Tuesday 8 February 2011

Joventude Antusias Atu Tama PNTL

Tempo Semanal-Dili, 08.02.2011

PNTL hahu iha loron segunda feira (07/02) fahe formulariu rekrutamentus ba joventude sira mak iha hakarak atu sai hanesan membru ba instituisaun seguransa interna ne’e. Tuir Planu iha rekrutamentu ne’e instituisaun ne’ebe ho moto atu defende Lei ho Ordem ne’e atu rekruta novatus nain atus rua lima nolu husi kandidatus tomak.

Maibe tuir faktus hatudu katak joventude barak maka iha hakarak atu tama ba PNTL nune’e duni formulariu ne’ebe fahe ona iha loron uluk ninian sei la to’o.
Tuir komisaun organizador dehan katak formulariu rihun rua atus lima ne’e be prepara la suficiente no husu atu prepara tan rihun ida atus lima hodi distribui ba kandatus sira iha Dili laran.

Ho numeru dezempregu ne’e sei aas too lalehan klaran maka joventude barak maka halai ba partisipa iha rekrutamentus atu tama ba iha PNTL ho F-FDTL. F-FDTL mos foin lalais ne’e loke rekrutamentus foun ba notus nain atus neen maibe iha Distritu Dili de’it kandidatus ne’ebe rejista liu tiha ona rihun tolu.

"Ha'u mai koko atu tau naran hodi konkore ba tama PNTL tan ba ne'e hanesan dever ba hau nuudar Timor oan no mos razaun seluk hau la hetan servisu iha fatin seluk," dehan D. Soares hanesan kandidatu ida maka simu ona formulariu iha fatin rekrutamentu ida iha Dili.

PNTL daudaun ne’e iha ninia membru hamutuk rihun tolu liu no tuir sekretariu do Estadu Francisco Guterres iha tinan kotuk esplika katak Governu prepara ona lei rejime de kareira no lei ba reforma membru PNTL ativu maka tama daudaun ba idade atu deskansa tan ba ne’e presiza iha rekrutamentu hodi prepara foin sa’e sira atu prience fali vaga ne’ebe mamuk. (TS)

No comments: