Tempo Semanal Edisaun 112

Projektu BI Viola Lei 10/2005 no halo klean Alegasaun KKN

Tuir surat husi Ministeiru Financas, serviscos de aprovisionamentu ho numero ref. 623/MdF/DNSA/V/2008, ne'ebe diriji ba director PT. Global Teknologi Enterprindo, kona ba projektu Ministeiru Justica ba halo bileti de identidade Nasional Timor Leste sai polimika tan ba to'o agora la publika ba publiku.

"RDTL iha intensaun atu entrega ba ita nia kompainya ho pisang ho valor US$536,000.00, kona ba projetu atu dezenvolve kartaun identidade Nasional ba Guvernu Timor Leste," hakerek iha surat ne'ebe hasai husi parte aprovisionamentu iha loron 30/05/08 ne'e.

Iha surat ne'ebe asina husi Direktur aprovisionamentu no karimbadu ne'e husu ba kompainya refere atu tau bank security ho durasaun vale to'o 31/12/2008 mos inklui periodu kontraktual. "Ita tenki entrega mai gabinete ida ne'e surat ida ne'ebe garantia katak it abele halo duni obra ida ne'e, ho valor la menus husi US$53,600.00 husi ita nia banko ba Unidade Prokurament RDTL nian," hakerek iha surat intensaun fo projektu ne'e. Antes de surat ne'e aprovisionamentu hakerek surat de intensaun ne'e, iha loron 09/05/2008 sms ida husi ministra ninia kaben via 7374XXX hodi informa kona ba numero telemovel emprezariu internasional balun ne'ebe vizita hela mai dili. "Roger no. 7402071," dehan iha sms ne'eba. Roger W. Fairbaim visit mai Dili dala lubun ruma hodi koalia kona ba projektu halo bileti de identidade ba Timor Leste. Wainhira Jornalista Jornal ne'e hetan Sr. Roger iha Hotel ida iha Dili nia haklaken katak nia kontenti atu servisu hamutuk ho Guvernu TL liu-liu Ministeiru Justica, sei kolabora ho parte Igreija.

Kompainya ne'ebe ajuda MJ halo ka sosa fardamentu ba gurada Prizionais sira, afinal sei iha relasaun ho Roger Fairbairn ne'ebe tenta atu manan projetu miloens de dollar husi projetu Demografi mas nia tenta atu husu impresta osan husi Ministra Justica ho ninia kaben atu rejista ninia kompainya iha TL hanesan ninia staf Awie hakerek iha ninia SMS iha loron 09-05-2008. "sra, sr. americo, antes de tudo husu deskulba uluk, dadaun roger la iha ona osan iha TL, karik sr bele ajuda uluk lai orsida ha'u selu fali ba sr,." Awie sms ba ministra. Iha SMS ne'eba mos Awie inklui SMS mak Roger haruka ba nia hodi husu osan halao ninia atividades iha Dili. "ne'e sms husi Roger : Awie, ha'u sei presiza US$ 1,000 atu completa hodi rejistu kompainya no kustus
administrasaun sira seluk ba loron ida ohin 1) Tradusaun ba dokumentus sira 2) selu ba guvernu 3) loke konta bankaria. Roger," Awie kopia SMS Roger iha lian Ingles ba Ministra Lobato.
Iha loron 09-05-2008 awie liu husi numeru telemovel +628179991XXX hodi fo agradecimentu ba Ministra, "Origadu barak ba sra..deskulba obrigatoriamente inkomoda tebes sra. Awie."
Troka sms entre Ministra Justica ho PT. Global Teknologi Enterprindo ninia emar sira ne'ebe rejista entre maiu ate juliu kona ba projektu husi Ministeiru Justica ne'e hamosu deskonfianca no alegasaun ba favoritisme no koluiu.

Iha loro kraik loron (09/05) Sms ida mai tan husi Awie ba ministra Justica hodi informa katak, "Sr. Suardi ohin husu atu hato'o ninia despedida ba sra. atu fila ba Jkt. Nia to'o ona iha Bali no depois nia cek ba gabinete afinal Email Sra nian kona ba KONTRATU promesa ho Departamentu Financas seidauk iha sra. Husu ita nia ajuda tan ba nia tenki hato'o relatoriu progresu ne'e ba
P. TW (ne'e ema nia naran) satan agora ema husu nia atu remata lalais servisu ne'e. Deskulba senhora, sebele favor ida email lai ba sr. Suardi. Deskulba no obrigado sra. Awie."

