KM Hamonu sentenca Kontra Arte Marsiais Maibe PNTL ninia Boot hatais mos Hatais Farda Arte Marsiais

Konsellu Ministru hala’o Sorumutu Estraordinária iha Kinta-feira ne’e, loron 22 fulan Dezembru tinan 2011, iha sala Sorumutu Konsellu Ministru, Palásiu Governu Dili no aprova ona: Medida hirak ne’ebé destinada hodi garante ordem públika no Seguransa Interna País nian, "Deklara iha komunikadu de imprensa nebe jornal nee asesu.

Nota ba imprensa nee hatutan, "Haree ba insidente daudaun ne’ebé envolve grupu arte- marsiál, iha Dili no distritu sira seluk- hanesan iha Zumalai/Suai-Covalima, Ainaro no Lautém- ne’ebé provoca distúrbiu sériu hanesan estraga sasan, mate no kanek, Konsellu Ministru rona Komandante Distritál Dili, Polísia Nasionál Timor-Leste (PNTL), Pedro Belo, no Komisáriu PNTL, Afonso de Jesus ne’ebé aprezenta relatóriu detalla ida kona-ba situasaun seguransa interna País nian."

Konfrontasaun entre grupu arte marsiais ne'e la'os mosu deit iha tinan nee maibe mosu fila2 dezde TL ukun an.

Governu foo lembra katak, "Maski halo beibeik deklarasaun ba kompromisu sira, husi reprezentante diresaun grupu arte-marsiál sira oioin, atu salva guarda respeitu ba prinsípiu konvivénsia sosiál, hodi asina ona dokumentu ida ne’ebé husi nível aas nian, iha fulan Maiu tinan 2011, ne’ebé mak grupu sira halo tiha juramentu atu kontribui ba ambiente pás no estabilidade iha País, verifika katak iha nafatin violasaun sistemátika ida ba akordu ida ne’e."

Iha okaziaun hanesan Konsellu Ministru ne'ebe lidera direitamente husi PM Xanana Gusmao ne'e mós dehan, "analiza efeitu negativu husi joga bola guling no lataria, ne’ebé mak afeta bem- estar sosiál no halakon virtude valór morál no étiku foin sa’e no família sira nian, hodi kontribui ba violénsia, mak hanesan violénsia doméstika, no liu-liu ba sosiedade tomak la hetan hakmatek."

"Iha sentidu ne’e, ho Natal, Tinan Foun no Eleisaun ba tinan 2012 hakbesik daudaun, IV Governu Konstitusionál konsidera urjente hodi foti medida ne’ebé adekuada hodi garante seguransa no bem-estar ba populasaun."

"Nune’e Konsellu Ministru, liu husi análize ida ne’ebé klean kona-ba relatóriu ne’ebé hato’o husi Komando Jerál PNTL nian, rezolve suspende to’o loron 21 fulan Dezembru tinan 2012, autorizasaun ba prátika atividade hotu-hotu grupu arte marsiál sira nian ne’ebé hetan prova katak provoka dsitúrbiu, violénsia no krime, inklui proibisaun treinu no prátika arte-marsiál sira, nune’e mós obrigasaun absoluta atu labele halo mobilizasaun ba ema sira hodi tama iha grupu sira ne’ebé mak pratika arte marsiál sira. Suspensaun ida ne’e sei renova fali iha periódu sira ne’ebé hanesan tinan ida nian kontra grupu hotu-hotu ne’ebé mak viola medida suspensaun ba prátika arte-marsiál sira."

Iha foto grafia balun ne'ebe mosu iha publiku hatudu momoos ulun boot PNTL ninian hatais hela farda Arte marsiais ida ne'ebe sempre involve iha konfrontasaun. Tuir fontes jornal nee katak foto ne'e atu entrega ba ulun boot governu ninian. 

"Sei aplika “ toleránsia zero” ba membru PNTL no F-FDTL sira hotu ne’ebé partisipa iha atividade grupu arte marsiál sira nian, sira sei hetan aplikasaun ba sansaun displinár, inklui demisaun instituisaun nian rasik, tuir termu lei orgánika no estatutu disiplinár sira," KM ameasa.

"Ha'u hanoin ne'e dala ida tan hanesan gertakan ida. Se karik Governu seriu entaun kaer uluk mak boot sira ne'ebe hatais farda arte marsiais ninian," dehan estudante UNTL ida nebe husu atu labele publika ninia naran.

Liu tan nia sadik PM ninia beran hodi dehan, "se PM promete no barani atu hasai komandante PNTL ne'e entaun ami sei buka meus aprezenta fotografia ne'e ba avo PM."

Antes tama Natal mosu konfrontasaun entre grupu balun iha jogu bola guling iha hotel Luz Clarita ninia oin ne'ebe rezulta ema balun hetan kanek tan ba sona no estragus ba motor nune'e governu repete hikas ameasas ne'ebe halo ona iha fulan hirak kotuk ba hodi dehan, "Konsellu Ministru rezolve ona hodi impede mós jogu bola guling no lotaria iha teritóriu Nasionál Timor- Leste hahú husi loron 22 fulan Dezembru tinan 2011."

"Iha fatin públiku ka privadu, ne’ebé hala’o prátika atividade ne’ebé halo parte rezolusaun ida ne’e sei taka kedas. Sei revoga fali áktu hotu-hotu ne’ebé hetan lisensa ka autorizasaun prátika atividade ne’ebé halo parte iha dekretu-lei ida ne’e."