Australia Nasaun Boot Sempre Aijuda TL Agora TL Mos Apoiu Fali Nasaun Kangaru

Tempo Semanal-Dili, 20.01.2011

Liu husi Konsellu dos Ministrus Extra Ordinariu iha loron 14-01 2011 IVGovernu konstitusional aprova Orsamentu ho total US$ 500,000,- hodi tulun Governu Australia ho foo apoiu ba vitima husi inundasaun iha Queensland nune'e duni reprezentante Governu Kanberra iha Dili foo agradesimentu.

"Chargé d'Affaires Austrália nian ba Timor-Leste, Suzanne McCourt, hato'o obrigada boot ba apoiu ne'ebé Governu ho povu Timor-Leste fó ba vítima sira husi inundasaun makas iha Austrália, liu-liu ba Estadu Queensland," dehan iha komunikadu de imprensa ne'ebe jornal ne'e simu.

Nota ne'e hatutan katal, "Konsellu Ministru Timor-Leste nian deside iha semana kotuk atu fó $500,000 hodi tulun autoridade Australianu sira atu bele enfrenta dezastre no hato'o solidariedade ho vítima sira inundasaun nian."

“Governu Austrália hato’o obrigado ba Timor-Leste ba kontribuisaun ida ne’e, ne'ebé reflete apoiu ita fó ba malu hanesan nasaun viziñu iha tempu susar ka dezastre nia laran,” Sra McCourt tenik.

Tuir ninia hanoin katak, "Inundasaun ne'e kauza trajédia ba Australianu sira nia moris ho uma kain rihun ba rihun, ho tan negósiu barak maka afetadu husi inundasaun, ida ne'ebé sei kontinua hanesan ameasa boot ba Queensland no Victoria."

Iha parte seluk Prezidenti da Republika antes halo vizita ba Singaopura ho Malaysia iha semana ne'e ba Tempo Semanal iha Aeroportu Nicalao Lobato dili dehan ne'e hanesan jestu de solidaridade ida husi nasaun ki'ik no ki'ak ne'e.

Nia espera katak osan ne'ebe tuir nasaun bo'ot ninia valor ki'ik liu ne'e bele uza hodi tulun vitima sira. "Hanesan dehan iha notisia katak dezastre ida ne'e maka'as duni hodi estraga komunidade ninia moris, ekonomia no sei lori tempu atu rekopera hikas maibe ha'u fiar katak ho akontesimentu ne'e sei halo povu Australianu hamutuk liu tan hodi rekopera hikas sira nia ekonomia," dehan horta.

Nia haklaken katak la iha ema ida mak imajina katak tempu ida nasaun hanesan Timor Leste bele tulun australia. Ulun boot Estadu Timor Leste ne'e mos hodi povu timor Leste ninia naran hato'o sentimentu solidariedade ba vitima dezastre iha Brasil no nia preokupa tebes ho mudansa klimatika ne'ebe hamosu dezastre iha nasaun barak iha mundu ne'e. (TS).