Jornal Tempo Semanal la konsege hetan konfirmasaun ba noticia ne'e tan Ministra Justica husu jornal ne'e atu respeita ninia direitu hodi rejeita fo komentariu ruma ba ba jornal ne'e hafoin de noticiasiha edisaun 108, maske iha diskursu (08/08/2007) PM rekuinese povu nia direitu atu hetan informasaun liu husi media sira nia servisu. "Direitu atu hetan informasaun hanesan parte integrante husi estadu direitu demokratiku tan ba ida ne'e duni, ami halo komprimisu atu garante liberdade ba imprenca no independencia husi poder politiku no ekonomiku, ba orgauns publiku komunikasaun social hot-hotu. Ami mos hakarak kontribui ba servisu publiku hanesan Radio ho Televizaun ne'ebe proteje no haklaken kona ba kultura no tradisoens Timor nian i garante expresaun ba pluralismu opiniaun atu bele dezenvolve masa ida ne'ebe bele halo kritikas maibe ho responsabilidade iha paiz ne'e nia laran."

Relasiona ba kazu ne'e tuir provedor Direitus Umanus ninia oklu katak haksoit liu lutu lei aprovisionamentu ninian. "Hahalok sira hanesan ne'e viola ona principius lei aprovisionamentu ninian," alega provedoria direitus Umans da Juistica Sebastiao Dias Ximenes. Lei aprovisionamentu regula ho dekretu lei no. 10/2005 ne'ebe iha ne'eba defini ona katak kada Projektu presiza kesi an ho principiu interese publiku, imaprcialidade no konfidencialidade, boa fe no proporsionalidade, transparencia no publicidade, responsabilizasaun/akauntabilidade,
kombativilidade no konplitu interese no obendencia ba normas jerais. "Ha'u haree dala barak sira taka tiha matan ba principiu sira ne'e," nia informa.

Provedor ne'e hatutan katak "Durante ne'e sira uza lei ne'e hodi taka falta deit." "Dala barak projektu sira ne'e, sira halo tan ba deit ineteres pesoais no intereses grupu ninian hodi la respeita lei aprovisionamentu," nia hateten Iha konferencia ida iha Hotel Timor Dili hodi koalia kona ba KKN Provedoria direitus Umanus rekuinese sira nia frakezas no difeciencias maibe iha fulan
kotuk ninia gabinete haruka fali 18 kazus ba Primeiru Ministru kopias kazu sira ne'ebe uluk haruka ona ba Prokurador Jeral da Republika no ministeiru sira mak sira nia emar hetan alegasaun KKN.
Iha Projektu lei kodiku penal ne'ebe foin lalais ne'e aprezenta ba publiku define kazu korupsaun hanesan krime bainbain ida no Sebastiao Dias Ximenes tauk tan lei ne'e sei facilita liberta ema sira kazu uluk nian. "Ha'u diskorda uza lei kodiku penal ba kazu kkn tan se uza ida ne'e maka labele retroaktivu ba kazu kkn sira iha pasadu."

Nia fo sujestaun atu katak, "Ba krime korupsaun tenki uza lei especial ida para bele retroaktivu ba kazu hirak ne'ebe akontese ona iha pasadu, labele uza lei kodiku penal." Komenta kona ba lalaok ne'e Direktur Exekutivu ONG LABEH Cristopher Samson ne'ebe dala barak hananu ai knanoik KKN hodi halo membru guvernu sira nia tilun mean ne'e hateten katak iha projektu ne'e mosu manipulasaun no ejiji PDHJ atu halo investigasaun profunda ba kazu ne'e. "Tuir ha'u nia haree iha prosesu ne'e mosu ona kolusaun no mal administrasaun," cristopher alega.

"Ha'u husu investigasaun profunda tan ba antes fo projetu sira ne'e ema sira ne'e liga malu ona. Projektu ne'e loke ba publiku entaun labele iha ministru ka ministra ida troka sms uluk entre nia ho emprezariu sira," Cris koalia ho as. Nia esplika katak, "wainhira Projektu ne'e nain husi ministeiru justica maka emprezariu ne'e iha ona ligasaun ho ninia familias ka sms ba nia rasik ne'e lei aprovisionamentu bandu."

Cristopher Samson fo ai knanoik ida katak PM Xanana maka kaer hela sumbrina ida hodi tahan netik udan atu ministru no ministra sira labele bokon se nia hases wituan sumbrina ne'e maka, "mereka basah samua." "Se wainhira intend to award ne'e la publika ne'e hatudu katak iha
manipulsaun. Publiku iha direitu atu haten intend to award sira tan ba ne'e osan povu nian."
Maske nune'e Cristopher hahi no hawelok nafatin PM Xanana ninia komprimisu Politiku ne'ebe halo ona. "Komprimisiu PM nian Xanana hatudu ona liu husi aprovasaun lei komisaun anti korupsaun maibe PM mos sei hein hela orgaun kompetente sira seluk hanesan Provedor no Ministeiru Publiku halao sira nia knar hodi ajuda nia hamenus KKN."

