ANALISIS BA RJA IHA RDTL: APLIKASAUN BA KAZU MAC'S METALCRAFT PTY LTD

ANALISA HUSI REDASAUN TEMPO SEMANAL

Iha loron 27 Novembru 2012 Jornal tempo semanal publika artigu ida kona ba  “Ministra Finansas Emília Pires Aprova Fundus Ba Nia Kaben hodi nia kompanhia bele fronese kamas ba Ministeriu Saude.

Hahu loron neeba to'o agora, polemika bo'ot mosu iha internet, liliu reasaun husi maluk mala’e barak, ne’ebe buka atu justifika Ministra Emilia nia hahalok, no defende nia maka’as.  Barak argumenta oioin katak leis RDTL la bandu Ministru ida nia kaben bele hetan kontratu no afirma katak Ministra Emilia la viola lei ka la halo buat ruma sala tamba "nia la hatene" ka nia "la envolve" prosesu fo kontratu ba nia kaben.

Se Sra Emilia iha konhesimentu ka lae, ne’e kestaun ida ne’ebe maluk sira bele analiza no deside liu husi dokumentus ne’ebe publika, no husi ita hotu-hotu nia konhesimentu kona ba Timor-Leste nia vida ne’ebe ki'ik tebes.  No mos husi iha deklarasaun membru governu balun no funsionariu publiku balun sira nia deklarasoens oioin ne’ebe sira nega katak sira "la iha konhesimentu kona ba prosesu aprovisionamentu ida nee".  Ema barak liu mak "la iha konhesimentu" maibe iha fatin ki'ik hanesan Timor-Leste ita hotu-hotu hatene katak, dala baral ita barak liu mak iha konhesimentu.  Kestaun ne’ebe importante mak ne’e: se mak ita fiar iha konhesimentu maibe nonok deit? No: bele nonok hanesan ne’e deit ka la’e?

Maibe agora dadaun  iha kestaun juridiku balun ne’ebe ita presiza analisa kona ba kestaun ida ne’e hodi hatan maluk malae balun nia afirmasaun kona ba Sra Emilia nia inosensia nu’udar anju ka santa iha assuntu ida ne’e.

Lei ne’ebe relevante mak lei 10/2005 kona ba Regime Juridiku Aprovisionamentu ("RJA") ne’ebe altera mos ho Lei 24/2008.

Artigu 5, alinha 1. RJA nian tau obrigasaun bo’ot ba agentes estadu nian atu asegura katak sira sei tau "maxima satsifasaun nessesidade kollectiva (povo no estadu tomak nian) ne’ebe lei fo fiar no fo knaar ba sira."  Nee siginifika katak agentes estadu (ne’ebe inklui mos membru governu no hanesan mos funsionariu publiku) tenke matan moris, neon moris iha tempo tomak hodi hare se iha buat ruma ne’ebe bele la atinji objectivu ida ne’e.

Artigu 6, exige katak agente estadu tenke halao knaar iha aprovisionamentu ho "boa fe" (ho laran mos ka ho laran diak) no asegura katak estadu no povo tenke hetan benefisiu husi orsamentu ne’ebe atu gasta, no tenke tuir folin ne’ebe atu selu.

Artigu 7, exige katak iha prosesu aprovisionamentu tomak agentes estadu tenke hatudu transparensia no halau publikasaun ka loke ba publiku kedan prosesu desizaun atu fo projetu ba se se deit.  Ida nee atu evita subar porjetu, ne’ebe ema hotu-hotu gosta gaba a'an katak transparente los.

Artigu 9, affirma katak partes hotu iha prosesu aprovisionamentu bele, alem de responsabilidade kriminal, mos hetan sansaun civil, finanseira no disciplinar se viola RJA.  Ne’e la limitado ba ema ne’ebe envolve diretamente ho prosesu maibe sira ne’ebe iha knaar atu tau matan ba sistema no prosesu aprovisionamentu.

Artigu 11, ezige katak agentes estadu tenke kumpri ho prinsipius no normas jerais iha RDTL nia leis no regulamentus tomak.  Tuir artigu ne’e, RJA aplika nudar regra basica de’it no hatutan de’it applikasaun leis seluk ne’ebe iha vigor iha RDTL.

