Prezidenti Horta Kondena Asaun Korea do Norte Hanesan Asaun Terorista Estadu

Tempo Semanal-Dili, 24.11.2010 

Prezidenti da Republika, DR. Jose Ramos Horta hodi povu Timor Leste nia naran kondena maka'as atakes ne'ebe halo husi korea do Norte hasoru ninia vizinu korea do Sul. "Ha'u hateten kedan, kondena enerjikamente asaun ilegal, kriminoju, perigozu Korea do Norte nian kontra Korea do Sul," Prezidenti Horta hato'o Pozisaun estadu Timor Leste, iha sala VIP aeroportu Komoro hafoin to'o husi vizita ba Melbourne Australia.
Prezidenti Timor Leste ho manu liras besi to'o hikas iha Dili ohin hafoin hala'o vizita ba Melbourne iha sexta feira kotuk (19/11) hodi foo kondekorasaun ba belun nasaun ne'e ninian iha luta ba Ukun Rasik aan Timor Leste naran David Scot.
Loriadu Nobel da Pas 1996 ne'e hein atu nasaun sira iha mundu atu hola pozisaun hanesan ho Timor Leste. "Ha'u espera que komunidade internasional tomak sei uza lia fuan maka'as kondena asaun ida ne'e," apelu Horta.
Ema Numeru primeiru iha nasaun Timor Leste ne'e dehan, "Korea do Sul relasaun di'ak ho mundu tomak. Relasaun di'ak ho Timor Leste."
Relasaun kmanek ne'ebe Timor Leste ho Korea do Sul iha ne'e hatudu liu husi apoiu de kooperasaun lubun ruma hanesan hari'i edifisiu Memorial no sira seluk inklui mos hamenus numeru desempregu iha nasaun foun ida ne'e ho servisu hamutuk entre Embaixada Korea no Sekretaria do Estadu formasaun Profesional no Empregu hahu haruka ona Timor oan barak maka'as ba servisu iha ne'eba nune'e Horta hateten korea do Sul loke duni matan ba Timor Leste. "Timor oan lubuk ida maka servisu iha ne'eba," Dehan Horta.
Eis Ministru Negosiu Estranjeiru ne'e hirus tebes nune'e dehan Korea do Norte sai hanesan Terorista ida. "Timor Leste tuir direitu internasional kondena maka'as asaun ida ne'e. Ita bele hateten asaun terorizmu estadu," nia esplika.
Iha parte seluk Prezidenti Estadu Unidus da Amerika iha Intervista ho Televizaun ABC dehan ninia nasaun prontu atu defende korea do Sul uza ninia tropas hamutus 28,000 ne'ebe iha hela nasaun atakadu ne'e maibe Obama sei ko'alia lai ho Prezidenti Korea do Sul ninian.
Tuir ajencia de Noticia Reuter katak Pyongyang dehan Seoul maka hahu funu ne'ebe oho ona soldadu Korea do Sul nian nain ruan no hakanek nain sanolu resin hitu sira seluk inklui populasaun Civil nain tolu. (TS)