IV Guvernu konstitusional mosu atu halo mudanca ba mentalidade no halakon vesti KKN ne'ebe halo kiak ba nasaun no haterus povu. Nune'e iha Diskursu PM Xanana iha loron inaugurasaun laos deit fo ksolok ba palaciu Novre Lahane maibe fo fiar ba povu katak guvernu ne'e sei la loke dalan no la tolera Favoritismu, Korupsaun, Koluiu, Nepotismu. AMP defende, "Principiu ba boa
governasaun ne'ebe hametin ho mekanismu ne'ebe forte no efikas atu halakon korupsaun, koluiu no nepotismu." "Principiu fundamental katak ema hotu hakru'uk ba lei." "Halao auditoria ba organismu publiku atu promove jestaun no transparencia." "Guvernu mos kompromete an atu koriji no halakon sistema favoristismu ne'ebe iha tiha ona. Ita ohin loron kreia hela imajen at ida ba ita nia rain hodi favorece deit elites politikas sira ne'ebe ukun." "Guvernu komprimisu apoiu liu tan ba sector privadu. Ne'e duni sektor privadu Nasional tenki hetan liu tan apoiu husi estadu. Labele iha diskriminasoens, tenki halo tuir kriteirus kona ba kompetencia, tuir projektu sira nia valor, haree ba onestidade professional, haree ba kapacidade teknika." "Tranparencia wainhira fo no simu projektus. Tranparencia wainhira hatudu kontas anuais husi empreza ida-idak ninian sei sai hanesan indikador ba kresementu sector ida ne'e nian."

"Kona ba financas publikas ne'ebe importante tebes ba dezenvolvimentu ekonomiku, kona ba halo kontas publikas presiza jestaun ida ho transparencia, regor no verdade. Transparencia, regor iha despeza ne'e maka dalan mesak atu garante sustentabilidade ba kontas publika ba tempu naruk nian. No bele asegura mos ekonomia kompetitiva no fo kredibilidade ba estadu iha povu no komunidade internasional nia matan." "Guvernu ida ne'e pronto atu hari'i komisaun anti korupsaun ho kbi'it rasik atu halo intervensaun hodi servisu hamutuk ho ministeiru publiku atu kreia kultura integridade seluk no profesionalismu iha administrasaun nia laran." "Iha semana ida nia laran, ami hirak ne'ebe ohin simu pose sei halo deklarasaun kona ba ida-idak nia riku soin, I sei publika no haruka ba provedoria de justica no direitus Umanus." Maske nune'e tuir Sebastiao Dias Ximenes katak liu tiha ona tinan ida nia laran provedoria direitus Umanus seidauk hetan nafatin asesu ba deklaasaun aset membru guvernu sira nian. "Tuir Komprimisu politiku ne'ebe ami halo atu labele haktuir skemas no favoritismu. Guvernu ida ne'e nia dever maka atu suberviziona membrus guvernu nian, atu sira labele lori intereses individuais liu fali ineteres koletivus no promove ambiente ida ne'ebe iha responsabilidade no integridade iha konselyus ministru laran. Hodi nune'e bele iha modelu exemplar ida ne'ebe ajentes publikus hot-hotu tenki banati tuir." Iha momentu ne'eba PM Xanana halo komprimisu maibe ohin mosu alegasaun barak hasoru guvernu ne'e katak mosu KKN barak iha exekusaun orsamentu tranzitoriu no orsamentu do estadu 2008 nian. "Guvernu ida ne'e hakarak atu hari'i Tribunal das kontas atu bele responsabiliza guvernu sira, ohin no ba futuru kona ba buat sira ne'ebe sira
halo jestaun osan publiku no administrasaun estadu nian." IV Guvernu konstitusional ne'e kaer metin duni ninia komprimisu no halo esforsu maka'as buka ai moruk no doutor especialista para kura moras ne'ebe susar atu prevene nune'e iha loron 24/10/2008 PM Xanana submete lei ba
kreiasaun komisaun anti korupsaun. "Agora dadaun tempu ona atu foti aksaun, hodi fo certeza katak korupsaun sei buras iha Timor Leste," Xanana dehan iha ninia komunikadu imprensa.
Nia hatutan katak,"komisaun anti korupsaun sei buka hatene se deit maka involve iha aktu koruptu sei hetan investigadu no sei simu penaltu forte, inklui dadur iha kadeia no konfikas sasan sira ne'ebe deit maka obtain husi korupsi."

Proposta Lei Anti Korupsaun mos pasa ona husi Konselyu Ministrus semana ruma liu ba no iha tempu badak nia laran reprezentante povu iha uma fukun TL sei hamulak hodi halolon KKN. Antes ne'e iha fulan Agusto PM Xanana rasik foti ona desizaun ruma hasoru fungsinariu publiku tan ba hetan alegasaun KKN. "Ami mos hakarak koriji buat hirak ne'ebe ami nia sucesor sira halo sala. Ho haraik an tan ba simu ona buat balun mak diak maibe ho mos determinasaun atu
halo transformasaun total ba sistema," PM IV Guvernu Konstitusional Kay Rala Xanana Gusmao hodi AMP no ninia membru kabinete tomak naran deklara ba publiku iha loron 08/08/2007.
Iha parte seluk eis Primeiru Ministru TL DR. Mari Alkatiri hateten katak lalaok ne'e iha indikasaun korupsaun tan laos es husi lei aprovisionamentu ninian. "Ne'e korupsaun," Mari alega. "Lei aprovisionamentu ne'e iha para Evita korupsaun no garante transparencia."

Dokumentus intensaun award ba kompainya P.T Global Teknology Enterprindo loron 30/05/2008 mak sei sai segeredu tan ba seidauk anunciu ba publiku tuir lider guvernu ne'ebe uluk sempre hetan alegasaun KKN barak iha ninia governasaun ne'e esplika katak kualker projektu mesmu iha situasaun emerjencia nia laran mos tenki prience kriteria tranparencia.
Nia alega mos katak iha prosesu projektu bileti de identidade ne'e ladun normal. "Ha'u haree iha jogu de influencia ka normalmente Favoritisimu," nia alega. Sekretariu Jeral Partidu Fretilin ne'e mos lamenta ho projektu bileti de identidade ne'e fo manan ba kompainya estranjeiru nian. "Ha'u desde uluk kedas defende atu projektu sira kona ba defeza, seguranca, intelijencia inklui balun hanesan mos bileti de identidade ne'e labele fo ba kompainya ema estranjeiru nian tan ba ne'e asuntu seguranca nasaun ninian," Mari sujere.

Xanana Seidauk Hatudu Nia Vontade Kombate KKN

Kompromisiu politiku Kay Rala Xanana Gusmao nian nebe hateten katak
"se'e mak naok lima cent sai, se'e mak servisu la diak sai", nee hanesan
retorika politika deit tanba mesmu Xanana iha vontade hanoin atu kombate
Korupsaun, Kolusaun no Nepotismu (KKN), maibe Xanana laiha vonta atu kombate
KKN hanesan nia hateten iha ninia kompromisiu politika.

Lia hirak nee hatoo husi Akademisi, Aristides Afonso ba jornal nee iha nia servisu fatin Universidade Nasional Timor Loro Sa'e (UNTL), Kinta semana kotuk. Akademisi nee reforsa liutan katak, Primeiru Ministru Xanana Gusmao so iha deit vontade liafuan atu kombate KKN, maibe vontade hahalok atu kombate KKN laiha. "ho liafuan deit, ita koalia iha televizaun, radio no jornal, hatudu ita nia vontade liafuan atu kombate KKN, mas vontade hahalok atu kombate
KKN, nee seidauk hatudu", dehan nia. Tuir Afonso, imposibel wainhira indikasaun KKN mosu iha departementu ida, Ministru la hatene. "hau la fiar enkoantu mosu indikasaun mal dministrasaun
no KKN iha departementu ida ou director balu halo pratika mal administrasaun no KKN, Ministru la hatene, nee komik", dehan akademisi nee ho hamnasa. Liutan nia propoin ba guvernu AMP atu uza preokupasaun povu nian ba KKN, nudar indikador ida nebe fo dalan ba guvernu atu buka tuir governantes balu nebe kakutak nakar. "Hau hakarak hateten ba guvernu ida nee katak, preokupasaun povu nian konaba KKN, nee bele sai ona hanesan indikador ida
ba guvernu atu investiga tuir kazu KKN nebe akontese iha nasaun nee. Maibe hau komfundi fali guvernu ida nee ninia pozisaun, tanba wainhira publiku fo sai sira nia opiniaun katak iha mal administrasaun, KKN iha ministeriu balu, guvernu husu fali evidensia ba publiku. "Guvernu labele argumenta fali ninia razoens hodi husu evidensia ba povu, tanba povu laiha meius atu asesu ba dokumentus. Tuir loloos guvernu uza mekanismu ida katak, wainhira publiku hateten ona katak iha indikasaun KKN iha ministeriu balu, devia guvernu funsiona fila fali instrumentu guvernu nian sira hodi halo auditoria ka investigasaun", akademisi nee propoin ba Xanana.

