Polemika Rezignasaun Vise PM Carrascalao:Amo Belo Kurize Intelektualidade Lideransa AMP

Dili-Iha tempu okupasaun militar Indonezia iha Timor-Leste, Amo Bispo Don Carlos F. Ximenes Belo nudar figura Igreiza Katolika nebe dala balu halo kritika hasoru Governador Eng. Mario Viegas Carrascalao konaba kazu asasinatus ba Timor oan sira nebe akontese iha momentu Carrascalao asumi pasta nudar Governador Tim-Tim. Maibe agora koandu Eng. Mario Carrascalao hetan kritika makaas husi Primeiru Ministru Kay Rala Xanana Gusmao, hodi rejulta Eng. Carrascalao ninia rezignasaun husi pasta Vise Primeiru Ministru, Amu Belo sente triste tanba tuir figura igreza Katolika ne’e katak, kazus korrupsaun iha Timor-Leste sei buras liutan. “Hau triste rona notisia ida nee (rezignasaun Carrascalao), tamba wainhira ema konvida Eng. Carrascalão atu tama iha Governu AMP, ho objektivu ida, atu kombate “CORRUPÇÃO”: Maibé “corruptoresa sira matenek liu! “Corruptores” uza “estrégia diabólica” atu hasai tiha Eng. Carrascalão. Nuneé buat nebé ema bolu “Ética na Política” ou “Moralidade na Política” iha Naçaõ Timor Loro Sa’e la bele la’o e sei la la’o, tan ba ema barak lakohi atu korrupsaun lakon iha sociedade Timorense”, dehan Amu Belo ba Tempo Semanal via E-mail. Tuir Amu Belo hateten “iha Governu nia laran, Primeiru Ministru ka Presidente do Conselho de Ministros iha direitu atu halo “remodelação governamental”. Iha Governu nia laran, Ministrus ka Secretáros de Estado iha direitu atu husu rezignasaun. Maibé, buat nebe mosu daudaun iha Timor, halo hau triste oitoan.,wainhira hau rona katak ita nia governantes sira bolu malu ho liafun nebé hakanek ema nia sentimentu iha publiku”.“Hau triste tan ba, iha ita nia Nasaun, “Ukun Nain” sira bolu malu “Beikten”, “Bosoken” no “Barukten” iha publiku. Nuneé ita la fo “imagem” diak ba mundo, ba sociedade, no ba Foin Sae ( jovens) no labarik sira”.“ Hau triste tan ba, Eng. Mário Carrascalão, maiske nia iha Tempo Integrasaun” sai Gubernur Indonesia nian, nia mos serbisu ba Timor no ba Timor oan sira. Hau seiduak rona katak, Eng. Carrascalão ema corruptor, sosa Karreta, halo uma iha Indonesia, no favorese nian parente sira. Maibé, nia ema nebé bele fo kontribuisaun atu hamenus korupsaun, e ikus mai, nia mak sai fali beikten, bosokten...” “ Hau triste, tan ba, Jovens no Labarik sira simu daudaun lisaun aat nia hosi ema boot sira nebé devia fo exemplo de “BOA EDU¬CAÇÂO”. Se Boot ida, se Ukun Nain ida mak bolu nia maluk “Bosokten”, “beikten”; aban bainrua, jovens no labarik sira mos, too iha Governo ka Parlamento, sei bolu sira nia Superiores hanesan ema “beikten, no “bosokten”, “barukten”. “Ba ida nee, atan hau husu: Ita loke Eskola no Universidade atu halo saida? Atu eduka jerasuan ida nebé? Atu eduka jerasun nebe bele enriquece-an ho valores éticos ka, ou gerasuan nebé sai malkriadu no mal-edukadu? ita loke ba gerasaun nebé bele hadi’a sosiedade Timorense ho sira nia kopentesia no profissionalismo, nebé respieta o BEM COMUM ka gerasaun de corruptores , jerasaun de Beikten e bosokten?.”

“Hau nia konlusaum si­mples deit: Ita husu des­culpa ba malu, husu des­culpa ba jovens no la­barik si­ra, husu desculpa ba Povo iha Foho, e bele ka­rik, dad­a-an mos hosi Go­verno, e fo fatin ba ema sel­uk nebe iha Integridade intelektual, mo­ral; iha pa­siensia, iha res­peito, h­a­raik-an, no pro­nt­u atu fo exe­m­plu diak iha govern­asaun”, dehan Amo Belo iha ninia E-­mail ba jornal nee iha sezta feira semana kotuk. (t­s)