Tempo Semanal Edisaun 111

Lucia Haruka "Surat Sakti" ba PNTL
Deskonfia Husu Projetu Fardamentu
Dili, Tempo Semanal
Iha loron 14 Abril 2008, Sra Lucia Maria Brandao Lobato ninia kargu Ministra da Justisa RDTL, regista iha Diresaun Nasional da Administrasaun, Gabinete Adjuntu Comandante Geral da Administrasaun Polisia Nasional Timor Leste (PNTL), ho numeru registo 980, asuntu Registu Negosiu.

Iha asuntu ida nee, deskonfia Ministra Justisa husu ba Gabinete Adjuntu Comandante Geral da Administrasaun PNTL, atu legaliza kompania LIVRARIA MAU-HURAN hodi kaer projetu fornese fardamentu ba PNTL. Iha nota de re-ensamentu hakerek; de Ministra da Justisa RDTL para Se Adj. Comand. Geral Adm. da PNTL, data de entrada 14-04-'08, numeru registu 980, assuntu registu negosius. Iha nota nee nia kotuk, anexa sertidaun de registu no sertidaun de dividas kompania LIVRARIA MAU-HURAN, UNIPESOAL Lda. nebe partense ka nain maka Americo Luis Lourenco hanesan Ministra Justisa nia laen. "husu ba Adjuntu Comandante Geral Administrasaun PNTL atu loke konkursu ba publiku konaba fornesementu farda ba PNTL no hau sugere atu Adjuntu Komandante labele uza kompania LIVRARIA MAU-HURAN atu fornese
fardamentu ba PNTL tanba bazeia ba regulamentu UNTAET no. 2002/04, kompania LIVRARIA MAU-HURAN laiha direitu atu fornese farda ba PNTL tanba kompania nee registu hanesan Kompanha Importasaun e Fornesementu Ekipamentus Elektronikus laos alfateria", dehan Asistente Konsileira Legal, Gabinete Inspesaun PNTL, Maria da Graca de Sousa Fernandes iha ninia rekomendasaun ba Sekretariu Estadu Seguransa, Franciso da Costa Guterres, hodi husu Sekretariu Estadu labele uza kompania LIVRARIA MAU-HURAN iha projetu ida nee. Rekomendasaun hanesan hatoo mos husi Diretor Prokuramentu Nasional
Francisco C. Soares. Tuir Diretor nee, kompania LIVRARIA MAU-HURAN laiha espesialisasi iha area alfateria tanba iha sertidaun re registu, kompania LIVRARIA MAU-HURAN regista nudar kompania importasaun i fornesementu de ekipamentu elektronikus. Nee hatudu katak, kompania LIVRARIA MAU-HURAN la kondis ho projetu fardamentu PNTL. Tanba nee, Francisco Soares hateten iha indikasaun konflitu de interese nebe regula iha artigu 32 dekretu lei 10/2005. Husi parte seluk, Asistente Konsileira Legal, Gabinete Inspesaun PNTL, Maria da Graca de Sousa hakerek iha ninia karta observasaun katak, iha loron 10/04/2007 konkursu publiku konaba projetu foprnesementu fardamentu ba PNTL hahu loke. Iha tempu neba, Ministeriu Interior proposta kompania Kingstar (Holding) Co. Ltd. Ba projetu fornesementu fardamentu ba PNTL tanba tuir ministeriu nia haree kompania nee iha ona esperiensia fornesementu fardamentu ba PNTL iha tinan 2002. Nunee iha loron 5 Junho 2007, kompania Kingstar asina kontratu ho guvernu Timor Leste hu numeru kontratu RDTL-07-06-308-C-0206, ho PO Nu. 74119,74114,75121 no 74118 liuhusi aprovizionamentu sentralizadu.
