema aktual ne be akontese tan laiha dadus sufisiente husi staf sira kona ba risku ne be mosu husi sewagr pounds ida ne..hau hanoin diak liu taka tiha deit ona, no buka fatin seluk, e hari kontsrusaun foun ida diak liu tan ida agora ne...