Polimika UNTL : Dosentes Timor Oan Ameasa Greve Dosentes Malae Ezije Salariu

Tempo Semanal-Dili, 17/09/2012

Estudantes UNTL sira hein hela Dosentes (Photo File)

Edukasaun sai prioridade bo’ot ida iha nasaun TL maibe mos area ne’e sai hanesan primeiru problema bo’ot liu maka okupa hela ukun nain sira ninia kakutak. Problema Kualidade edukasaun sei hakdasak tan ba problemas ne’ebe edukador sira hasoru no tarde hetan resposta husi parte relevante.

Dosente Timor oan sira iha UNTL publikamenete deklara ona atu halo greve hodi la halo atividade atende estudantes sira wainhira governu la resolve sira nia problema iha loron sanolu ninia laran.

“Husu governu atu resolve problema rejime de kadeira iha loron sanolu ninia laran,” ezije dosente UNTL Timor oan sira liu husi porta voz Lourenco da silva, hodi anuncia resultadu enkontru entre dosentes sira nian.

Lei ba rejime de kareira ba dosentes nain atus tolu neen nolu resin tolu, presiza liu husi fali prosesu legal no tekniku ninian mak consume besik fulan sia desde presidenti da Republika promulga iha inisiu tinan ne’e.

Dosentes sira ne’e mos deskonfia iha lala’ok balun la loos iha lideranca UNTL ninian hodi halo tarde ba prosesu rejime de kareira refere nune’e maka dosentes Timor oan sira ne’e atu abandona sira nia dever hodi halo greve. Wainhira greve ne’e la’o duni hanesan ameasas husi dosentes sira ohin deklara ona iha kampus Kaikoli maka estudantes sei sai vitima.

Acting Reitor ne’ebe tauk ba ameasas husi dosentes sira ne’e dala ida tan promote katak dokumentus hotu haruka ona ba Ministeiru edukasaun hodi nune’e duni la kleur tan prosesu ne’e sei finalize.

Iha Momentu hanesan mos dosentes internasional sira husi Portugal no Brasil fulan haat ona seidauk simu vencimentu no ezije atu pagamentus ba fulan haat ninian. Tuir parte governu dehan katak sira la iha kuinesimentu ba kontratu ne’ebe UNTL halo ho profesorres internasionais sira ne’e. Tuir Vice Ministru Marcal katak UNTL halo akordu ho dosentes husi nasaun rua lian portuges ne’e la iha kuinesimentu husi governu.

Maibe to’o ikus acting reitora UNTL dehan sei selu vecimentu ba dosentes malae sira ne’e iha loron rua oin mai ninia laran. Dosentes malae sira ne’e simu vencimentu karun tebes kada fulan maibe Governu ho UNTL resolve lalais deit depois de dosentes Timor oan sira mos moe hodi lian maka’as kestiona dignidade nasaun ninian.