Hafoin asina tiha kontratu, iha loron 6 Junho 2007, kompania Kingstar simu ezemplu farda husi PNTL ho karta offisiu Nu. 360/Dep.F.O/VI/2007 konaba atu fornese fardamentu tuir ezemplu no iha fornesementu farda primeiru, PNTL simu no uza tiha ona fradamentu nebe
fornese husi kompania Kingstar. Wainhira PNTL uza tiha ona farda hirak nee, ikus mai PNTL derije karta official ida atraves Gabinete de Sekretariu du Estadu da Seguransa ho Nu. 4/GSES/01/2008 konaba rejeitasaun fardamentu sem koalidade, datadu 11 Janeiru 2008 nebe ninia rejultadu inspesaun hatoo mos ba Gabinete Primeiru Ministru. Bazeia ba relatoriu husi Gabinete Inspektor Geral Nu.02/GIG/APTL/2008 konaba "averiguasaun para sertifikar a kualidade du fardamentu da PNTL" maka iha loron 28/02/2008 inspektor hatoo gestaun ida
katak, PNTL la konkorda ho fardamentu nebe fornese husi kompania Kingstar tanba farda laiha koalidade no PNTL rekomenda fali kompania LIVRARIA MAU-HURAN atu fornese fardamentu foun ba PNTL liu husi modelu single source ka uniku fornesedor. Relasiona ho problema iha leten, Asistente Konsileira Legal, Gabinete Inspesaun PNTL, Maria da Graca de Sousa rekomenda pontus importante rua ba Sekretariu do Estadu de Siguransa, Francisco Guterres katak, guvernu tenki halo pagamentu ba kompania Kingstar no kompania nee kontinua si
fornesedior fardamentu ba PNTL tuir kontratu nebe halo tiha ona. Tanba kompania Kingstar fornese farda bazeia ba ezemplu nebe PNTL rasik mak fo. Iha fornesementu primeiru, PNTL la halo kauza konaba koalidade fardamentu, maibe tanba sa agora halo kauza wainhira PNTL uza tiha ona farda balu. Ida nee hatudu katak, Departementu ou Seksaun Legislasaun Logistika da Unidade de Gastaun iha PNTL nia laran la halo sira nia servisu ho diak. Signifika katak, wainhira simu sasan la halo inspesaun ba sasan bazeia ba rekizisaun no mos kontratu nebe halo ona entre kompania ho guvernu liu husi aprovizionamentu. Iha rekomendasaun tuir mai, Asistente Konsileira Legal nee husu ba Adjuntu Komandante Geral Administrasaun PNTL, Hermenegildo da Cruz atu loke konkursu ba publiku konaba fornesementu farda ba PNTL i sugere atu labele
uza kompania LIVRARIA MAU-HURAN tanba bazeia ba Regulamentu UNTAET no.
2002/04, kompania LIVRARIA MAU-HURAN laiha direitu atu fornese fardamentu ba
PNTL tanba nia registu nudar kompania Importasaun i fornesementu de ekipamentus elektronikus, dehan Maria da Graca. Husi parte Ministeriu Finansas nian, Diretor Prokurament Nasional, Francisco C. Soares hatoo ninia rekomendasaun katak, PNTL tenki halo pagamentu ba kompania hanesan Kingstar, Bravo Internasional no Taurus Catering, sasan hirak nebe fornese husi fornesedor, PNTL uza tiha ona. Francisco rekomenda mos ba PNTL atu halo investigasaun profundu ba iha PNTL rasik, liu-liu iha area Administrasaun ni Finansas nian bazeia ba artigu 4 Dekretu Lei Nu. 12/2005. Liutan Diretor Prokurament nee hateten, kompania LIVRARIA MAU-HURAN laiha espesialisasi iha area alfeteria, tanba iha sertidaun re registu, kompania LIVRARIA MAU-HURAN regista nudar kompania importasaun i fornesementu de ekipamentu elektronikus. Nee hatudu katak, kompania LIVRARIA MAU-HURAN la kondis ho projetu fardamentu