Husi instrumentu guvernu nian hanesan, Inspektor Geral no Provedoria dos Direitus Humanus no Justisa, wainhira guvernu funsiona sira nia servisu kombate KKN, maka guvernu sei hetan gava oin rua husi povu. ida, guvernu hatudu ba povu katak guvernu iha responsabilidade ba povu no sosiedade sivil sira nia preokupasaun konaba KKN. segundu, se laiha KKN, entaun guvernu aprezenta ba publiku katak guvernu AMP moos husi KKN. Liutan akademisi nee esplika katak, wainhira sosiedade sivil preokupa konaba korupsaun, loloos, guvernu labele husu fila fali ba sosiedade sivil atu aprezenta evidensia, tanba guvernu maka tenki hatudu evidensia katak guvernu ida nee laiha KKN.

"guvernu iha dever tomak atu hatudu evidensia ba publiku, laos husu fali povu ho sosiedade sivil mak hatudu evidensia tanba povu lamenta deit hahalok guvernantes Xanana nian sira", dehan Afonso. Tempu hanesan, wainhira responde pergunta jornalista nian konaba kompromisiu
politiku Xanana Gusmao nian iha dia 29 Maiu 2007 nebe hateten katak, wainhira nia kaer ukun "se'e mak naok lima cent sai, se'e mak servisu la diak sai", akademisi nee esklarese katak, se Xanana iha vontade duni atu kombate KKN, entaun ema barak mak nia hasai ona husi guvernu.
"lima cent ba Xanana nee osan boot tebes tanba lima cent nee riku soin ema barak nian. Se nunee labele iha ema ida iha guvernu nia laran kontenti hela ho lima cent, maibe ema seluk terus hela ho lima cent. Iha guvernu nia laran, labele iha ema ida uza osan lima cent hodi tuda halimar ba mai, hodi halo povu terus hela tanba buka lima cent hodi sosa masin", katak Aristides.
Liutan Aristides haktuir katak, kompromisiu politiku "naok lima cent sai", nee hanesan konsumsi politiku Xanana nian iha kampana politika, maibe wainhira nia asumi ona kargu nudar Primeiru Ministru, nia (Xanana) labele koalia mak barak hodi halo sasan oituan deit, maibe koalia oituan halo sasan mak barak. "se ita koalia barak liu asves ita haluha mak barak", dale nia.
Konaba estabelesementu Komisaun Anti Korupsaun, Aristides hateten katak, guvernu iha inisiativa diak hodi estabele komisaun nee, maibe guvernu labele uza komisaun nee hanesan kurtina ida hodi hetan fundus husi Millennium Challenge Corporations. "hau nia preokupasaun maka guvernu tenki estabelese komisaun nee hodi responde nesesidade nasaun nian. Se guvernu ida nee iha duni sentidu atu labele halo centavos ida husi kas estadu nian monu ba
membrus guvernu balu nia bolsu, entaun guvernu tenki halo investigasaun ba koalker atividades guvernu nian. Bila perlu, guvernu halo gradualmente, liu-liu uza instrumentu guvernu nian sira.
Hau mos hakarak husu ba Xanana katak, wainhira Xanana iha duni vontade atu kombate KKN, entaun Xanana labele hakfodak atu hasai membrus guvernu balu nebe halo KKN. Xanana lebele tauk katak, wainhira nia hasai membrus guvernu ida, partidu ida neba bele dadan an husi AMP hodi hamonu AMP. Se hahalok ida nee maka hela iha Xanana nia hanoin, entaun interese partidu nian as liu duke interese povu nian. "Se Xanana hakarak hatudu katak, guvernu AMP guvernu anti korupsaun, entaun membrus guvernu balu nebe malantru, Xanana tenki hasai kedan. Hasai la signifika hasai husi partidu, maibe hasai tanba malantru uza poder, uza osan povu nian ba interese individu", Afonso protesta hasoru Xanana tanba too agora Xanana nonok hela deit hodi la foti desizaun ba ninia guvernantes balu nebe iha ona indikasaun halo KKN. (aro)