Artigu 16 mak artigu ida ne’ebe importante tebes kona ba kna’ar Ministra Finansas nian iha prosesu aprovisionamentu hotu-hotu.  Kna’ar balun tuir arigu ne’e ne’ebe importante mak hanesan tuir mai:

1.    Exekuta politika aprovisionamentu governu nian no apresenta porposta kona ba ida nee;

2.    Dada atu tau matan ka konsulta no halo'os prosesu aprovisionamentu ruma ne’ebe la’o la los, maske nia fase iha neebe ne’ebe deit, hodi garante harmonia ho politika governu nian kona ba aprovisionamentu.

Efeitu artigu ne’e atu exige katak Ministra Finansas labele taka matan ka nonok deit ba prosesu aprovisionamentu ne’ebe-ne’ebe de’it, tan ba iha dever atu intervem hodi asegura katak aporvisionamentu hotu-hotu la’o tuir dalan loos no tuir politika diak ba estadu no povo Timor-Leste nian.

RJA permiti Governu atu delega kbi'it no kna'ar ba aporvisionamentu ba agensia seluk nu’udar prosesu desentralizasaun (hare artigu 10 no 20 RJA).  Maibe artigu 21, alinha 4 affirma momos katak "entidade ne’ebe delega sei iha nafatin responsabilidade  atu kumpri ho lei iha prosedimentu aprovisionamentu idaidak ne’ebe halao husi orgaun ka entidade seluk ne’ebe hetan delegasaun atu halao aprovisionamentu rasik."

Artigu nee realsa, responsabilidade ikus liu hotu-hotu Ministeiru Finansas nian ba prosesu aprovisionamentu hotu-hotu, no exige katak tenke halao kna’ar nud’uar fiskalizador bot liu hotu-hotu kona ba agensia hotu-hotu nia servisu aprovisionamentu. 

Nee’ signifika katak Ministra Finansas labele taka matan ka fase liman de’it ba prosesu aprovisionamentu ne’ebe-ne’ebe de’it no tuir mai dehan katak nia la iha envolvimentu ka la hatene prosesu aprovisionamentu ne’ebe refere.

Artigu 31 RJA affirma katak agentes estadu labele hola medidas ka asaun ruma ne’ebe avansa fali posisaun konkorrente ida iha prosesu aprovisionamentu ruma.  Ne’e signifika katak labele tulun iha aspektu ne’ebe -ne’ebe deit atu halo prosesu ruma la’o ba oin ho benefisiu ba parte ida.

Artigu 32 tatoli oinsa agente estadu sira tenke evita konflitu interesse.  Konflitu interesse ne’e bainhira agente estadu ida hetan a'an iha situasaun ida ne’ebe nia ka nia maluk bele benefisia husi agente nia kna’ar hodi halo desizaun ruma ne’ebe envolve osan estadu nian.

Alinha 1. affirma katak agente estadu hotu-hotu tenke kumpri mos ho regras Estatutu Funsaun Publika nian kona ba konflitu interesse bainhira halao kna’ar iha prosesu aprovisionamentu hotu-hotu. 

Tan ba nee mak alinha 2. a) artigu 32 deklara katak: "Iha prosesu aprovisionamentu Servisus Publikus labele envolve iha asessoria oinsa deit husi ema hanesan" "parente to'o grau rua ra'an hanesan." 

RJA hatutan situasaun ne’e, bainhira afirma iha alinha 3. artigu 32 katak: "Servisu Publiku labele adjudika kontrato ba familiares too grau rua ra'an hanesan ka sosiu konsultor nian ne’ebe envolve halao kna’ar neebe-neebe deit iha prosesu aprovisionamentu."  Nee signifika katak agente estadu hotu-hotu ne’ebe partisipa iha prosesu aprovisionamentu husi hahu, bainhira halo proposta to'o remata, fo projectu ba fornesedor, sira hotu-hotu labele iha relasaun familiar ho ema ne’ebe manan kontrato. 

Tamba artigu 16 RJA ne’ebe exige katalk Ministra Finansas iha kna’ar bo’ot iha prosesu aprovisionamentu hotu-hotu, no artigu 21. alinha 4 ne’ebe afirma katak maske delega ka desentralisa, entidade bo’ot liu hanesan Ministra Finansas tenke assume responsabilidade nafatin, entaun susar tebes ba Ministra Finansas atu bele dehan "la hatene" ka "laos hau mak envolve" iha prosesu aprovisionamentu ruma. 

