Tempo Semanal Edisaun 115

Indikasaun TT Mafia Osan Povu

Guterres: Guvernu Sei Foti Desizaun Seriu Kontra TT

Dili, Tempo Semanal

Loron 19/07/2002, sai sasin ba guvernu Timor Leste ninia desizaun barata, tanba iha loron ida ne'e, guvernu ne'ebé lidera husi eis Primeiru Ministru Dr. Mari Alkatiri asina kontratu de konsesaun ho Portugal Telekom hodi fó ba telekomunikasaun portuguesa ne'e 15 anus de operasoens. Desizaun ida ne'e la fó fatin ba Telestra (kompania telekomunikasaun husi Australi) atu kontinua monta ninia rede telekomunikasaun iha Timor Leste tanba, guvernu desvia tiha kompania kulit mutin ho dalen Ingles ne'e hodi fó hikas ba kompanheru sira husi Portugal ne'ebé uluk halo invazaun mai Timor Leste hodi obriga ema kiak Timor oan sira hatama impostu obrigatoriu ba guvernador portuguesa iha Timor Leste. "sistema telekomunikasaun iha Timor Leste hanesan loloos sistema kolonealista Portugal. Tanba uluk Portugal uza sistema kolonealista hodi hanehan povu Timor i agora Timor Telekom alias Telekom Portugal adopta sistema ida ne'e hodi hariku-an iha Timor Leste", dehan deputadu Rui Menezes iha Parlamentu Nasional loron hirak liuba.

Hafoin asina tiha kontratu, iha loron 01/03/2003 Timor Telekom ho kontenti monta ninia servisu iha Dili no komesa halo estudus klean hodi monta tore (pemancar) iha Distritu sira. Nune'e, kompania Telestra ne'ebé sai kriadu ba politika guvernu ala Portugal telekom, husik hela Timor Leste iha loron 28/02/2003 hodi fila hikas ba Australia. "ha'u prefere ba maun boot Xanana nomos Ministru Telekomunikasaun atu lovi hikas Telestra hodi mai investe iha Timor Leste, tanba Timor Telekom hahu mafia povu nia osan liuhusi advertisement", dehan Orlando dos Santos nudar funsionarius Ministeriu Agrikultura ba jornal ne'e iha Dili.

Oras ne'e Timor Telekom laos de'it la kumpri povu nia ejizensia atu hetan asistensia telekomunikasaun di'ak, maibé Timor Telekom mós hahu tau publisidade iha media no haruka SMS ba ninia kliente sira konaba diskontu Timor Telekom nian. "Enxe pulsa to'o 30 Setembru sei hetan bonus 30% iha rekarga hotu. Timor Telekom-Ema Hotu Haksolok (24/09/2008). Grande Sorteio TT. Esta semana ja ha mais premiados. Quanto mais carregar mais pode ganhar. Na proxima vez o premio pode ser seu. TT-Toda a Gente Feliz! (27/11/2008). TT Sorteiu boot. Semana ida ne'e sei iha tan premiadu balun. Karega barak liu sei bele manan. Ba loron oin premiu bele sai ita nian (27/11/2008)", SMS Timor Telekom hodi mafia ema nia hanoin.

"ha'u ema paling la beruntung ho Timor Telekom ninia SMS. Tanba ha'u enxe pulsa semana ida bele too Dollar 15, maibé hau nein hetan premiu. Nune'e, ha'u husu ba publiku atu hanoin didiak antes hasai osan tanba SMS husi Timor Telekom ne'e hanesan iklan hodi fo benefisiu ba an rasik", dehan Jony ba jornal ne'e via SMS ho numeru + (670) 730 xxxx. Entertantu, IV Guvernu Konstitusional ne'ebé lidera husi Primeiru Ministru Kay Rala Xanana Gusmão, sei la tatoli lia mamuk ba povu konaba desizaun guvernu nian atu halakon monopoli Timor Telekom (TT), tanba guvernu hakarak hato'o ba povu guvernu nia desizaun fiksu hodi halakon monopoli TT. "ami lakohi lori de'it liafuan ba povu tanba ami hakarak hato'o ba povu desizaun guvernu nian hodi servi di'ak liutan povu nia interese", dehan Vise Primeiru Ministru, Jose Luis Guterres ba jornal ne'e iha Palacio Guvernu Sesta semana kotuk. Liu tan nia hateten, TT sai kestaun seriu ne'ebé tenke hadia. "antes Konsellu Ministru foti desizaun ba TT, Ha'u koalia bebeik ona katak TT sai asuntu seriu ne'ebé guvernu tenki hadia buat balu ke ladi'ak", katak nia. Guvernu rasik forma ona ekipa ida ne'ebé hanaran Task Force. Ekipa ne'e forma fulan hitu ona no oras ne'e halao hela estudus hodi haree sistema telekomunikasaun TT nomos haree kontratu entre guvernu ho TT. Kontratu ne'ebé hanaran Kontratu de Konsesaun ne'e, fó ba TT tinan 15 operasaun iha area telekomunikasaun iha Timor Leste. "kontratu de konsesaun ne'ebé fó 15 anos ba TT halo monopoli iha nasaun TL ne'e ladiak, ne'e principiu ne'ebé mak la los no desizaun nebe sala. Tanba ne'e, se iha ona evidencia husi konsumen sira ne'ebé senti sai vitima husi pratika servisu TT ninian, ami apoiu teb-tebes atu parte sira ne'e lori ba Tribunal, ne'e diak teb-tebes para TT hadia nia an no servisu diak liutan. Karik se TT labele hadia nia an maka Estadu, liu-liu Governu tenki loke Timor Leste ba Investidores seluk tan iha parte telekomunikasaun ninian atu mai investe iha Timor Leste", dehan Prezidente Parlamentu Nasional ba jornal ne'e iha Salaun Memorial Hall Motael Dili loron hirak liuba. Timor Telekom laos de'it halo monopoli merkadu, maibé Timor Telekom mós taka dalan ba kompania estranjeiru ne'ebé hakarak harii ninia internet iha Dili. Ezemplu kompania I-Net la hetan fatin tanba Timor Telekom lakohi fó lina foun ba I-Net hodi liga ba ninia konsumedores foun sira. Kazu ida ne'e halo Autoridade Regulador Comunikasaun (ARCOM) la kontenti. Nune'e, ARCOM fó rezolusaun balu no fó ultimatum loron 45 hahu husi loron 17/09/2007 too 30/10/2007 atu Timor Telekom kumpri, maibé Timor Telekom lahetan influensia husi desizaun hirak ne'e.Tan ne'e, iha loron 17/09/2007, liuhusi karta ho numeru Referencia MI-SETEC/022/ARCOM/IX/2007 Direktur ARCOM Nelson Santos Celestino fó ultimatum ba Timor Telekom. "ami notifika Timor Telekom, ho prazu loron 45, hanesan haktuir iha kontraktu de konsesaun, atu halo tuir desizaun ne'ebé arbritradu ona ou sei hasoru sanksaun prosedural hodi verifika lalaok legal ho obrigasaun kontraktual nian," hakerek iha alinea ikus surat ARCOM ne'ebé diriji ba Jose Brandao de Sousa nu'udar CEO Timor Telekom.

Antes atu fo Ultimatum, ARCOM sujere deit "Timor Telekom tenki fó aluga sirkuitus ba provedores services. Maibe cirkuitos hirak ne'e totalmente tenki transparancia (labele ho kualker lalaok restrisaun)." hakerek mos iha surat ne'ebé Asina husi Nelson Santos. I-NET hatama ona keisa ida ba Primeiru Ministru ho Autoridade Regulador Comunikasoens (ARCOM). Iha loron 22/11/2006. ARCOM liuhusi ninia Direktur Nicolao Santos Celestino haruka karta ida ba Eng. Jose Brandao de Sousa CEO Timor Telekom ho Mike Pye Direktur Manajer I-Net atu rezolve disputa entre TT ho I-Net. "Timor Telekom bele fó aluga circuit ba servisu provedores," sujestaun husi karta ARCOM ne'ebé cc mós ba Eng. Inacio Freitas Moreira, eis Ministru Transporte Telekomunikasaun; Eng. Fernando da Cruz, Sekretariu Permanente Transporte ho Telekomunikasaun no Teotonio Assis nu'udar Direktur Administrasaun ba MTC. "Timor Telekom ho konviniente bolu atensaun ba ARCOM tuir faktu iha konstituisaun RDTL refere ba forma artigu 13 no.1….,"hakerek iha surat, loron 13/02/2007 mak asina husi Administrador Delegado Jose Brandao de Sousa. Relasiona ba karta ARCOM nebe fo ona ultimatum ba TT atu kumpri, Nicolao Santos Celestino konfesa "los duni, ne'e obrigasaun no esforsu ida tuir dekretu de lei no. 12/2006 ," nia koalia liuhusi telemovel.

