Prepara Atu Rezigna Aan Major Jeneral Hahu Sai Ona husi Uma Estadu Ninian

Breaking News
Tempo Semanal-Dili, 12/09/2011

Atetude haraik aan husi major Jeneral Taur Matan Ruak hodi husik hela uma estadu ho sasan seluk ne'ebe durante nee nia haksumik aan ba ne'e hanesan sadik ida mos ba nain ulun sira seluk iha nasaun RDTL. Eis titular balun lakohi terus hanesan povu maibe gosta liu hodi goza direitu privelijiu oioin wainhira povu sei susar hela. Hetook aat liu tan wainhira povu hili tiha sira ba iha poder hodi halo lei defende uluk sira nia interese no haluha povu i pior liu tan maka balun hariku aan iha povu ninian mukit ho dalan KKN. Maibe Jeneral fitun rua ne'ebe iha tempu rezistencia sai hanesan komandante de gerilia ne'e, hakmumuk ona esperiencia moruk terus ninian ne'e sadik vontade diak husi ukun sira seluk iha nasaun kosok ne'e no iha ninia deklara ba media kona ba sa ida maka nia sei halo kuandu rezigna aan tiha, nia hatan katak, "ha'u sei ba hamutuk ho maluk sira ne'ebe uluk fo'o aan terus ba nasaun ne'e."

Hafoin de hatama pedidu rezignasaun ba Prezidenti da Republika ho Primeiru Ministru ne'ebe mos hanesan Ministru de Defeza iha loron (01/09) Major Jeneral F-FDTL ne'e hahu muda aan ona husi uma ofisial komandante jeneral Forca de Defeza ninian iha Farol ba iha uma privadu ida iha altu metiaut.

Tuir observasaun jornal Tempo Semanal (12/09), Major Jeneral ne'e fadigadu hela muda ninia sasan privadu ba iha foho leten metiaut ninian ohin loron tomak. Uma naton oan ne'e ladun suficiente hodi bele hamahan proprietariu Major Jeneral taur ho ninia familia nian.

Eis komandante gerillia ne'ebe ba obta karakter tolu hanesan onestu, frontal no kredibel ne'e, la halerik uitoan kona situasaun mak nia infrenta maibe sei barani hatudu oin midar tan ba nia rasik koko ona susar husi moris ninian wainhira sei moris iha funu laran.

Jeneral Taur hatene didiak katak wainhira nia fila ba vida civil nia sei la hela iha uma estadu ninian tan ba iha nasaun Timor Leste povu barak maka sei moris iha uma la ho kondisaun diak. Nune'e duni nia hahu husik sasan Estadu ninian no nia tuir izemplu eis lider balun ninian.

Iha loron 02/09/2011 Konsellu de Ministru hola ona pozisaun ba pedidu Jeneral Taur ninian maibe iha momentu ne'eba sei hein hela Prezidenti da Republika ninian hanoin. Maibe too ohin Prezidenti da republika sei indika nafatin ninia preokupasaun ba Jeneral Taur ninia rezignasaun maibe ho atuasaun muda husi uma ofisial Jeneral ninian ne'e bele dehan Jeneral Taur Matan Ruak hakbesik aan daudaun ba rezignasaun husi ninia kargu no sai husi F-FDTL.