Iha situasaun hanesan ne’e ita bele dehan katak porsesu ne’e, iha kintal ida deit nia laran, ne’ebe ministeriu ne’ebe sosa sasan rasik, hanesan mos ministeriu finansas iha kintal ida deit nia laran hotu.  Saida mak akontese iha kintal ne’e nia laran, sira hotu-htou mak tenke responsabiliza tuir lei RJA.

Artigu 35. alinha 1. afirma katak se iha momento ruma ka iha faze prosedimentu agentes estadu ne’ebe iha kontrole ba aprovisionamentu konsegue detekta komportamentu ruma ne’ebe inkompativel ka iha konflitu interesse, entaun tenke husu ba autoridades kompetentes atu deklara aprovisionamentu nulu, ka atu hamate prosesu ba oin. 

Alinha 2. artigu 35. afirma katak depois tenke halo kedas investigasaun kona ba prosesu ne’ebe la’o la loos hanesan detekta tuir artigu 35. alinha 1.

Analisis ne’e ba artigu balun RJA tomak nian, hatudu mai ita katak RJA nia intensaun atu:

    1.  Asegura transparencia no justisa tomak ba prosesu aprovisionamentu, hodi hotu-hotu bele fiar katak hotu-hotu iha oportunidade hanesan no estadu nia osan atu gasta ho didiak no ba propositu ne’ebe benefisia povo no estadu RDTL;

    2. Assegura katak agentes estadu nian labele se'es husi prinsipius hirak ne’e tamba prosesu aprovisionamentu ne’e inter-dependente ka depende ba malu ho ministeiru ida idak ho ministeriu finansas, tamba sira iha kintal ida deit nia laran, la’os kintal keta-ketak;

    3. Agente estadu ne’ebe iha responsabilidade bo’ot tuir lei, hanesan Ministra Finansas tenke tau matan no ikus mai responsabiliza katak prosesu hotu-hotu la’o tuir lei no prinsipius diak aporvisionamentu nian.   

Bainhira ita hare ba artigu hirak nee, ita bele hare katak maluk sira, liliu maluk malae sira ne’ebe defende Ministra Finansas molok nia mos koalia buat ruma ba publiku, la kompriende no la hatene komplexidade Timor Leste nia lei nian.  Tan ba Timor Leste nia lei buka kaer metin etika no transparensia ba agente estadu tomak iha prosesu aprovisionamentu la’os deit ba sira ne’ebe halo desizaun formal maibe hotu-hotu ne’ebe iha kna’ar iha governu kona ba aprovisionamentu.

Ita hein katak ida ne’e bele tulun maluk sira hodi bele kompriende diak witoan katak la’os simples hanesan balun dehan: "laos nia mak halo desizaun fo projetu ba nia kaben" ka "PM mak aprova fundus, nia assina deit surat ba Vice Ministra saude." Tan ba ne’e mak KAK tenke investiga, tamba hanesan Adjuntu Kommissariu mos fo intrevista ba Tempo Semanal, KAK mos hatene ona.

Maibe la’os deit membru governu deit mak bele hetan sansaun husi tribunal.  Asesor internasional balun ne’ebe iha konhesimentu maibe la foti intervensaun ruma hodi halo'os nia papel mos ita tenke kestiona makas.

Maluk sira ne’ebe iha oportunidade hare tiha ona Relatorio husi Deloitte kona ba sistema aprovisionamentu iha governu nia laran mos hatene ona katak ministeriu Defesa no Seguransa no Agricultura No Pescas viola RJA dala barak hahu 1 Janeiru 2009 to'o 30 Junhu 2011. 

Kazu Ministra Emilia nian ne’ebe Tempo Semanal reporta ne’e kazu ida tan, maibe kazu ida ne’ebe konkretu tebes ba buat barak ne’ebe Deloitte temi no ne’ebe tenke sai mata dalan ba investigasaun iha detalhus ba hahalok aprovisionamentu iha governu nia laran, tan ba dokumentos hatudu sala balun iha prosesu no sistema nee’be Deloitte temi lalais deit iha relatoriu iha hakerek badak.

Ita hein investigasaun hodi bele hatudu lia los iha tempo badak tuir mai tan ba estadu direitu demokratiku no transparensia nia futuru mak iha risku se husik lao deit sem investiga.   

Nota: Maluk balun bele dehan analisis ida ne'e ho intensaun maibe favor ida konsulta ho leis ne'ebe iha hodi interpreta.