Tuesday 18 September 2012

David Representa F-FDTL ho RDTL iha Sudaun Fahe ninia esperiencia


Tempo Semanal, 18/09/2012

Iha Letratu ne'e liuron dalun iha Sudaun
 mos hanesan loloos dalan atu ba same
ho entre ainaro ho suai inklui liuron
 entre watu Carbau ho Iliomar

F-FDTL ne’ebe iha istoria naruk, ba libertasaun nasaun RDTL agora mos participa ona iha misaun ba Pas ONU ninian iha nasaun balun inklui Sudaun de sul.

Major David Leopoldo dos Reis Santos, partisipa iha misaun ONU iha Sudaun do Sul (UNMISS) hahu husi fulan Outobro 2011 to fulan Outobro 2012. Daudaun ne’e nia mesak mak representa TL ho F-FDTL iha misaun ONU nian iha Sudaun. Ita hotu hatene iha Sudaun agora situasaun manas tan ba manisfestasaun husi maluk muslim sira kontra film ne’ebe troza Nabi Mohammad. Maske nune’e David la hakfodak hodi hala’o nafatin ninia kna’ar hanesan Obserbador Militar nia kolakado iha fatin ida naran Unity State, quaze 1,200km husi capital Juba.

Iha Nasoeins hamutuk 35 mak contribui OBSERVADORES MILITAR hanesan: Timor Leste, Indonesia, Xina, Cambodia, Nepal, Australia, India, Papua Nova Guinea, Kenya, Tanzania, Rwanda, Alemanha, Canada, Norwegia, Swiss, Denmark, Hollanda, Namibia, Paraguay, Bolivia, Equador, Egypto, Yemen, Jordao, Moldova, Sri Lanka, Nigeria, Kyrgyztao, Italia, Korea do Sul, Japao, Russia, Ukraina, Inglatera ho USA.

La’os de’it hanesan obserbador Militar maibe nia mos hanesan embaixador TL nian iha UNMISS tanba nia mos aproveita oportunidade ida nia iha hodi introduce ninia nasaun TL iha rai liur. “Iha ema balun sedauk hatene diak TL iha nebe?” David dehan.

David dehan situasaun seguranca iha nasaun sudaun sei manas tan funu entre etniku sira, hadau malu rai no deskonfia injustica, discriminasaun ho korrupsaun.  

Situasaun sira hanesan David Ko’alia iha leten ne’e foo hanoin mai ita kona ba istoria no situasaun real daudaun ne’e iha Timor Leste ne’ebe iha Ukun Rasik Aan nia laran mosu tren foun ida katak populasaun lakon rai tan ema Timor Xinesa grupu ida maka uluk halai ba estranjeiru tan ba funu iha rai ne’e agora fila hikas ona mai ho advorada portuges sira nian hodi ezije sira nia rain. Tribunal dala barak liu foo vantajen liu ba ema riku sira ne’e hodi halo eviksaun obrigatoriu ba populasaun sira ne’ebe liu husi Taibese, kolomera, kampong Alor no Fatuhada ema bele asiste teatru populasaun hela dalan ninin. Situasaun hadau malu rai ne’e mos da’et on aba distritu balun iha nasaun ne’e no hetook aat liu tan balun foti kroat hasoru malu maibe espera katak Timor oan hotu-hotu sei la imita tuir esperiencia husi Sudaun do sul.

KKN no haberan grupu oligarki nani maka’as ba daudaun nune’e iha gap maka’as entre ema Riku ho ki’ak sira. Grupu riku no ukun nai sira sa’e karreta Luxu maibe populasaun barak mos sei susar atu hetan asesu ba centavus lima nolu loron ida iha area rurais. Injustica social mos buras. Mas ho espericia husi David ninian ne’e tulun parte hotu-hotu atu halo reflexaun ruma hodi evita Timor Leste tama hikas ba situasaun ruma kee semelante ho krize balu tan ba Timor Leste iha ona esperiencia kona ba Krize politika no Militar iha 2006.

