Funsionáriu PDHJ Akuza Sebastião Halo Diskriminasaun no Abuzu de Podér

Dili, Tempo Semana

Tanba hakarak hadi'a pekadu Korrupsaun Kolusaun Nepotizmu (KKN) iha Instituisaun Governu nia laran, iha tinan 2005 Governu Fretilín liu husi Parlamentu Nasionál Noémia pesoál independente ida hodi ba tuur iha kadeira Provedór Direitus Humanus no Justisa (PDHJ) atu kombate KKN no violasaun direitus humanus, maibé daudauk ne’e mosu deskonfiansa katak instituisaun ne’e resik iha indikasaun mal administrasaun no Abuzu de podér. Públiku tomak hatene Instituisaun PDHJ ne'ebé xefia husi Dr. Sebastião Dias Ximenes daudauk ne’e hala’o hela promosaun iha fatin barak-barak hodi ko'alia kona ba Boa Governasaun ,Transparénsia no Igualdade, maibé faktus hatudu ema ne'ebé lidera Boa Governasaun ne’e iha mal jestaun no halo abuzu de podér.
Maski iha Estatutu Funsaun Públiku Kapítulu II Artigu 12 alínea 2 hateten, nomeiasaun ho kontratu sei lavale no soi efeitu bainhira la respeita lala'ok legál, maibé realidade hatudu iha Instituisaun PDHJ fó hela kontratu ba ema na'in haat (4) no la liu husi prosedimentu normál.
Karik ema ne'ebé fó fatin ba hahalok hirak ne’e sei hulan responsabilidade dixiplinár no Kriminál, hanesan haktuir iha estatutu funsaun públiku...?
Hanesan iha Lei funsaun públiku hateten, funsionáriu ne'ebé ho Habilitasaun Literária Sekundária iha direitu ba nivel trés (3), maibé tuir surat kontratu ne'ebé jornalista Tempo Semanál asesu nota katak, “iha loron 13/9/2010 PDHJ fó kontratu ba ema na'in 4, no husi ema hirak ne’e, na'in 3 mak hetan pozisaun ba nivel 4 maski sira ninia Habilitasaun Literáriu to’o de’it eskola Sekundária.”
“Ha’u sente Provedór halo diskriminasaun no abuzu de podér, tanba prosesu rekrutamentu ba funsionáriu na'in 4 ne’e la liu husi prosedimentu normál no pior liu tan ema ne'ebé uluk rezina an sira bolu fila fali” dehan funsionáriu PDHJ ne'ebé lakohi jornál ne’e atu publika ninia naran.
Hataan ba kestaun hirak ne’e, Provedór Direitus Humanus no Justisa (PDHJ) Sebastião Dias Ximenes ba Jornalista Tempo Semanál hateten, “ema hirak ne'ebé ami bolu ne’e uluk 'perna' tuir 'testing' iha PDHJ, maibé sira la liu iha prosesu ‘testing’, ne’e duni ikus mai PDHJ ho orsamentu asisténsia téknika ami presiza ema ne'ebé ke atu bolu mai servisu de’it, duke halo fali rekrutamentu ne'ebé ema barak mak sei tuir.
Di'ak liu ami bolu de'it ema sira ne'ebé uluk tuir tiha ona treinamentu no ami hatene tiha ona sira nia servisu entaun bolu sira mai servisu la'ós selu ho Item saláriu maibé selu ho orsamentu asisténsia tékniku no ida ne’e la'ós nepotizmu.
“La hatene Sr. Ida iha ne'e mós iha laran hotu karik, tanba nia mós iha kazu ida ne'ebé ami hatama tiha ona ba Ministériu Públiku no ema ne'e ami fó suspensaun ba nia tanba kazu mal administrasaun ne’e duni hein de'it funsaun públiku atu hasai nia. Maibé komu hein kleur entaun nia buka hela dalan oinsá atu estraga tiha instituisaun ninia naran no ha’u hatene ema ne'e se” dehan Provedór hodi haruka jornalista ba ‘Cek’ ema ne’e ninia naran iha komisaun Funsaun Públiku ema ne’e serbisu la tuir oráriu, ne’e duni kadavés ha’u fó ‘peringatan’ ba nia maibé nia sempre buka diskute ho ita.Nia uluk servisu iha administrasaun Finansas, ha'u rasik mak ba investiga nian tanba investigadór sira sente ladún di'ak entaun ha'u rasik mak investiga no lori kazu ba Ministériu Públiku no kopia ida ba Funsaun Públiku hodi trata hela para atu hasai ema ne’e,”esplika Sebastiao.
