Primeiru Ministru Kay Rala Xanana Gusmao hakerek ba Prezidenti da Republika hodi informa nomeiasau Ministra Financas DRA. Emilia Pires, hanesan responsavel ba atividades governasaun too nia fila husi vizita ba estranjeiru iha loron 11/03/2011.
Iha karta refere PM la temi lia fuan husu rezignasaun vice PM, DR. Jose Luis Guterres maibe sita de'it katak vice PM ne'e atu ba tuir prosesu justica iha Tribunal distrital Dili iha loron tempu badak.Haree ba lala'ok ne'e bankada opozisaun deklara katak Fretilin liu husi ninia lia nain DR. Jose Texeira hateten, "ema hotu iha direitu ba presunsaun inosensia, tan ba tribunal de'it maka bele halo julgamentu la'os publiku."
Maibe deputadu ne'e foo hanoin katak, "Ita agora daudauk ko'alia la'os kona ba ema halo sala ka la'e. Maibe ita ko'alia kona ba etika no responsabilizasaun governasaun nian."
Fretilin sei ezije nafatin atu Primeiru Ministru hasai ninia membru sira ne'ebe tama ona iha lista de investigasaun prokuradoria da republika ninian hodi so'e biadas ba eis Prezidenti da Republika ne'ebe ukun IV Governu konstitusional kona ba kazu rezignasaun DR. Mari alkatiri ho ninia membru seluk iha 2006.
"Hanesan Xefe do Governu de faktu ne'e gaba beibeik uluk iha elisaun katak nia goverrnu sei sai "mudansa" ba boa governasaun ida, nune'e mos gaba daudauk. Entaun loloos nia ezije ona rezignasaun husi membru governu ne'ebe hetaan investigasaun formal husi ministeiru publiku, especialmente depois membru Governu hetaan notofikasaun husi tribunal nu'udar arguido. Tan ba ne'e maka sasukat, nia rasik uluk foti bainhira nia ezije kedas rezignasaun husi eis PM iha 2006 tan ba de'it haree akuzasaun falsu iha reportajem televizaun Australiano ida naran four corners," relembra Texeira.
Deputadu ne'e akresenta no lian husu hodi dehan katak, "Nia ezije mos eis Ministro defeza no eis Ministro Interior tenke hasai, maske iha alegasaun de'it, la iha nem akuzasaun Ministeiru Publiku. Ne'e maka ninia sasukat rasik bainhira nia PR. Agora oin seluk tan ba sa?"
Ho lian maka'as deputadu ne'ebe mai husi partidu mais votade maibe la konsege kae'r ukun iha governasaun periodu 2007 no 2012 ne'e sadik Governu Xanana ninia atu haree hikas ba akontesimentu iha tinan lima kotuk.
"Maibe ninia hahalok agora daudaun husik hela membru Governu iha sira nia kargu maske akuzasaun seriu iha ona, mos iha impaktu negativu tebes ba imajen governasaun iha ita nia rain," deklara Texeira.
"Ita la'os ko'alia kona ba legalidades, ita ko'alia kona ba etika politika no governasaun. Ita presiza standarte izemplu governasaun no etika governasaun ida ne'ebe di'ak liu duke ida ne'ebe xefe do governu hatudu daudauk. Tan ba ne'e mos maka uluk nia promete maibe ikus mai la implementa fali."
Alegasaun kontra vice Primeiru Ministru sei hahu julgamentu iha loron 02/03/2011 ho maratona to'o loron 09/03/2011. (TS)
No comments:
Post a Comment