David ninia servisu iha Sudaun sei remata iha fulan oin no nia mos konsege kreia ona relasaun amizade ho ninia belun servisu maluk husi nasaun seluk I nia estuda buat balun hodi hariku ninia kakutak iha area servico observador Militar nian no mos servico administrasaun balun. Nia espera katak esperensia sira ne sei uza hodi dezenvolve fali F-FDTL.

Nia hateten katak maske dook husi ninia nasaun ho instituisaun mos familias maibe nia sempre mantein ninia relasaun ho ninia instituisaun no kontaktu nafatin ho ninia maluk sira iha Quartel jeneral F-FDTL.

Nia hateten katak sitausaun ekonomia nasaun afrika ne’e susar hela tan ba iha Sudaun do Sul produz mina mas sira labele tranporte mina ba merkado internasional tanba Sudao Norte la fo accesso nia porto. Ita hotu hatene katak Sudaun do Sul nasaun ida tasi laiha ( LAND LOCKED COUNTRY ).”

Nia espera ho informasaun ida ne’ebe nia foo ba, Publiko sira, li-liu Timor Leste nia jovems sira, bele hatene saida mak agora Instituisaun F-FDTL halo. Passo saida mak agora instituisaun ida ne’e hakat tiha ona. Ho ida ne bele halakon persepsaun aat nebe karik mosu iha publiko kona ba instituisaun F-FDTL. Nia mos fiar katak ho ninia partisipasaun iha UNMISS, F-FDTL bele hetan konfianca liu tan husi mundo internsaional. Tuir mai mai ita ba akompania hamutuk intervista ne’ebe Tempo Semanal (TS) halo ho Major david (MD) :


TS: Funu sa ida maka mosu iha sudaun no hahu hodi bainhira?

MD: Funu iha Sudaun hahu iha tinan 1962 entre Governo Khartoum ho grupo rebeldes nebe hanaran SPLM (Sudanese People Liberation Movement). SPLM hakarak forma nasaun ketak ses husi governo Khartoum ne’ebe domina husi Arabe. SPLM iha ninia sanak militar ne’ebe hanaran SPLA (Sudanese People Liberation Army). Razaun husi SPLM revolta tanba durante hamutuk iha governo Khartoum ninia ukun, Sudaun parte Sul marjinalizado no riku soin mina ne’ebe quaze 90% produz iha Sudaun do Sul la benefisia ba ninia povu sira. Depois Sudaun do Sul ukun rasik an, SPLM mak sai partido nebe mak ukun i SPLA sai Forcas Armadas Sudaun do Sul nian.

TS: Tuir ami rona katak iha mos refujiadus barak. Karik tebes? oin sa ho situasaun refujiadus sira nian?

MD: Actualmente iha Sudaun do Sul iha refugiados barak mai husi provincia/Negara Bagian iha Sudaun Norte hanesan South Kordofan ho Blue Nile State ne’ebe agora daudaun mosu tiru malu entre forca governo Sudaun Norte ho rebeldes sira. Rebeldes sira ne’e hakarak forma mos nasaun ketak iha provincias rua ne’e. Refugiados sira ne’e hamutuk 180.000 iha teritorio Sudaun do Sul nian. Ho presenca refugiados sira ne’e aumenta problemas ba governo Sudaun do Sul tanba sira mos sei inferenta funu no problemas econmoia, sosial ne’ebe bo’ot. Agora daudauk agensia UNHCR ho NGO Internasional balun distribui ajudus umanitaria ba refugiados sira ne’e. Iha campo refugiados iha Sudaun do Sul kada loron ida labarik ki’ik bele estima ho minimu nain sanolu mak mate tanba moras i la hetan tratamento medico ne’ebe diak. Labarik sira ne mate tanba moras malaria, diareia no seluk tan.