"Se iha ona evidensia husi konsumen sira ne'ebé senti sai vitima husi praktika servisu TT ninian, ami apoiu teb-tebes atu parte sira ne'e lori Timor Telekom ba Tribunal. Ita telephone iha kualker oras sira dehan busy…busy sa tan iha tempu balun ema barak presiza telephone ba malu mós la di'ak," dehan Prezidente Parlamentu Nasional Fernando de Araujo Lasama..

Iha Tinan kotuk wainhira klientes sira hateten folin TT karu, TT produs fali deit kartaun pulsa ho folin US$5 nian ne'ebé dala ruma fa'an ho folin ne'ebé la konsisten hanesan durante loron 17-21/09/07 ne'ebé kartaun pulsa US$ 5 fa'an ho folin US$ 5.25 iha dader no kalan sa'e to'o US$ 5.75. "Ha'u sosa husi TT mak karu liu nune'e duni ami tenki fa'an hanesan ne'e hodi hetan netik pursentus ," dehan Agus vendedor kartaun pulsa ne'ebé fa'an besik Hotel Timor. Hafoin loron balun liu tiha, iha loron 20/09/07 11:04 TT haruka mensajen ida via telemovel hodi alerta atu labele sosa pulsa ema fa'an la tuir folin mak defini ona iha kartaun Pulsa laran. "TT warning message/ folin iha kartaun recarga laran, favor labele selu liu," alerta husi numeru 6082.

Iha loron 23/09/07 dader mosu fali problemas ne'ebé telefone sai no enxe pulsa la diak. Maibe la kleur bele telephone fali mas problema labele enxe pulsa la iha certeza ate 25/09/07 loro kraik. TT foin bele haruka mesajen de alerta iha loro kraik. "23-09-07 17:53 TT/Agora sei labele enxe pulsa, favour hein SMS husi ami," Sms TT via numeru 6082 ne'e hakerek. Iha loron rua ne'e nia laran telemovel balun sai hanesan ema ne'ebé mate. "Ha'u labele halo kontaktu ba ha'u nia parseiru no ne'e halo lakon mai ha'u," dehan ema ne'ebé husu atu nia naran labele fó sai tan ba nia mós sai hanesan parseiru ba TT.

Husi parte seluk, Vice Presidenti Forum Emprezarial Timor Leste, Rui Castro hato'o nia deskontenti ba Timor Telekom hodi apela ba Presidenti DR. Ramos Horta atu apoiu Governu IV konstitusional hodi lori tan kompania ruma mai investe iha area telekomunikasaun. "Ha'u hanoin Prezidenti ba ema ki'ak sira presiza uza ninia kbi'it bolu tan investidor seluk mai hodi redus ki'ak iha nasaun ne'e purke ema barak mós hahu ki'ak tan TT," dehan Rui Castro. Rui hateten, ho prezensa kompania uniku entaun la fó alternatives ba povu Timor Leste atu hili". Dalan Unik atu solusiona ba problemas ne'e mak Kompetisaun ne'ebé sehat katak presiza tan kompania ida hodi nune'e bele halo komparasaun ba servisu Timor Telekom ninia," Rui Haklaken.

"Ami Timor Telekom nia hanoin mak ami iha ona kontratu. Ami sei halo tuir ami nia obrigasaun hot-hotu tuir kontratu ne'ebé iha ona. Kontratu ne'e asina tiha ona entre governu RDTL ho Timor Telekom, nune'e duni ami sei halo tuir no ami sei tara an ba kontratu ne'e," Diretur Timor Telekom Jose Brandao koalia iha intervista ho Tempo Semanal iha Dili fulan hirak liuba. (aro)

Timor Telecom Folin

Karun No Mukit Rede

Dili,Tempo Semanal

Timor Telecom nu'udar uniku kompainya telekomunikasaun ne'ebe existe iha nasaun independenti Timor Leste. Hafoin de asina akordu de konsesaun iha timan nen kotuk TT danca ho ninia proveitu maske akompainya ho knananuk halerik kritikas husi ninia klientes sira.

Angela da costa komunidade TL ida hela iha Gleno hateten katak nia la kontenti ho TT ninia folin ne'ebe karun liu no rede ne'ebe sempre okupadu. "Ha'u triste ho Guvernu ita nian ne'ebe husik Timor Telkom han matak ita nafatin no Timor Telecom servisu la diak," dehan angela. "Husu Guvernu lalais halo esforsu hapara lalais situasaun ne'e tan ba dala barak ema moras ka besik atu partu ami hakarak kontaktu ho ambulancia maibe labele telephone husi ami nia fatin tan la iha rede nune'e duni ami tenki haruka ema halai ba kantor policia hodi husu aijuda."

"Ami ejiji guvernu atu hato'o ami nia preokupasaun ne'e ba Timor Telecom hodi asilera ninia promesas monta rede nasional ne'ebe diak se sira hakarak sira mesak mak hela iha Timor Leste maybe se sira la konsege entaun merese para Guvernu buka hatama tan kompainya telekomunikasaun seluk mai monta sira nia rede." Governu AMP dehan ona katak nia hakarak renegoseia Timor Telecom nia kontratu, ne'ebé sei arti katak nia lakon ninia monopóliu iha telekomunikasaun iha Timor Leste, no merkadu sei nakloke ba kompetisaun. Hatan ba preokupasaun komunidade ninian ne'e, iha tempu ruma liu ba Vice Primeiru Ministru Jose Luis Guterres deklara ona katak guvernu iha hanoin atu buka hatama tan operadores seluk.

Ken Westmoreland matenek nain ida hela iha Inglatera mos kontenti ho desizaun ne'e. Belun Timor nian ne'e hatudu ninia laran susar wainhira ema ema timor balun la simu hanoin diak husi guvernu nian ne'e. "Infelizmente, ema barak iha Fretilin, no ema iha rai li'ur séi apoia sira, kritika ne'e ba razaun ne'ebé iha ideolójika no polítika duké prátiku, no ladún kona-ba telekomunikasaun ida," ken hateten. Nia laran triste ho, "Ema ruma dehan katak desizaun ida ne'e 'ilegal', 'anti-Portugal', ka teoria konspirasaun bulak seluk, maibé tuir loloos, ne'e kona-ba kualidade servisu nian, ne'ebé la hanesan di'ak ho nia tenke sai."

"Sira-nia argumentu maka Timor Leste rai ki'ik demais no kiak demais atu iha kompetisaun iha sektor telekomunikasaun, maibé maski ne'e loos karik, nia la justifika inkompeténsia Timor Telecom nian." Nia hateten katak, "Problema boot ida ba ema iha rai li'ur sé presiza bolu ba Timor Leste, maka presu aas teb tebes, por ezemplu, $3 por minutu, ka presu liután nafatin. Ne'e inklui Timor oan barak, sé sira serbisu iha Inglaterra no Irlanda do Norte, sé haruka osan barak ba fali sira-nia familia iha Timor Leste."

Timor Telecom hateten ona ba nia katak "kompañia telefone sira seluk nia presu la'ós TT ninia responsibilidade," maibé kompañia telefone sira ne'e informa mos ba nia katak "sira-nia presu aas tanba sira tenke selu Timor Telecom osan barak."

"Se kompañia sira ne'e tenke selu $1 por minutu ba Timor Telecom, sira-nia kliente sei la bele bolu ba Timor Leste ba sentavus 25 de'it., tanba kompanhia sira ne'e tenke halo proveitu ida."

"Ema ruma halo osan lukru resin liu. Sé maka ne'e? Timor Telecom, ka kompañia telefone sira seluk? Se Timor Telecom maka fa'an ba folin aas ba kompañia telefone sira seluk, nia tenke hamenus ninia presu. Entretantu, se kompañia telefone seluk sira maka halo proveitu boot resik liu hosi bolu ba Timor Leste, sira maka hamenus ninia presu."

