Teme : Problema Boot Liu Mak Fraku Lina Koordenasaun

Ministru Administrasaun Estatal,
Jorge da Conceicao Teme

Tempo Semanal-Dili, 19/09/2012

Governu Central Bokur, Administrasaun local fraku no lider Komunitariu krekas. Ai knanoik ida ne’e la’os ona foun iha nasaun foun TL hafoin de restaura ninia independecia iha 2002. Hafoin de Tinan sanolu problemas ne’e mosu nafatin no hetook aat liu tan maka lina de koordenasaun entre ministerial iha nivel nasional too disttritu no sub distritu aat liu tan. Ministru Estatal, Jorge da conceicao Teme dehan katak problema bo’ot liu maka falta de lina koordenasaun nune’e duni maka tenke halo esforsu hodi hadia lina koordenasaun entre ministeriu ninia ajentes sira iha nivel nasional too distritu hodi bele servisu hamutuk.

“Ha’u bele dehan katak problema bo’ot liu ne’ebe ami identifika ona maka, iha pasadu la iha koordenasaun di’ak entre ministeiru ida-idak no administrador sira la hetan kuinesimentu administrasaun I dala ruma sira la informadu kona ba saida maka ministeiru sira halo iha sira nia distritu,” dehan Teme ne’ebe eis sekretariu do estadu ba rejiaun autonoma Oekuse ne’ebe iha Kintu Governu ne’e halakon tiha ona pasta refere.

Ministru Estatal ne’e partisipa iha reuniaun loron rua iha Otel Timor hodi konsulta ho adminitrador distritu distritu hotu2 hodi dada lia kona ba alokasaun milaun 59 Dollar Amerikano ba Projeitu Dezenvolvimentu Distrital ba tinan 2013. Ministru Estatal dehan konsultasaun ne’e di’ak teb-tebes hodi bele problemas iha distritu ida-idak nian. “Ami hakarak rona hanoin sira ne’e para estabelese kriteria ida ne’ebe di’ak hodi hili kompania ne’ebe iha kapacidade no nasionalismu atu hala’o PDD ne’e ho sucesu no kualidade,” dehan Teme.

Teme argumenta katak ema ne’ebe kurang nasionalizmu maka halo projeitu estadu ninian la hanoin uluk kualidade maibe buka uluk lukru ba sira nia aan. “Ha’u hanoin persyaratan pertama tenke kompania ka ema sira ne’e tenke iha nasionalizmu hodi iha sentiment ba estadu no povu. Se ema ida maka la terus iha pasadu nia sei halo sasan la ho kualidade no hakarak hetan osan ba sira nia aan de’it,” nia Argumenta.

Jorge Teme mos informa ba Jornal ne’e katak iha loron 20-21/09/2012 nia sei hala’o sorumutuk ho konselho konsultativu distritus ninian iha Oekuse. Iha ne’eba sei partisipa administrador distritu hotu-hotu sei partisipa atu ko’alia kona ba programa desentralizasaun ninian.