Provedor siik katak, “Parese ema ne'e mak fó informasaun ba imi tanba nia la komprende no nunka tama servisu entaun nia ladún akompaña saida mak ema ko'alia iha instituisaun nia laran.Ema ne'e ami fó ona suspensaun fulan haat, tanba tuir Lei kuandu hetan ona suspensaun nia labele simu saláriu durante fulan haat mais komu hotu ona entaun nia bele tama fali serbisu, maibé komu nia kontinua hala'o buat aat sira ne'e entaun ami haruka ba funsaun públiku tanba sira mak iha kompeténsia tomak atu hasai funsionáriu ne'e. Ha'u hakarak ema ne’e sai lalais selae bele estraga fali ema seluk kuandu la tama servisu hare tuir fali nia” haktuir provedór ho oin hirus.
Maski mosu deskonfiansa iha manipulasaun ba prosesu rekrutamentu, maibé Provedór ho fiar an responde, “ami atu bolu sira, maibé seidauk iha orsamentu ida naran asisténsia tékniku, ne’e duni kuandu ami fó esplikasaun ba Primeiru Ministru, maibé Primeiru Ministru dehan, “ ok... se imi la iha rekrutamentu osan ida ne'e imi bele bolu ema ida ne'ebé ke imi presiza atu suporta imi nia servisu no bele selu ho osan ida naran asisténsia tékniku, tan ne’e ne'e mak ami ba bolu fali ema ne'ebé ke uluk servisu ho ami.” Provedór konta tuir.
“Ha’u hanoin ida ne’e la loos karik tanba Primeiru Ministru hatene katak iha Instituisaun Funsaun Públiku ne'ebé atu fó rekrutamentu la'ós PM mak haruka, maibé Provedór mak hakarak hala’o buat ne’e hodi bolu ema de’it”tenik Funsionáriu PDHJ ne'ebé deklara an hanesan vítima ba atitude Provedór
Tuir esplikasaun husi funsionáriu ne’e, Se nia rezigna an ona konserteza nia nunka atu mai fali serbisu iha ne’e, maibé tenke ba buka serbisu iha fatin seluk tanba Lei la fó vantajen ba nia atu serbisu fali iha Instituisaun ida ne’e.
“Atitude ne’e viola ona Lei Funsaun Públiku, tanba funsionáriu ne'ebé tama uluk liu sira to’o agora ninia nivel ki’ik hela, maibé tanbasá sira ne'ebé tama ikus hetan fali nivel boot no pior liu sira tama la tuir prosedimentu legál, ne’e duni ami sente iha diskriminasaun no violasaun direitu, tanba bazeia ba Lei saida mak ema hirak ne'ebé tama ikus sira fó kontratu ho postu temporariu Grau D 1 eskalaun. Instituisaun ida ne’e la'ós Sebastião ninian, hodi nune’e nia bolu ema tama de’it hanesan uluk nia sei iha ‘kepala biru kepegaweyan’ tempu Indonézia nian ne'ebé nia halo ‘pegawai gelap’” kondena funsionáriu ne’e hodi hateten, Instituisaun ida ne’e hari iha ruin ho raan nia leten.
Klaru katak, iha estatutu PDHJ ko'alia kona ba transparénsia, igualdade hodi labele halo diskriminasaun, maibé realidade sira rasik halo diskriminasaun no la iha transparénsia.
Ho lian makas funsionáriu ne’e klarifika ba públiku katak, Lei la'ós ba funsionáriu ki’ik de’it, maibé ba ema hotu, tan ne’e ami sujere ba Provedór atu hadi'a jestaun no sistema serbisu ne'ebé la di'ak.
Akuzasaun ne'ebé dehan, “ha’u atu estraga Instituisaun PDHJ nia naran ne’e la loos no falsu, tanba ha’u la'ós atu estraga Instituisaun nia naran, maibé ha’u hakarak hadi'a mekanizmu administrativu no jestaun ne'ebé la di'ak. Instituisaun ida ne’e hari ho povu nia ran no ruin, ne’e duni informasaun ne'ebé dehan, ha’u atu estraga Instituisaun PDHJ la loos no falsu, tanba ha’u iha patriotizmu no nasionalizmu ba nasaun ida ne'e, la'ós hanesan sira ne'ebé la iha nasionalizmu no patriotizmu” esklarese funsionáriu ne’e ho pozisaun firmi hodi repete tan dala ida katak, nia nunka iha hanoin atu estraga Instituisaun PDHJ maibé hakarak ezije transparénsia ba ema hotu.
Agora daudauk sira taka Panfíliu iha fatin hotu-hotu hodi hala’o promosaun kona ba Boa Governasaun, maibé se ema ne'ebé lidera Boa Governasaun ne’e rasik halo abuzu de podér hodi taka buat hotu, entaun hanesan auditór oinsá mak ami bele ba hala’o investigasaun iha Instituisaun sira seluk.
