TS: Karik bele esplika objetivu principal vizita ba Xina nian mai ami?
DB: Foin dadaun governo Xina konvida Partidos sira iha Aliansa Maioria Parlamentar atu halo visita ba Xina. Visita de estudo ba Xina ba Xina hosi dia 6 to 16 de Novembro 2010 halo ho intensaun atu hare besik liu tan konaba desenvolvimento iha rai neba.
Objectivo prinsipal visita ne'e atu hare no estuda liu tan dezenvolvimento iha aspekto hotu-hotu iha Xina, liu-liu hosi parte politika, ekonomia, dezenvolvimento em geral no koalia assuntos relasionados ba problema sosial nebe mossu iha neba. Iha visita ne, alem de ba konhese mos historia Xina nian, vkontigensia ne vizita mos ZONA IPTEK, fabrika Aviaun Xian'xi, fabrika makinas pezadas infraestrutura nian ho seluk tan.
Iha diskussaun barak sobre dezenvolvimento hosi parte parte politika, mossu perguntas balun atu intende didiak politika Xina nian nebe hetan kritika bebeik hosi mundo internasional liu liu iha parte direitos humanos. Iha mos esplikasaun hosi professor universitarios balu katak sistem politiak Xina nian ne uniku no buka atu ajusta ba realidade nasaun ho povo Xina nian. Tanba ne’e, ema barak iha rai seluk la kumprende, tanba karakteristika Sosialista Xinese obriga governo atu manteim paz, establidade, hodi bele asegura povo nia moris liu hosi programa dezenvolvimento.
Ba ema Xina laiha buat ida mak aat ho sira nia sistema, tanba atu hametin paz, estabilidade no dezenvolvimento sira preciza iha sistema ida rasik ne’ebe bele asegura buat sira ne’e hotu. Sira mos respeita nafatin sistem demokrasia seluk ne’ebe rai seluk adopta no lakoi atu mete iha ema rai seluk nia problema.. Ba Xina, relasaun ho rai seluk baseia ba prinsipio de igualdade, no non-inteferensi iha assunto internal paiz idak idak nian.
TS: Duarnte iha Xina karik ekipa ne'e konsege hetaan ninia objetivu?
DB: Iha buat barak mak ekipa ne’e aprende hosi Xina, liu liu kona ba oinsa ita bele iha mentalidade ida diak hanesan estadista (negarawan) hodi dezenvolve ita nia nasaun. SIstema komunista/sosialista xinez la’os hanesan kapitalista sira sempre dehan katak aat no ladiak. Governo Xinez halo bebeik avaliasaun no mudansa ba sira nia sistema rasik. Sira mos rekonhese katak uluk sira halo salah barak, no agora sira hadia sistema . Ne’e hotu hodi garante povo bele moris diak no estabilidade be asegura iha sira nia rain. Hanesan paiz soberano, ita respeita Xina nia sistema tanba ne’e depende ba povo no ema Xina mak bele deside sobre sira nia futuro. Jadi objectivo vizita ne’e hetan duni objectivo tanba bele aprende buat barak hosi vizita ne’e.
TS: Sa ida maka ita bo’ot sira sei halo ho rezultadu vizita ne'e?
DB: Vizita ne’e hanesan vizita de estudo hodi halo komparasaun ba sistema ne’ebe ita iha ho sistema ne’ebe sira mos iha. maske Xina nasaun boot no riku, sira nia sistema la haneasn ho ita. Maibe iha buat barak ne’ebe diak mak ita bele aproveita, liu hosi maneira de sira maneja sira nia rain, ekonomia no establidade hodi asegura dezenvovimento (kesejahteraan) sira nia rain no povo.
Iha buat tolu mak ami hetan hosi vizitz de estudo ne’e katak Xina iha Governo ida ne’ebe forte, Disiplina ho ethos servisu povo nian ne’ebe maka’as no iha Lei ne’ebe forte hodi garante sidadaun hotu nia direito. Maske iha aspektu legislasaun ho direitos humanos rasik ema barak mak sei kritika maibe ne’e hare hosi objectivu sistema nian atu asegura estabilidae no dezenvolvimento, ita bele kumprende.
TS: Karik Ita bo’ot bele esplika, ekipa ne'e kompostu husi sese no tan ba sa?
DB: Membros partido CNRT ho AMP (PD, ASDT, UNDERTIM, PSD) seluk halao vizita ba provinsia boot tolu Chizuan, Xian'xi no Bejing. Kontigente AMP ne’e hamutuk ema nain walu ho naran hanesan tuir mai ne’e: Dionisio Babo Soares (Sekretario Geral CNRT); Feliz Sekywara Gusmao (Kord CNRT DILI) Jose Virgilio R. Perreira (Vice Presidente Juventude CNRT); Carlos Godinho (Vice Presidente Juventude PD) Elisabet Mendosa (ASDT); Francisco Salsinha ho Afonso Rangel (UNDERTIM) ho Adelino Amaral (PSD).
