Saturday 22 January 2011

Arte Marsiais Ataka malu Uma Populasaun Lori Todan

Tempo Semanal-Dili, 22.01.2011

Mais ou menus tuku hitu dadersan ohin (22/01) mosu desturbiu ida iha hudi laran suku bairopite, besik akampamentu ISF ninia sorin no palasiu Prezidenti Aitarak laran nia kotuk. Iha akontesementu ne’e, komunidade deskonfia grupu arte marsiais ida maka halo atakes ba bairo hudi laran hanesan jestu ida hodi kontra joven ida ne'ebe baku malu ho arte marsiais ne'e ninia membru ida.

“kazu ne’e akontese mais ou menus tuku hitu dader. Warga sira halo atake mai baku rahun uma ne’e tan ba joven ida ne'ebe hela iha sorin ne’eba, ba baku malu ho Warga sira nia membru ida,” alega sra Mariana hamriik besik fatin uma ne’ebe baku rahun ne’e.

Kazu baku malu entre arte marsiais iha hudi laran bairopite ne’e fila-fila ona no dala balun rezulta halakon ema nia moris no harahun ema nia sasan. Uma hela Jose Caichola ho nia oan mane Jony Caichola nian hetan estragus maka’as husi liu tama too laran inklui dapur ho sasan tein fatin nian rahun total.

Mariana, “Devia ser warga sira ne’e ba buka problema ho ema ne’ebe halo problemas ho sira nia maluk ne’e maibe mai halo rahun fali ema seluk ninia uma.”

Iha meudia nota katak ema husi familias seluk maka aijuda tein no lori hahan ba foo ba familias ne’ebe sai vitimas husi problema grupu arte marsiais sira nia desturbiu ne’e.

Maiske sekretaria do Estadu juventude Desportu halo esforsu ona atu regulha grupu arte marsiais iha Timor Leste no iha loron 23 Juniu 2008 parlamentu aprova ona lei No.10/2008 maibe grupu sira ne’e sei kreia nafatin problemas ba komunidade ninia hakmatek. Lei ne'ebe promugadu husi Xefe do estadu iha loron 04/07/2008 ne'e iha artigu sanolu resin hitu nune'e duni maka governu aplika duni lei ida ne'e bele dehan grupu arte marsiais balun kona ona sanksaun. Ironia maka lei iha maibe iha realidade dalan luan atu ema viola.

“Loloos ne’e governu tenke uza medidas ne’ebe forte hasoru grupu arte marsiais sira ne’e tan ba ho sira nia atividades ne’e bele foo impaktu la diak ba povu nia moris no empata mos ema seluk ninia fiar ba nasaun ne’e nia estabilidade,” hatuir komunidade ida ne’ebe dehan ninia naran Armando hela iha Bairopite besik fatin akontesimentu.

Tuir observasaun patroliamentu PNTL kareta rua para hela iha besik fatin akontesimentu no joven ida ne’ebe deskonfia involve iha kazu baku malu ho membru Warga ida ne’e lori ona ba estasaun PNTL ninian hodi presta deklarasaun.

Dala barak komunidade deskonfia katak membru husi instituisaun seguransa ninian barak mos sai membru ba grupu arte marsiais sira nune’e duni maka iha sira nia atuasaun mosu solidariedade ho grupu ne’e hamosu desturbiu.

“Ha’u haree governu liu-liu polisia ninia atuasaun fraku hasoru ema sira ne’e entaun di’ak liu bolu forsa mai istika uit oan se la’e nasaun instituisaun estadu nian labele kontrola arte marsiais entaun foo deit poder ba arte marsiais maka ukun rai ne’e ba,” Armando soe viadas.

Prezidenti da Republika sempre halo esforsu atu hametin paz no estabilidade maibe grupu jovens ne’ebe hemu lanu buka problema kreia hela dezestabilidade iha capital nasaun ninian too aldeia hanesan kazu ne’ebe akontese iha letefoho, watulari, bobonaro, Vemase baukau iha fulan rua kotuk nia laran.
Iha Tinan kotuk mos grupu arte Marsiais Timor oan sira baku malu iha Jogya hodi rezulta estudante ida mate hodi lori hikas mai TL no iha fulan Juniu PM Xanana kondena maka'as lala'os sira ne'e. (TS)

1 comment:

Jano Buti said...

Pesan Jackie Chan di Stadion Nasional Dili: "Apabila anda menggunakan ilmu bela diri untuk membantu orang yang lemah maka anda adalah pahlawan tetapi jika anda menggunakan untuk saling menyerang dan berkelahi, sekalipun anda menang, anda adalah binatang".