Tempo Semanal-Dili, 26.01.2011
Iha loron 20/01/2011 Madruaguada ekipa konjunta husi seguransa nasaun ninia hafanu komuniadase sira ne'e maka simu tiha osan husi governu maibe seidauk muda sai husi eis uma Brimob RI nune'e duni PNTL ho eguranca civil hala’o muda obrigatoriamente ba komunidade sira iha eis asrama Brimob Bairo Pite tuir despezu Ministra justica ninian.
Wainhira polisia ho Seguransa civil atua daudaun familias balun ne’ebe hetaan muda obrigatoriamente hala’o protesta ba Parlamentu nasional iha ne’ebe deputadu sira hotu preokupa hela ho diskusaun orsamentu jeral. Reprezntante husi manisfestante sira la konsege tama ba PN hodi hasoru malu ho reprezentante povu no Governu tan ba blokeia husi seguransa iha portaun PN ninian. Eviksaun ne’e hamosu opiniaun pro ho kontra. Ema barak mak kondena Governu sala maibe balun mos dehan atuasaun ne’e loos.
“ha’u hanoin ministra justica ninia despezu ne’e loloos ona no populasaun tenke koopera. Tan bad ala barak Governu sai ayam potong hela de’it,” dehan A. dos Santos Soares (56) ne’ebe hela besik iha perumnas ninian.
Nia hateten katak, “loloos ne’e antes governu atu mai halo indentifika uluk ema sira ne’ebe hela iha uma sira ne’e hodi hatene katak sira ne’e mai husi ne’ebe. Tan ba ami sira maka hela iha uma estadu ne’e barak iha uma rasik mas tan ba osan entaun ami nia uma foo aluga tiha depois ami mai okupa uma estadu.”
Komunidade ne’ebe lakohi atu publika ninia naran tutun ne’e foo hanoin ba Governu TL ne’ebe hahu kreia kultura aat ba kompensasaun sala ba ema balun ne’ebe la merese atu simu.
“Ha’u husu ba Governu atu kuidadu ho situasaun fahe osan. Loos duni Governu iha dever atu tulun ninia povu sira mas tenke tuir krietriu. Ba sira ne’ebe uma la iha kedan ne’e ha’u mos deskorda atu Governu foo US$2000, maibe ba sira ne’ebe iha uma no iha 1999 hela iha uma rasik maka la estraga depois faan tiha ka foo aluga ba ema seluk hodi mai iha uma sira ne’e governu la devia foo osan boot ba sira,” Sr. Soares haktuir.
Governu foti desizaun ne’e tuir lei ne’ebe iha define katak propriedades no rai sira maka avandona husi colonial Portugal no invazor Indonesia pertencia ba estadu ninian hodi jere.
“Ha’u espera katak lei vale ba ema hotu-hotu labele tula de’it ami mas iha parte seluk Indonesia ho portages sira nia rain iha Dili sei iha entaun problema sei hamosu hikas problema iha loron ikus,” nia foo hanoin ba governu.
Iha parte seluk xefe uma kain ida ne’ebe hatama daudaun ninia sasan ba karreta atu muda sees dehan nia agradese ba PNTL ho seguransa sivil sira.
“Maun ha’u agardese ba PNTL tan ba ho sira nia prezensa ami bele sai,” dehan Xefe uma kain ne’ebe rejeita atu temi ninia naran.
Nia realsa katak, “ha’u loloos moe no hakarak sai duni husi fatin ne’e tan ba osan ne’ebe governu tulun ne’e halo ona uma taka baluk ida atu muda mas tauk tan ba maluk balun dehan ami labele sai lai.”
Tuir Senhor ne’ebe antes 1999 hela iha distritu ne’e katak nia sente osan la suficiente ba halo uma ida.
“Ha’u la’os husu ba ha’u nia aan de’it maibe ha’u hanoin osan ne’e maka la to’o duni tan ba foo dois mill dollar ne’e ami halo uma mos la too. Se governu mak tulun duni ami karik bele foo netik lima ribu dollar kala ami bele dada iis uitoan,” nia foo razaun.
Familia balun husi familias neen nolu resin ida maka hetaan despezu administrativu hodi hasai obrigatoriamente husi uma hirak iha eis kazernas Brimob Bairo Pite Dili lori sira nia oan ho sasan ba hala’o invazau surpreza ba gabinete PDHJ. Familias sira ne’e ameasa atu hela iha gabinete direitus ema nian ne’e too hela solusaun ba sira nia problema maibe provedoria maka la aceita.
“Agora sira tama tiha ona ami koko atu ko’alia ho sira, problema sira nia saida,” dehan DR. Sebastiao dias Ximenes.
Provedor ne’e informa katak, “sira nia ejizensia maka sebele governu buka lai fatin provizoriu ida para sira bele hela, wainhira sira buka hela fatin permanente.”
Provedoria halo ona esforsu, “ami koko ona ko’alia ho governu maibe ami haree katak difisil uitoan tan ba governu mos iha ninia pozixaun katak sira tenke fila ba sira nia hela fatin. So ke problema mak, hela fatin ida n’ebe? Porke sira barak liu la’os ema dili. Tan ne’e maka ami mos ohin foti solusaun ida foo hanesan alternativa ida ba sira katak se karik sira hakarak fila ba sira nia distritu, ami bele sai hanesan ponte para ko’alia ho governu fasilita transporte ba sira I foo mos asistensia uitoan para sira bele fila fali ba sira nia hela fatin.”
Reprezentante vitima eviksaun Bairo pite, feto ida, iha dialogu ho parte Provedoria dos direitus Humanus de Justica ho Ministra Justica rasik nia reklama katak osan ne’ebe governu foo ba sira ne’e la too.
“Dua ribu Dollar ami hola duni rai mas foo netik kalen ba, semente ba para ami hela ketak. Ami la ba iha ne’eba. Ami lakohi. Nusa maka ami tenke hela iha ne’eba lori ami ba fali distritu?,” Sra. ne’e ko’alia ho lian hirus.
Ho liman dere meja nia ameasa governu hodi dehan, “dua belas tahun ami hela iha ne’ene, rai ne’ene. Se lakohi ami atu hela iha dili ne’e, lori ami ba fali bee…distritu ida-idak entaun foo fali ema seluk mak ukun ami. Ida ne’e maka ha’u nia ezijensia ba ministra.”
Hafoin liu husi negosiasaun balun familias hirak ne’e agora hela provizoriamente iha resinto NGO Haburas besik farol Dili no tuir observasaun burdozer hahu sobu rahun paredes uma eis brimob ninian. (TS).
No comments:
Post a Comment