Membros sira ne’e, sira nia partido mak haruka no foo konfiansa atu bele hetan experiencia liu tan atu bele kontribui ba ita nia nasaun iha futuro.
TS: Karik ita sira mos ba haree oin sa atu bele Estadu TL bele hetan Imprestu osan husi Xina?
DB: Governu Xinez hatene katak ita nasaun ki’ik, maibe sira mos respeita ita nia soberania no hakarak iha relasaun ho ita hanesan nasaun nebe independente. Xina la iha ambissaun territorial ka amibisaun militar ba rai seluk. Sira iha problema barak iha sira nia rain ne’ebe sira tenki rezolve, hanesan kazu TIBET, kazu entre ethnis uha norte, povo ne’ebe sei kiak barak (por volta de 150 jutas). Tanba ne’e sira hakarak iha relasaun diak ho estado hotu iha mundo atu bele iha relasaun ekeonomia, loke merkadu para sasan tama no iha koperasaun ne’ebe fo benefisiu ba hotu-hotu.
Xina hanesan potensia ekonomia boot iha mundo, sai mos parseiro importante ida ba ita Timor. Nune mos Xina preciza atu trata Timor Leste hanesasn nasaun ne’ebe sira respeita hodi bele mos iha relasaun ekonomia diak ho sira.
Foin dadaun Presidente Ramos Horta hasoru malu ho Primeiro Ministro Wen Ja Bao iha Macau hamutuk ho paizes da lingua Portuguesa seluk. Xina promete atu fo 5o milhoes ba ajuda dezenvolvimento iha Timor Leste durante tinan hirak liu mai ne’e. Maibe ita mos tenki hatene aan katak ne’e mesmo mai hanesan grant (hibah) la’os signifiak katak ne’e saugati de’it. Iha relasoens internasionais ne’e hanesan jestu de kooperasaun ho tulun, maibe ita mos tenki resiproka ho jestu de komersiu seluk hodi bele mos fo benefisiu ba sira. Ne’e mak ema bolu benefisiu mutuo iha relasoens internasionais.
TS: Oin sa nu'udar Sekretariu Jeral Partidu ne'ebe agora ukun hela haree ba hanoin atu imprestu osan husi Xina hodi harii infraestrutura iha nasaun ne'e?
DB: Hau hakarak dehan de’it, se ita iha serteza katak iha tinan sanulu mai iha ossan atu dezenvolve ita nia rain, nusa mak ita tenki hein to tinan sanulu?.. Ita bele empresta daudauk ona mais selu ho osan ne’ebe ita sei bele hetan tinan sanulu mai. Se ita hein to tinan sanulo mak foin halo, sasan karun liu, problema sosial barak sei la rezolve no osan ne’e bele mos tiha hodi gasta ba buat seluk. Buat emprestimo ne’e normal no nasaun barak mak halo emprestimo hodi bele dezenvolve sira nia aan. Iha Europa, America, no mos Xina rasik, emprestimo ne’e sira halo ona. Hanesan Sekretario Geral Partido CNRT hau apoia totalmente saida mak Primeiro Ministro (Presidente Partido CNRT) halo tanba hau hatene nia iha intensaun diak atu hadia ita nia rain.
Ita preciza mak ajuda governo atu hadia sistema, planeia didiak, no halakon ema sira nebe hakarak aproveita hodi hariku aan. Tanba ba CNRT, ne’e osan povo nian no tenki uza ba povo nia moris. Se Xanana mak kaer governo nafatin, hau senti buat ne’e sei la’o diak liu tan hanesan ema ne’ebe luta hodi lidera nasaun ba independencia, hau laiha duvida no sei apoia hamutuk ho komponente CNRT tomak, no mos partido seluk atu bele alkansa objectivo moris diak no dezenvolvimento ita nia rain nian.
TS: Karik ita bo’ot bele esplika uitoan vantajen no dezvantajen husi imprestu ne'e?
DB: Laiha desvantagem hosi emprestimo ne’e, kuando ita uza ho diak osan ne’e atu dezenvolve ita nia rain. Indonesia deit, empresta osan dezde 1945 too agora mos sei empresta nafatin. Maibe ita empresta tanba ita hatene katak ita iha osan atu selu, rai seluk balun empresta mais tenki kelola fali osan ne’e hodi bele hetan lukro mak foin selu tanba sira nia osan la too atu selu dala ida deit.. Ba ita Timor laiha problema tanba ita iha osan, so ke osan ne’e so bele foti tinan hirak iha oin sedangkan ita preciza agora.
Ita preciza mak hadia jestaun no iha plano didiak. Tenki mos iha lei forte hodi kaer korruptor sira no hatama ba prizaun kuando sira komete korrupsaun. Ita preciza sosiedade sivil nebe forte atu halo kontrolo sosial no tau matan ba gastos estado nian atu nune’e, ita bele moris dame, iha estabilidade, dezenvolvimento no trankuilidade nia laran.
No comments:
Post a Comment