Ohin KM Extraodinaria Aprova OJE 2011 Milaun $985 no KM Kuarta Evakuasaun Emerjencia ba estudante TL oan Iha Jogyakarta



PM IV Governu Xanana Gusmao

Tempo Semanal Kinta, 11.11.2010
Ohin loron 11/11/2010 IV Governu RDTL hala'o sorumutk konsellu dos Ministrus (KM) extraordinaria hodi aprova orsamentu Jeral do Estadu ba tinan 2011. Total alokasaun orsamentu hamutuk milaun 985 dollar Amerikanu ne'ebe fahe ba kapital dezenvplvimentu ho total milaun $405.924, fundu infraestrutura milaun $317,306,  milaun $25 ba kapital dezenvplvimentu ema nian, salariu ho vencimentu hamutuk milaun $115.909, tranferencia publika hamutuk milaun $164.456, kapital minor milaun $28.252, no iha tan rubrika ba salariu i vencimentu ho montante
milaun $270.459. Maibe iha konsellu dos Ministru ordinaria loron Kuarta feira KM deskute no aprova asuntus ompornte 6 inklui ba Evakuasaun emerjencia ba Estudante Timor oan sira iha Jogyakarta indonesia. Tuir komunikadu de imprensa ne'ebe foin kalan ne'e tama iha meja redasaun Tempo semanal Governu deklara, "Vulkaun ne’ebé nakfera iha Foho Merapi hetok sai boot liu tan. Haré ba risku ne’ebé bele mosu ba ema hirak hela iha ne’ebá, mak Governu Indonésia hasai dekretu ida konabá Estadu Emerjénsia iha Provinsia Jogyakarta no hala’o planu evakuasaun iha fatin sanulu resin."
Nota ne'e ne'e rekuinese, "dezastre natural, ne’ebé oho ona ema indonesia rihun ba rihun, bele sai mos perigu ba ema timor oan besik nain rihun ida atus rua, ne’ebé mak estuda hela iha Jogyakarta, hodi sira haré risku ida ba sira nia moris no sira nia saude komprometidu hela tanbá rai-rahun, partíkula no suar hirak hosi vulkaun nian ne’ebé mak nosivu tebes ba saude publika."
Haree ba gravidade hosi faktu hirak ne’e, mak Governu Repúblika Demokrátika Timor-Leste, liu hosi Grupu Interministeriálne’ebé kompostu hosi Ministériu Negósiu Estranjeiru, Solidariedade Sosial,Edukasaun, Finansas no Saúde, no hosi Gabinete Vise Primeiru-Ministru ba Asuntu Sosial, elabora tiha ona planu aksaun nian ida atu “konsulado bele proteje sidadaun timor oan hirak hela iha rai-liur ne’ebémak hasoru hela perigu ba sira nia moris”.
Komunikadu ne'e mos informa katak Governu no povu Timor Leste hatudu solidaridade ba vitima dezastre naturais iha indonesia hodi foo tulun, "osan hamutuk dolar amerika tokon ida, ne’ebé desidi iha Konsellu Ministrus liu ba, atu haruka ba Repúblika Indonésia, hodi bele tulun populasaun hirak ne’ebé afetadu no atu hamenus efeitu hirak nefastu kona-bá duplu dezastre naturál (rai-nakdoko hamutuk ho tsunami no vulkaun nakfera) ne’ebé sobu illa Sumatra no Java."
Iha dezastre Tsunami Sumatra tinan ruma kotuk governu ho populasaun Timor Leste mos haruka ona sira nia apoiu ba populasaun Indonesia ne'ebe maka sai vitima iha momentu ne'eba. (TS)