Saturday 26 February 2011

SEFOPE Loke Feira, Loke Hanoin Juventude Ba Futuru

Tempo Semanal - Dili, 26.02.2011


Timor Leste ninia emar aumenta ba beibeik tuir dadus estatistika foun iha 2010 ninian nune'e hatodan liu tan mos problema numeru dezempregu iha nasaun ne'e tan ba ajensia ne'ebe hodi aijuda emprega Timor oan sira sei kuran. Tuir dadus ne'ebe iha populasaun Dili iha 2010 hamutuk 175, 732 maibe hafoin de sensus populasaun tinan kotuk, numeru ne'ebe iha estatistika aumenta hodi sa'e ba 234,231 habitantes.

Iha Timor Laran tomak ajensia ne'ebe sei emprega maka'as Timor oan sira maka depatamentu Governu ninian, setor defeza no seguranca inklui kompania seguransa nasional no internasional balun iha Dili no SEFOPE liu husi osan ba Servisu (Cash for Work) ba komunidade sira.

Tuir DR. Bendito Freitas, Sekretariu do Estadu Formasaun Profesional no Empregu dehan iha tinan 2010 de'it ema Timor oan ne'ebe buka servisu hamutuk rihun atus neen iha teritoriu laran tomak.

Atu fasilita no haberan foin sa'e sira ninia kuinesimentu sekretaria do estadu Formasaun Profesional no Empregu servisu hamutuk ho setor privadu no ajensia Governu ninian seluk loke feira loron rua iha GMT Dili hahu iha sexta too loron sabadu semana ne'e, hodi fahe informasaun ba foin sa'e sira.

"Ha'u haree Sekretariu do estadu ida ne'e iha inisiativa di'ak no kreativu tebes hodi halo netik bu'at ruma atu aijuda hasa'e kapasidade juventude sira ninian, tenta halo lei ruma hodi tulun trabaliadores sira no liu husi foo servisu kiik ba komunidade iha area rurais hadia rasik dalan no bu'at lubun bo'ot ida inklui hanesan buat ne'ebe ita haree daudaun agora iha ne'e," dehan Manuel dos R. X. da Costa, (37) besik portaun GMT ninian hafoin vizita ba feira ne'ebe hanaran Expozisaun Kareira ne'e.

Mahasiswa ne'e mos konkorda ho Bispo Baucau ninia hanoin hodi tane aas lala'ok murak sekretaria do Estadu ne'ebe ukun husi DR. Bendito Freitas ne'ebe mos hanesan lider ba gropu inteltual CNRT ninian ne'e, hodi dehan, "nasaun ne'e atu la'o ba oin presiza instituisaun estadu ninian ka'e husi ema individu sira maka iha hanoin atu servi no iha kreatitivade mos diciplina la'os hein de'it maun bo'ot Xanana ninia ordem. Ema sira ne'ebe hein de'it instrusaun ne'e sei la produtivu no ida ne'ebe halo mesak maibe kreia konfuzaun ne'e mos kontra produtivu."

Participantes husi feira ne'e mai husi ajensia oioin iha nasaun ne'e, hahu husi ajensia Governu no kompania privadu balun ne'ebe sei sai hanesan fatin potensial ba buka servisu nain sira atu hakna'ar aan ba iha futuru no agora daudaun.




Tuir observasaun feira ne'e hetaan vizita maka'as husi juventude no liu-liu eskola oan sira iha kapital nasaun Timor Leste ninian, hodi haree, rona no husu klarifikasaun ba ema hirak ne'ebe tau matan hela ba stand ida-idak iha salaun boot maka dekorada mos fahe tuir ida-idak ninia area.

"Ha'u kontente tebes hodi mai iha ne'e tan ba bele hetaan informasaun barak kona ba oportunidade buka servisu wainhira hau remata ona ha'u nia eskola," dehan Maria, estudante ida husi eskola sekundaria Paulus VI Dili.

Estudantes sira la'o tuir diciplina ho hmanasa fihir ba informasoens maka taka iha kuadrus no latan iha meja leten no wainhira seidauk kompriende sira husu ba ema sira ne'ebe hein hela fatin sira ne'e. Ho kontente mos ema sira ne'e hataan ba perguntas husi eskolantes sira ne'ebe fakar hela ba sira. Kmanek tebes responsabel ba fatin feira sira ne'e fahe pamfletus, hato'o esplikasaun ho sistematiku no klaru hodi halo vizitante sira mos dook ulun sinal kompriende. (TS)

1 comment:

Da Costa said...

Nasaun tu lao ba oin diak laos tu kria servisu dit ba sira nebe graduasi na husi escola secunsdaria deit mas liu-liu mos fo tulun moral ba sira nebe iha hakarak atu continua sira nian estuda iha Universitariu nebe iha qualidade atu nune bele lori nasaun ne ba oin iha tinan hirak tuir mai. Hanoin ne ba bainrua nian mos laos ba aban nian deit. Hare tok ba nasaun nebe desenvolve sira ne'e ema ba oin lais tamba ema nian matenek barak. bele compete iha mundo international. Nusa mak la cria programa ida para Timor oan bele compete mos ho ema husi strangeriu?