Friday 28 September 2012

VICE PRESIDENTI PN KARIMBADU MEMBRU GOVERNU INKAPACIDADE


TEMPO SEMANAL-DILI, 27/09/2012

ADERITO HUGO DA COSTA
VICE PRESIDENTI PARLAMENTU NASIONAL
Vice Presidenti Parlamentu Nasional, Aderito Hugo da Costa iha (27/09) ba jornalista sira iha Uma fukun Parlamentu hatoo kritika ida hasoru membru Governu sira ne’ebe propoin orsamentu bo’ot ba sira nia ministeiru maibe la iha kapacidade atu implementa sira nia orsamentu.
“Ida ne’e falansu ho inkapacidade, Tan ba ne’e husu ba Ministeiru Financas Favor ida atu haree kestaun ne’e. Se la’e ita gasta tempu naruk ba diskusaun. Maibe ikus mosu nafatin falansu,” Hugu apela.

Kritika membru parlamentu nasional mai husi partidu ne’ebe kaer hela V governu konstitusional ne’e halo barak la espera katak sei manas liu fali kritikas husi bankada opozisaun hasoru membru Governu sira.

“Antes ne’e ita bo’ot sira projeta orsamentu ho montante bo’ot. Maibe realidade ikus, iha justifikasaun la atinji sa ida maka antes ne’e ita bo’ot sira husu,” Aderito foo mensajen forte ida ninia governu.

Aderito Hugo ne’ebe mai husi Partidu mais votadu iha elisaun parlamentar loron 07/07/2012 ne’e aviza kedan ba Ministeiru Financas hodi estuda didiak uluk proposta orsaemntu sira no atu sukat ministeiru seluk sira nia kbiit no deside montante orsamentu maka razuavel antes apresenta ba debate no aprova iha parlamentu nasional nunee ba futuru sei hadia liu tan.

“Ba oin, labele akontese tan,” bolu Ministeiru Financas ninia atensaun.

Nia hatutan katak,” ida ne’e mos falansu iha ministeiru finacas. Tan ba antes ne’e la halo investiga ba planu ministeiru ne’ebe apresenta husi Ministru sira ikus mai mosu erro bo’ot.”

Realidade mosu duni tan ba iha IV governu konstitusional ninia tempu no iha  orsamentu jeral tinan fiscal 2012 ne’e governu propoin liu bilaun ida Dollar Amerika maibne ninia ezekusaun sei problema boot hela. Maibe sorte bo’ot tan iha tinan hirak kotuk IV governu konstitusional deskobre taktika pakote Referendum hodi hatoman tiha ho pakote dezenvolvimentu. Nune’e duni kuandu tama on aba fulan balun ikus iha tinan Fiskal ninian emprezariu Timor oan barak maka tuur iha hoteis sira iha dili laran hodi prepara aan ba projeitu emerjencia ka pakote ninian.





No comments: