Hillary Vizita Dili Monu Loos Iha Loron Masakre iha Igreija Suai

Tempo Semanal-Dili, 05/09/2012

Depois de liu tinan sanolu resin tolu povu, Timor Leste liberta ninia aan liu husi referendum iha loron 30/08/1999, ba dahuluk membru altu nivel ida husi governu Estadus Unidus Amerika sama ain iha nasaun ne’ebe kuinesidu iha mundu internasional ho naran Loro Sa’e. Iha tuku sanolu resin ida, Sekretaria do Estadu Hillary ne’ebe akompania ho jornalista na’in sanolu resin rua no ninia adjuntu ba rejiaun asia pasifiku sei ba hasoru malu ho Primeiru Ministru Kay Rala Xanana Gusmao iha Palacio do Governu.

Secretaria Estadu, Hillary Rodhan clinton simu
PM IV Governu Konstitusional Xanana
iha Washington (04/02/2011). Iha momentu ne'eba
 Hillary dehan Amerika sei apoiu
 sa ida de'it mak TL halo daudaun no promete
 sei apoiu nafatin nune'e kontente simu
 vizita Xanana ninian ba washington.

“Vizita senhora Hillary Clinton ne’e hanesan resposta ba konvite husi Primeiru Ministru Xanana ninian iha tinan kotuk wainhira PM vizita ba Amerika husu atu sra. Hillary atu bele mai participa iha ceremonia ba desima aniversariu restaurasaun independecia TL iha loron rua nolu fulan Maio maibe tan ba ajenda ninian nakonu ne’e mak nia labele mai iha momentu ne’eba,” dehan Antonio Nakoli Ramos wainhira halo briefing ba jornalista sira iha palacio do governu (05/09) dader tuku 11:00 OTL.

Durante ne’e Estadu Unidus da Amerika foo apoiu lubun ruma ba prosesu konstrusaun Estadu nasaun foun ne’e iha area dezenvolvimentu sistema demokrasia, direitus Umanus, boa governasaun, Edukasaun, Justica, forcas armadas no selu-seluk tan inklui tulun ba harii ekonomia liu husi green house iha Distritu aileu ho ainaro.

“Vizita ne’e importante atu hametin liu tan amizade entre nasaun rua. I Sra. Hillary ho ninia kaben eis Presidenti Bill Clinton iha ligasaun istoriku no emosional ho nasaun ne’e,” Nakoli hatutan.

Antes hasoru malu ho Primeiru Ministru iha salaun Konselho dos Ministru iha palacio do Governu tuir ajenda iha tuku sia minitu liu rua nolu resin lima Hilary sei kaer liman ho Presidenti Taur Matan Ruak iha palacio Presidenti aitarak laran.

Estadus Unidus da Amerika mos foo tulun maka’as ba liberdade de expresaun husi tulun dezenvolve meus de komunikasaun inklui gasta besik milaun lima ba treinamentu jornalizmu iha nasaun ne’e maske ninia resultadu hamosu perguntas nafatin.

Tuir fontes ofisial ne’ebe husu atu labele indetifika, informa ba jornal TS katak manu liras besi sekretaria Estadu Hillary Clinton sei tun iha aeroportu Nicolao Lobato Komoro, iha tuku neen minute haat nolu resin lima dader husi Xina. Sra Hillary ninia aviaun to’o uluk antes aviaun air north tun iha komoro. Husi aeroportu Sekretaria do estadu Clinton sei ba liu kedan embaixada Estadus Unidus Amerika iha bairo dos Kokeirus dili.

Maske nune’e ajenda de visita Hillary ninian sei sai segredu nafatin ba publiku inklui jornalista sira.  Tuir Observasaun jornal ne’e katak seguranca ba vizita ne’e maka’as duni kompostu husi PNTL ho Polisia Militar ho agencia sekretu balun ne’ebe ohin halo hela gladi bersih iha rute ne’ebe eis Primeira dama ne’e sei liu. Iha besik meudia konvoy ne’e ho sirene lian maka’as tesik husi tasi ibun ba diresaun lecidere ba para besik edifisiu CCT (Cooperativa Café Timor). Tuir planu Sra. Hillary mos sei vizita ba edifisiu ne’ebe durante ne’e halo esportasaun ba kafe Timor ba Amerika.

“Ne’e istoriku tebes tan ba Timor Leste hanesan nasaun ki’ik ida pela primeira ves hetan vizita husi membru nivel altu ida husi Governu Esatdus Unidus Amerika. Hanesan estudante ha’u kontente tebes,” dehan Gaspar Simoes populasaun ida iha Dili.

Eis Presidenti Bill Clinton uluk mai ona vizita Timor Leste hodi hola parte iha ceremonia 20 de Maiu 2002 maibe infelismente sra. Hillary Clinton ninia vizita monu loos iha aniversariu ba dala sanolu resin tolu masakre ne’ebe halo husi militia pro Jakarta no ninia aliadu sira hasoru populasaun ho relijiozus sira iha igreija Ave Maria Suai ne’ebe to’o ohin loron mezmu ONU ho Komunidade internasional la konsege tulun atu hetan justica.

“Espera Sekretaria Estadu Hillary bele aijuda ami hetan justica ruma. Labele hanesan ONU depois investiga hotu koko atu halai husi sira nia responsabilidade,” Agusto da Costa Estudante ida iha Dili natural husi Suai.

Da Costa esplika katak massacre suai ne’e iha responsabilidade komunidade internasional tan ba tuir akordu sinco de Maiu tinan rihun ida atus sia, sia nolu resin sia ne’e ONU mak foo responsabilidade ba TNI atu atende seguranca.

 “Komunidade Internasional labele dehan fali lider Timor maka tenke husu atu harii tribunal id aba krime graves iha TL tan ba ONU ho Komunidade internasional maka entrega Timor oan ba TNI ho ninia aliadu sira atu oho. Nune’e sira maka tenke responsabiliza atu harii Tribunal internasional ka oin sa ne’e sira maka dehan,” Da Costa informa.

Tuir Informasaun Sra. Hillary Clinton ninia aviaun sei husik hela Timor Leste iha oras balun depois de meudia.