Prezidenti da Republika iha kalan bo'ot (11/03) hala'o hikas ninia kna'ar ne'ebe uluk veteranus Jornalista ne'e hala'o iha tinan rihun ida atus sia hitu nolu nia laran. Tuir observasaun Tempo Semanal ekipa Jornalista ne'ebe komandan husi prezidenti da republika ne'e kompostu husi ema nain ha'at hanesan DR.Jose ramos Horta, DR. Jose Mereles, DR. Joel Maria no fotografer ida.Besik tuku sanolu resin tolu DR. Jose Ramos Horta ne'ebe bele dehan hanesan jerasaun dahuluk ba jornalista Timor ninian ne'e hakat besik ba fa'an nain roda tolu ho roda rua sira ne'ebe para lina besik entre liuron bo'ot ho tasi ninin iha halihun bo'ot parte norte kaza eupeia ninian.
Eis autor ne'ebe hasai termus Mauberizmu ba defende ema ain tanan Timor oan sira nia direitu iha tinan tolu nolu liu ba kotuk ne'e, dada lia ho fa'an nain sira hodi husu tuir ema dalan ninin sira ne'e nia situasaun iha kalan nia nakukun besik hali hu'un oeste husi gabinete sekretariu do Estadu Juventude desportu ninian.
"Ha'u hakfodak haree prezidenti da republika mai ko'alia ho ami. Ha'u kontente ko'alia ho Prezidenti hein katak sei foo tulun ruma mai ami," dehan vendedor ida ne'ebe hanaran aan ho Atoi.
Vendedores sira ne'e ho hakfodak hodi haree ulun bo'ot estadu nasaun ninian ne'ebe deklara aan hanesan Prezidenti ba ema ki'ak ne'e la'o iha roman naton ahi nakukun ba dada lia ho sira.
"Ha'u fa'an iha ne'e kleur ona no toba iha ne'e kalan-kalan hodi hein no fa'an sasan iha hau nia tiga roda."
"Osan ne'ebe ha'u hetaan hodi sosa hahan, roupa no haree ha'u nia oan nia eskola," dehan joven ne'ebe besik tinan tolu nolu ne'e.
Lukru ne'ebe nia hetaan ladun bo'ot maibe konforme tempu de'it.
"Tempu di'ak bele hetaan to'o dua puluh ka tiga puluh dollar maibe sorte la di'ak no ema ladun rame entaun kala ida sorte liu-liu ema sosa lima dollar."
Iha karosa roda rua ne'ebe para besik Atoi nia sorin kuana nakonu ho sigaru LA, Malboro mutin, Surya 12, Filter, rapizadu, sugus, Mentoos ho beer abc, tiger, kokakola, aqua ki'ik no bo'ot ho katon mutin ida nakonu ho es fatuk ne'ebe hoba hela tua beer, kokakola, sankis, sprite.
Vendedor karosa roda rua no roda tolu sira sai hanesan didin ba liuron prinsipal kapital timor Leste ninian. Iha kalan ruma ema sempre ba tu'ur besik lecidere hodi hemu iha jardin.
"Ha'u mai beibiek iha ne'e tan ba anin di'ak no gosta mai hemu iha tiu sira ne'e tan ba hodi sosa sira nia sasan duke ita ba hemu iha restaurante karun no ema seluk maka hetaan osan," dehan Alex komunidade ida husi Dili ne'ebe tu'ur hela ho ninia belun sira iha besik jardin Nossa senhora Lecidere.
Iha karreta liu para hodi sosa sigaru no balun sosa bee aqua no balun sosa nu'u.
Iha parte seluk lala'ok prezidenti da republika ninian ne'e hamosu mos perguntas ba hakna'ar nain jornalista sira ninian. Iha fulan kotuk durante konferensia de imprensa ida iha aeroportu Nicolao Lobato Dili Jornalista sira mos hato'o ona lia husu ba Prezidenti da republika hodi kestiona publikasaun iha website Prezidensial ninian ne'e hanesan halo fali kompetisaun ho media sira nia servisu. (TS).
No comments:
Post a Comment