Durante dada lia ho jornalista Tempo Semanál, funsionáriu ne'ebé la satisfás ho atitude Provedór esplika liu tan katak, problema iha PDHJ la'ós de’it kona ba diskriminasaun no abuzu de podér, maibé akontese mós kazu seluk ne'ebé envolve funsionáriu PDHJ balu fa'an kupaun mina nian.
Alende ida ne’e ema balu uza kareta estadu nian ba vizita família iha Distritu, maibé bainhira kareta aat no mina la iha, sira mai foti osan estadu nian hodi uza no mós iha interese familiarizmu.
Se Provedór dehan ninia família ida mós la serbisu iha ne’e, entaun ninia subrinu ne'ebé nia bolu de’it ne’e se..?, tanba kondutór tebes-tebes mós sei tuir rekrutamentu mais ninia subrinu ne’e bolu de’it depois fó saláriu boot liu fali ema hirak ne'ebé serbisu tinan rua ou tinan tolu ona.
Ho razaun hirak ne’e funsionáriu refere fó konkluzaun katak, sistema de lideransa mak la di'ak, la'ós funsionáriu sira mak lakohi serbisu maibé la iha orientasaun, tanba buat hotu Provedór mesak mak hakarak hala’o. “Se buat hotu nia mesak mak hakarak hala’o, entaun Diretór, Adjuntu no Xefe Departamentu sira nia funsaun ne’e saida” tenik funsionáriu ne’e ho duvida.
Tuir esplikasaun husi Provedór katak, ita boot serbisu la tuir oras no dala ruma la tama serbisu loos ka lae..? sin.. ida ne’e klaru maibé orientasaun ne’e husi se, tanba se nia hakarak ha’u serbisu, maibé nia rasik la fó serbisu ba ha’u, depois nia haruka tan surat despaxu ida dehan, “ita boot iha direitu buka fali serbisu iha fatin seluk tuir ita boot nia saláriu, maibé ha’u la hetan entaun ha’u fila mai serbisu fali iha ha’u nia fatin tuir nia knaar mais tanbasá nia la fó”esplika funsionáriu ne’e ho lian makas. “Nia kondena ha’u tanba nia la gosta ha’u no ha’u sempre kontra nia, tanba nia hala’o diskriminasaun hasoru ha’u hodi viola fali ha’u nia direitu. Ha’u hakarak serbisu, maibé nia la fó orientasaun no ha’u rasik la hatene tanba saida nia (provedór) hasai despaxu ba ha’u” responde funsionáriu ne’e simu ho hamnasa.
Responde ba pergunta ne'ebé hateten, “provedór hasai despaxu ba ita boot tanba dehan ita boot sempre kontra nafatin nia, maibé funsionáriu ne’e rekoñese katak, sin.. ha’u kontra nia, tanba nia halo buat ida ne'ebé la klaru, maibé ha’u kontra nia tuir realidade ne'ebé iha, tuir ha’u nia funsaun no ha’u ‘loyal’ ba ‘Pinpinan’.
Maibé, se Pinpinan la hare ha’u nia ‘kesejateraan’ entaun ha’u ‘loyal’ hanusa, se ninia sistema la di'ak konserteza ha’u mós tama iha sistema ne'ebé la di'ak, maibé se ninia sistema di'ak mak ha’u nia hahalok lad'iak parese ha’u bele tama iha ninia sistema ne'ebé di'ak.
Iha parte seluk Diretór Jerál Sekretáriu da komisaun funsaun públiku Abel do Santos Fátima esklarese, tuir Lei bainhira seidauk to’o desizaun finál husi komisaun funsaun públiku ba prosesu dixiplinár ba funsionáriu ne'e segredu tantu ita boot sira hakerek hanesan ne'e de'it.
Responde ba kestaun husi provedór ne'ebé husu tenke foti lalais desizaun?..sin ne'e ami hala'o hela tanba ne'e ami nia funsaun no ami mak hala'o tanba prosesu ne'e la'ós ida de'it maibé atus ida resin ne'e duni la'o tuir ami nia kbiit. Kona ba keixa ne'ebé hato'o husi provedór ami iha ne'e hala'o hela maibé seidauk to’o finál tanba ladauk hetan desizaun husi komisaun da funsaun publika. Agora kona ba keixa ne'ebé hato'o husi Sr. Sebastião mai ona iha ne'e no Sr ida ne'ebé sira keixa ne'e nia prosesu sei la'o hela atu besik finál ona, mais sei falta uitoan bainhira to’o finál imi rona desizaun husi Presidente komisaun ho ninia komisáriu sira atu fó pena saida mak nian atu fó suspensaun tinan ida ka ou la halo pagamentu ba nia durante tinan ida ou rua.
Kona ba ninia prosesu pagamentu agora la'o hela no nia simu hela tanba uluk komisaun funsaun públiku ne'e seidauk iha konforme Sr. Provedór hateten mai ami dehan katak,” nia 'perna' hetan kastigu durante fulan haat ” maibé uluk ne'e komisaun seidauk iha entaun kastigu ne'e fó diretamente husi kada Ministériu idak-idak ba funsionáriu.

Prosedimentu Tenke Ho Regulamentu Ne'ebé Favorese
Provedór Direitus Humanus nu’udar órgaun independente ida ne'ebé imparsialidade, integridade no labele depende ba orientasaun Estadu ou Governu nian, maibé tenke tau rekursu humanu ne'ebé neutrál no labele funsionáriu públiku, tanba se funsionáriu Públiku tenke hala'o sumesaun ba orientasaun ruma husi ninia ulun boot sira atu nune’e bele hala’o serbisu ho imparsiál no neutrál.
Liu husi dada lia ho jornalista Tempo Semanál iha uma Fukun Parlamentu Nasionál semana kotuk, Deputadu husi Bankada CNRT Pedro Martires da Costa hateten, nu’udar fiskalizador tuir sira nia hare, prosesu rekrutamentu ba ema sira ne'ebé serbisu iha Instituisaun PDHJ di'ak liu tenke kontratadus no ema sira ne’e tenke iha dedikasaun atu promove direitus humanus iha Timor laran tomak.
Alende ne’e, instituisaun tenke iha prosedimentu ne'ebé instituisaun ne’e rasik mak kria atu labele iha diskriminasaun entre funsionáriu hirak ne'ebé servisu uluk ona iha ne'ebá no prosedimentu hirak ne’e tenke ho regulamentu ne'ebé favorese ba komunidade injeral, tanba instituisaun ida ne’e, instituisaun Direitu Humanu da Justisa ne’e duni sira ninia atuasaun no hahalok labele viola buat sira ne'e no labele halo diskriminasaun ba se de'it. “Sekarik iha buat ruma mak la’o ladún furak, ami rekomenda ba Provedór atu reviu buat sira ne’e, reviu prosedimentu no hahalok hirak ne’e hodi nune’e labele iha impresaun katak, sira hanesan instituisaun ne'ebé promove direitus humanus, maibé sira rasik mak viola ou kria uluk diskriminasaun violasaun direitu humanus iha Instituisaun nia laran.” Haktuir Deputadu ne’e hodi responde akuzasaun ne'ebé dehan mosu diskriminasaun no abuzu de poker iha Instituisaun PDHJ
Hataan ba pergunta ne'ebé hateten, oinsá membru Parlamentu nia hare se bainhira funsionáriu ida rezigna an ona, maibé bolu fila fali mai serbisu, Deputadu ne’e responde, “tuir ami nia hare ida ne'e kompeténsia Provedór nian, maibé ita tenke hatene oinsá mak iha altura ne'ebá nia rezigna an, karik tanba iha failansu ou inkapasidade mak nia rezigna an mós ami la hatene, maibé se nia ba tiha depois mai fali entaun ita tenke hare took, keta nia iha relasaun familiár ho provedór ou relasaun amizade ruma ho Provedór, tan ne’e tenke hare antes ita atu halo deklarasaun ba públiku katak mosu violasaun iha ne'ebá. ita tenke buka hatene no investiga uluk lai, razaun saida mak iha altura ne'ebá funsionáriu ne’e rezigna an no ba halo saida iha Indonézia depois fila mai husu tama fila-fali” tenik deputadu ne’e ho duvida. Se karik nia iha relasaun ruma ho Provedór ou karik nia iha família ruma mak serbisu iha ne'ebá, ne’e duni fasil ba nia tama fila-fali entaun ida ne’e presiza hare, tanba se iha duni indikasaun familiarizmu ou KKN iha ne'ebá, ha'u sente Provedór Direitus Humanu ne'ebé dehan Boa Governasaun ne’e nia mak 'melangar' uluk ona.
Iha parte Seluk Deputadu Manuel Tilman husi bankada Klibur Oan Timor Asu-wain (Kota) hateten, buat ne’e iha autonomia atu kontrata ema, depois iha kontratu pesoál tanba funsionáriu ne'ebé ba Indonézia no fila-fali mai ne’e la husu rezignasaun mais karik husu de’it suspensaun de serbisu.
Tuir Tilman, se nia husu de’it suspensaun de serbisu entaun nia bele husu ba tinan ida, depois nia ba tiha no liu tiha tinan ida mak nia fila - fali mós ida ne’e legal hela.
Se ema ne’e rezigna an maibé fila- fali mai mak Provedór nesesita no hatene katak ema ne’e bele serbisu fila-fali entaun ida ne’e mós loos hela. (ts)