TS: Funu nee entre sudaun ninian oan sira. karik iha mos parte estranjeiru ruma maka involve iha funu sudaun?

MD: Iha ne’e hau bele dehan funu sivil/guerra civil entre grupo etnikos. Iha etnikos prinsipal balun ne’ebe kompete hodi hadau malu cargos iha militar, policia ho agencias seluk inclui mos ba pozisaun presidenti da Republica. Etnikos sira ne mak hanesan Dika, Nuer ho Murle. Iha eis jeneral SPLA ida naran David Yau-Yau, husi etnico Murle, mak revolta kontra governo Sudaun do Sul tanba deskonfia governo ne’e nakonu ho diskriminasaun ho korupsaun. Agora iha indikasaun forte katak governo Khartoum suporta eis jeneral ne’e hanesan foo treinamento ho armas ba Yau-Yau ninia membros sira.



TS: Karik ita bele esplika uitoan kona ba informasaun ne’ebe dehan funu ne’e mos tan ba hadau malu rai. Ne’e oin sa?

MD: Problema rai iha Sudaun do Sul, la’os atu hari'i uma mas iha ne’e hodi hakiak animal  henesan karau ho bibi. Iha parte balun iha Sudaun do Sul rai maran dekor bee ho dut la iha durante tempo bailoron. Tan ne karau/bibi atan sira tenke lori sira nia animal hodi buka fatin nebe iha bee ho dut nebe suficiente. Iha neba mosu problema ona tanba sira tenke kompete ho karau/bibi atan seluk. Problema mak karau/bibi atan sira armado ho AK-47, tan ne se mosu lamentasoens ruma entre sira nune’e kilat mak sai hanesan solusaun ultimu.

TS: Oin sa ho situasaun seguranca iha sudaun en jeral?

MD: Inflasaun iha Sudaun do Sul agora aas quaze atinji 50% tan ba governo la iha osan. Razaun husi ida ne tanba iha fulan Abril liu ba governo Sudaun do Sul deside hodi hapara produsaun mina tan ba la hetan akordo ho Sudaun Norte kona ba taxa. Husi ida ne hamosu problemas barak inklui salario ba fungsionario/militar/policia selu tarde. Folin sasan sae i hamosu crime, hanesan naok, asalta uma, hadau sasan/osan. Ida ne’e foo impakto mos ba staff UN nian tanba sai hanesan "alvo" ba kriminozos sira.

TS: Durante ita iha sudaun mais ou menus situasaun sa ida maka todan liu ba ita boot. en termus de seguranca nunee mos phiskolojiu ita nian.

MD: Antes hau mai iha Sudaun do Sul, hau halao tiha ona treinamento kona ba misaun ONU nian. Ho hau nia treinamento sira ne’e hau preparado hodi infrenta qualquer situasaun ne’ebe mosu. Unico kestaun mak, iha hau nia servico fatin, hau mesak deit laiha maluk " TIMOR " oan ida hodi hau bele koalia TETUM ba. Mas ida ne’e la iha imapkto aat ba hau nia servico loron-loron.

TS: Sa ida maka susar liu ba ita boot iha sudaun?

MD: Iha Unity State, fatin ne’ebe hau servico ba, susar kona ba hahan. Distancia ba capital Juba quaze 1,200km. Espesialmente durante tempo udan estrada aat, la favorable hodi transporta sasan ho kareta. Stok iha merkado lokal limitado tebes, buat hotu-hotu susar. Mas nudar ema militar hau maneija hau nia aan hodi bele "SURVIVE" nafatin.

TS: Oin sa ita nia kontaktu ho ita nia familias iha TL? karik iha lia menon ruma ba ita nia familias?


MD: Hau nia komunikasaun ba TL durante ne’e diak tebes. Inklui ba hau nia familias ho kolegas sira. Ho ida ne hau la dun sente triste ou sente kesepian.

No comments: