TL SIMU TINAN 2011 HO AHI ELETRICIDADE MATE NO TT EMPATA KOMUNIKASAUN

 TEMPO SEMANAL-DILI, 01.01.2011

santa claus marina USA
foo presente ba orfanatus iha TL
 (foto: embaixada USA)

Populasaun Timor leste ne’ebe pursentu sia nolu resin hitu katoliku ba partisipa iha misa kalan fahe malu tinan tuan no simu tinan foun ninian. Iha capital Timor Leste misa iha katedral Dili hahu husi tuku rua nolu (31/12) no remata iha tuku rua nolu resin rua minute ha’at resin haat. Iha Omilia Bispo Dom Alberto hahi tebes mudansa kmanek tinan 2010 ne’ebe foo avansa maka’as ba teknolojia, medisina, komersiu no industria inklui meus de komiunikasaun.

Maske nune’e Bispo Ricardo mos preokupa ho lala’ok naksalak balun ne’ebe halo estadu balun lakon sira nia autoridade hanesan krize hamlaha mundial no ema sei funu malu.

Iha oras fahe malu ninian paixon taru kahor ema hakilar lemo iha Kapital. Haree husi Fatu Ahi tutun tun ba Palasiu do governu Paixon ninia lakan no rona tarutu boot.

Foin hakat tama ba minute hitu tinan 2011 tuir observasaun klientes TT balun labele dirije sms via telemovel tan pendent tiha.  “Ha’u hakarak kongratula ha’u nia belun maibe agora minute sanolu resin ida ona mos labele haruka ne’e,” dehan Jaimitu jovens ida ne’ebe tuur besik postu Polisia ninian iha Fatu Ahi.

Jaimito ninia belun Domingos ne’ebe hamriik iha ninia liman loos hase hodi dehan, “maluk keta triste tan ita nis sms sei haruka maibe kala pendente tan limitasaun iha servisu TT tan ba ema barak maka haruka sms ba malu.”

Domingos ninia lia fuan ne’e la’os hamaus maibe halo Jaimito lamenta ho kapasidade de atendimentu husi TT hodi dehan, “Timor Telkom la mampu atu aijuda ita entaun diak liu dehan la mampu la’os empata fali ita atu halo komunikasaun.”

Dezastre kapasidade la’os kona TT de’it maibe liu minutu lima de’it husi susar dahuluk, hateke tun ba parte balun kapital Timor Leste mos lakon ahi eletricidade nia roman.

“Huuuuuu……ahi mate,”lian hakilar simu ahi mate kahor lia aat balun hasoru ssekretariu do Estadu ne’ebe kaer area eletricidade.

“Tinan bele troka maibe ahi mate sei kontinua nafatin,” jovens lubun ida tuur besik dalan boot terminal bekora ko’alia ba malu kahor ho lian tolok.

 “Feliz Ano novo 2011 iha ahi nakukun laran,” sms ida mai husi numeru telemovel 7326xxx ba Tempo Semanal ninia numeru.

Tempo Semanal mos haruka tutan sms ne’e ba sekretariu do Estadu eletricidade Januario Pereira, liu husi numeru ofisial 7230049. Liu tiha tiha minutu minutu rua sms refere haruka ahi eletricidade iha parte sira ne’ebe mate ne’e hahu lakan fali hanesan iha bekora muzika hahu lian fali. .

Husi numeru ofisial Sekretariu de Estadu ne’ebe iha tinan kotuk primeiru Ministru Kay Rala Xanana Gusmao iha sorumutuk publiku ida hanaran Sekretariu do Estadu AMP (Ahi Mate Permante) ne’e hataan via sms, “obrigado e igualmente.”

Iha nakukun Dili nian, dalan de’it hetan roman husi lampu kareta ho motor hatudu hanesan mota. La iha ahi eletricidade foo duni impaktu ba celebrasaun simu tinan foun ninian nune’e ahi eletricidade mate fali tan ba dala rua joventude iha has laran ne’ebe dansa hela iha kampu voly bola iha fatin ne’eba dere besi no hakilar. Dere besi ne’e halo joventude husi bairo seluk mak ba boas Festa iha area ne’eba halai hodi so’e hela sira nia motor hanoin katak mosu ona desturbiu ruma. “Ha’u hanoin ema baku malu tebes maibe desturbiu husi eletricidade. Iha ami nian ne’eba kuandu dere besi ne’e sinal ema seran malu maibe iha ne’e kuandu ahi mate mos dehan penyerangan, “ dehan Bitu joven ida husi bairo komoro. (TS).