Iha loron 22/11/2010 konvidadus sira hahu nadodon tama ba iha eis gabinete Oxfam kaikkoli, dili hodi hola fatin iha ceremonia lansamentu fatuk inan ba konstrusaun uma foun ba Komisaun Fungsaun Publiku. Konstrusaun ne'e hala'o husi kompania puru Timor oan na'in walu hanesan Clic, Baniuaga, Lux Clarita, Smen, Perola, Nagarso, Veteranu construction ho Rubi Construction ho total orsamentu ne'ebe aloka ona husi Governu ho total montante Dollar Amerikanu milaun tolu rihun haat nolu liu.
Tuir kontratu ne'ebe estabelese ona entre governu ho konsorsium ne'e determina katak durasaun ba konstrusaun uma andar tolu ho ninia medida 30 X 50 ne'e sei remata iha fulan sanulo resin rua nia laran.
Primeiru Ministru Kay Rala Xanana Gusmao iha fulan dahuluk tinan ne'e iha Delta Nova Dili trata emprezariu Nasional ne'ebe hari'i kompania maibe sempre backing husi kompania estranjeiru Indonesia, Singapora, Xina ho Australia. Tuir observasaun PM Xanana ninia ko'alia ne'e iha razaun wainhira haree ba ema Timor hari'i kompania hodi buka de'it projeitu husi Governu no atu tuir tender osan ba bill security ho bank guarantee foo husi kompania estranjeiru no Timor Oan maka manan persen de'it. Maibe Rui Castro dehan la iha ema estranjeiru ida maka backing sira iha exekusaun projeitu ida ne'e no sira rasik maka tau sira nia osan. "Hanesan Timor oan ami tenke bele, tan ba rai ne'e ita nian," dehan Rui. (TS)
No comments:
Post a Comment