"Sira-nia argumentu seluk maka ema uitoan hakarak bolu ba Timor Leste, portantu sira tenke halo proveitu liu duké halo bolu ba rai seluk. Entaun nia sai 'sírkulu visiozu' ida (ka 'diabu nia le'u): ema uitoan bolu ba Timor Leste tanba presu aas, no presu hosi bolun ba Timor Leste hela aas tanba ema uitoan hakarak bolu ba rai ida ne'ebá."

"Entretantu, bolun telefone la hanesan buat ne'ebé ema sosa iha loja. Se ema witoan sosa buat ida iha loja, loja na'in presiza selu ba nia nafatin, maibé se ema la bolu ba Timor Leste, kompañia telefone sira la tenke selu buat ida. Sira sei tenki selu Timor Telecom de'it kuandu ema halo bolun ida."

Problema seluk ida maka Timor Telecom seidauk asina akordu ho operador importante barak iha mundu, atu husik kliente sira uza sira-nia telemovel iha Timor Leste no rai seluk, ka haruka mensajen SMS ba malu. "Por ezemplu, ha'u la bele haruka SMS ba Timor Leste hosi ha'u nia telemovel Orange iha Reinu Unidu, tanba Timor Telecom seidauk asina akordu ho Orange.""Timor Telecom nia sítiu internet dehan mai ita katak nia iha asina akordu ona ho operadór sira iha Marrokos, ka Úngria, maibé Timor oan iha rai sira ne'ebá nain hira, iha komparasaun ho Reinu Unidu, ne'ebé Timor oan barak iha ne'e? "Timor Telecom nia xefe rasik, José Brandão Sousa dehan ona katak ema labele kompara merkadu telekomunikasaun iha Timor Leste ho iha Indonézia, ne'ebé dala barak boot liu duké Timor Leste.Tuir Ken katak, "ema la presiza halo komparasaun ho rai boot hanesan Indonézia, ema bele haree ba situasaun iha rai ki'ik no kiak iha Pasífiku, hanesan Fiji no Vanuatu. Rai rua ne'e iha populasaun ki'ik liu duké Timor-Leste, maibé sira bele hetan servisu telefone no internet ne'ebé di'ak liu ka baratu liu."

Nia relata folin internet iha nasaun balun, "Iha Fiji, rai ida ho ema 840 000, kustu koneksaun 128kb ba internet $27 de'it fulan ida. Iha Vanuatu, koneksaun hanesan $51 fulan ida, iha rai ho ema 215 000 de'it." "Iha Rwanda, rai kiak teb-tebes ida iha kontinente kiak liu hotu iha mundu, koneksaun 128 kb permanente ba internet folin $135 fulan ida, ne'ebé nafatin baratu liu duké iha Timor Leste nafatin - koneksaun hanesan hosi Timor Telecom ho folin pelumenus $1000 kada fulan."

Iha parte seluk Fernando D. C. Costa ne'ebe jornal ne'e hetan iha merkadu halilaran Dili dehan katak nia labele kontaktu ho ninia familia balun ne'ebe servisu iha Irlandia via sms. "Ha'u tauk atu telephone ba ha'u nia alin sira ne'ebe servisu hela iha Irlandia tan ba pulsa US$ 10,- halai hanesan anin be la kleur hotu ona," Fernando informa. Nia informa ba Jornal ne'e katak Klientes Timor Telecom barak maka la kontenti ho Timor Telecom ninia promesa sira inklui ninia presu."Ha'u hakarak dehan operador Telekomunikasaun iha Indonesia baratu duni no diak liu," nia informa. "Wainhira klientes rua ne'ebe uza rede hanesan pur izemplu sempati telefone ba sempati maka sei baratu liu nune'e mos dala ruma iha free call maibe TT nian mai halo ita tauk telefone ba malu."

"Ita husu to'ok hodi bainhira maka sira monta tower foun ruma iha nasaun ne'e." "Tower ne'ebe agora TT uza maioria Indonesia ninia liman rohan maibe Timor Leste nia Guvernu iha deit saham wituan."Maske Timor Telecom hakarak manetin ho monopoli tan kontratu de konsesaun maibe dadaun ne'e IV Guvernu konstitusional loke ona dalan ba kompainya foun ruma tama dadaun mos.(ts)