Wednesday, 7 September 2011

Ramos Horta Rejeita Foo Sai Ninia Hanoin Kona Ba Rezignasaun TMR

Tempo Semanal,Dili-06/09/2099


Prezidenti da Republika DR. Jose Manuel Ramos Horta rejeita atu hatoo ninia hanoin kona ba pedidu rezignasaun komandante F-FDTL, Major Jeneral Taur Matan Ruak husi ninia pozisaun no desizaun atu husi roupa militar hodi ba moris hanesan ema civil.

"Ha'u labele komentariu ba ida ne'e, tan ba foin maka to'o. Ha'u seidauk hasoru malu ho Primeiru Ministru i Ministru de Defeza. Aban dader sei hasoru malu ho Jeneral Taur Matan Ruak ne'e maka depois ha'u sei haree sebele komentariu ruma ka la'e," Prezidenti da Republika, DR. Jose Ramos Horta.

Xefe Estadu Major F-FDTL, Major Jeneral Taur Matan Ruak hatama ninia pedidu de rezignasaun dahuluk iha primeiru Governu Konstitusional ninian tempu maibe la aprova nune'e mos iha tinan ruma kotuk nia husu tan dala ida la konsege nafatin. Nune'e duni iha loron Kinta (01/09/2011) Jeneral fitun rua ne'e haruka pedidu rezignasaun ba Prezidenti da Republika no komandante Supremu Forcas armadas, DR. Jose ramos Horta no Primeiru Ministru no Ministru de Defeza Jose Alexandre Kay rala Xanana Gusmao. Iha Sexta Feira (02/09/2011) Jeneral Taur informa ba publiku kona ba ninia surat rezignasaun no hein hela aprovasaun husi ulun boot estdau Timor Leste. Maibe Konsellu de Ministrus iha loron hanesan halo ona apresiasaun no aprovasaun ba pedidu refere maibe ba jornalista sira Prezidenti da Republika so'e biadas hodi dehan nia sei foo premiu wainhira informasaun ne'e loos.

"Se governu aprova tiha ona, ita boot sira, ha'u foo parabeins tan ba informadu di'ak liu fali Prezidenti da Republika. Entaun tinan ida ne'e ha'u sei foo kondekorasaun bo'ot ida ba ita bo'ot sira tan ba informasaun di'ak liu fali," Ramos Horta Goja Jornalista.

Ho liman rua nakloke, ulun doko tun sa'e no hamas sinista Ramos Horta hatutan, " se loos duni ne'e......depois....ha'u hateten ke'e ne'e la loos mas ha'u la rona ida ne'e."

Prezidenti da Republika iha momentu ruma dehan ona ninia rezesaun ba informasaun ne'ebe cirkula iha fulan juniu tinan ne'e kona ba Jeneral Taur ninia intensaun ne'e dala ida tan hatudu husi ninia body language katak nia lakonkorda ho rezignasaun Komandante Jeneral F-FDTL ninian ne'e.

"Ha'u hateten daudaun ha'u la komentariu ba ida ne'e tan ba ha'u seidauk ko'alia ho Primeiru Ministru ho Ministru de Defeza depois maka ita bele ko'alia liu tan. Tan ba asuntu ne'e loloos ne'ene manadtu, portofolio ba Primeiru Ministru ho Ministru Defeza ninian. I ha'u tenke ko'alia lai ho nia depois maka ita haree, solusaun sa ida, resposta sa ida no komentariu sa ida."

Iha loron 22/06/2011 DR. Jose Ramos Horta indika ninia intensaun katak 90% nia sei la rekandidata aan ba periodu darua iha ninia kadeira maibe iha mos informasaun katak Prezidenti Ramos Horta hetan fiar husi ema atu rekandidata hikas. Nune'e duni Jornalista ida koko sadik posibilidade Ramos Horta ninia barani hodi kompete kontra Jeneral Taur Matan ruak iha elisaun oin mai. Maibe diplomasia Xefe do Estadu ne'e dehan, "Posibilidade, ita hotu-hotu iha posibilidade atu sai prezidenti da Republika. Ha'u nia be'e oan mos posibilidade iha. Portantu sei sedu demaispara ita ko'alia kona ba prezidencia da Republika, ema balun ita bo'ot sira kuinese no hateten tiha ona."

Prezidenti husu atu labele kahor asuntu rua ne'e hamutuk. "Bu'at rua ne'e ketaketak. Ida Rezignasaun xefe estadu major jeneral Forcas aramadas ninian. I asuntus seluk kandidaturas ba prezidencia da Republika, ba parlamentu nasional, buat sira ne'ene oin seluk.

Maibe Prezidenti da Republika nafatin rejeita atu komentariu ho detallu kona ba asuntus ninia kandidatura ninia an ba pozisaun ne'ebe agora nia okupa ho rezignasaun Jeneral Taur ninian. Maibe publiku hahu hatene ona kona ba kandidatus ba Prezidenti RDTL datolu maka hanesan Angela Freitas, Kandidata husi Partidu Trabailista, Eis Prezidenti Partidu Fretilin no eis Ministru Interior iha Primeiru Governu Konstitusional, Rogeiro Tiago Lobato, kandidata aan hanesan independenti, Prezidenti Partidu PNT, Abilio de Araujo,  Prezidenti Fretilin Mudanca no atual Vice PM, Jose Luis Guterres, Membru Parlamentu Nasional husi bankada PD, DR. Lucas da Costa ne'ebe kandidata aan hanesan ema independenti, Prezidenti ASDT, Francisco Xavier do Amaral ne'ebe mos Eis Proklamador Unilateral independencia RDTL kandidata husi liga partidu tolu. Tuir informasaun ne'e mos dehan Fretilin sei iha sira nia kongresu ne'ebe sei hala'o iha loron 11/09/2011 hodi kandidata sira nia Prezidenti Partidu, Francisco Lu OLo Guterres maske iha membru balun laran rua-rua nune'e mos husi partidu PD sei kandidata sira nis Prezidenti do Partidu ne'ebe hanesan Prezidenti parlamentu nasional, Fernando Lasama de Araujo liu husi kongresu partidu refere iha fulan ikus tinan ne'e. Iha mos informasaun ikus ne'ebe dehan sei mosu tan kandidatu independenti seluk hanesan Jeneral Taur Matan Ruak no husi partidu KOTA sei kandidata DR. Manuel Tilman.

3 comments:

punkt A said...

Interesujące. Pozdrawiam.
http://punkt30.blogspot.com/

AnMB said...

hi i like your blog,.. can you add my site to your blogroll...
admin of http://antechno.com

Claudia Simões said...

PR JRH sibuk no fo valor liu ba corrida bicicleta do ke General TMR nia resignasaun. Ema hanesan ne'e hare lalika hanoin atu continua iha posisaun PR iha 2012. Diak liu fo ba gerasaun foun. Sira gerasaun 75 mesak pikun deit.,.,