PNTL. Tanba nee, Francisco Soares hateten iha indikasaun konflitu de interese nebe regula iha artigu 32 dekretu lei 10/2005. Rekomendasaun ida nee cc mos ba Primeiru Ministru, Kay Rala Xanana Gusmao, Ministra Finansas Emilia Pires, Gabinete Inspektor Geral no Gabinete Inspesaun PNTL nian. Too notisia nee ami hatun, ami tenta kontaktu via telemovel ho parte komunikasaun Ministra Justisa nian atu halo intervista ho Ministra maibe laiha resposta. Informasaun ikus nebe ami rona hateten katak, Ministra Justisa Lucia Maria Brandao Lobato sei halo vizita ba estrangeirus. Hakarak fo hatene deit ba leitor sira katak, Ministra Justisa rezeita
totalmente i deklara atu la halo intervista ho jornal TEMPO SEMANAL iha koalker tempu, relasiona ho notisia indikasaun KKN hasoru Ministra Justisa nebe jornal nee publika iha edisaun hirak liuba. (aro)

PNTL Kansela Kontratu ho Kompania Mau-Huran
Dili, Tempo Semanal

Polisia Nasional Timor Leste (PNTL), konsege salva sira nia Institusaun husi mal administrasaun, kolusaun no nepotismu, nebe iha risku boot atu mosu iha institusaun nee relasiona ho projetu fornesementu fardamentu ba PNTL. "ami kansela tiha kontratu tanba lei la fo dalan", dehan Sekretariu Estadu Siguransa, Francisco Guterres ba jornal nee iha nia knar fatin Kaikoli Dili, Sesta-feira (31/10). Liutan, Francisco hatutan katak, nia simu ona rekomendasaun balu husi aprovizionamentu sentral nebe husu atu PNTL halo kanselamentu ba kompania
LIVRARIA MAU-HURAN tanba kompania nee laiha espesialisasi iha area alfeteria. "aprovizionamentu fó hatene kedas ba hau konaba prosesu ida nee. Tanba nee se ami avansa ba oin ho kontratu ne'e, kerdizer ami viola ona rejimentu, maibe tanba ami lakohi viola rejimentu, entaun ami kansela kedan kontratu ho kompania LIVRARIA MAU-HURAN", dehan Francisco. Oras nee, iha ona kompania ida mak prepara hela fardamentu ba PNTL, nebe besik remata ona, hela deit Enclave-Oecusse ho Sub-distritu Atauro mak seidauk hotu, maibe Sekretariu Estadu Seguransa nee la lembra ona kompania nebe mak sai fornesedor fardamentu ba PNTL. "hau la koinese didiak kompainia nebe mak manan, so aprovizionamentu Sentral mak hatene", katak nia. Konaba karik nia simu rekomendasaun balu husi Ministra Justisa, Sekretariu Estadu Seguransa nee rezeita katak, nia deskoinese karta husi Ministra Justisa. "Hau deskoinese karta Ministra Justisa no hau la simu karta ida. Altura neba PNTL mak propoint kompania Mau-Huran atu atende nesesidade urjenti tanba altura ne'e Operasaun Komandu Konjunta (KOK), ne'ebe farda la iha ona entaun sira buka tun buka sae no sira ba hetan kompania ida, katak kompania ne'e bele atende lalais iha semana rua nia laran. Mais depois proposta mai liu husi ami no teknikamente komu sira konkore katak bele mai mais to'o aproviozionametu labele tanba aproviozionamentu Sentral la simu tanba kompainia la iha kulifikasaun atu halao "pengadaan" farda iha kompainia kulifikasaun deit ba iha "percetakan" karik tanba ne'e sira fó fali relatoriu no prontu ami kansela fali no karta mos ami hato'o tiha ba PM no kualia tiha ona, tanba ne'e ami kansela kompania ne'e tanba kompania nee laiha duni kualifikasaun", dehan nia. (oda/tov)