Wednesday 12 December 2012

Programa V Governu latemi kona-bá polítika defeza foun ba Timor-Leste!


By: Francisco Lemos Dos Santos

Iha tinan ruma kotuk IV Governu konstitusional
deklara katak Prioridade ba area defesa
maka haberan kbiit ba komponente
Naval F-FDTL hodi sosa roh husi Xina no Korea do sul
nune'e mos salin milaun ba milaun ba kompania
 husi Sydney hodi harii portu temporariu
 iha hera maibe kompania nain no deskonfia
ema timor oan balun ne'ebe involve iha
 projeitu refere hetan ona lukru maibe
Portu Temporariu sei temporal nafatin.
Programa V Governu Konstitusional temi deit kona-bá programa no planu assaun balu ba dezenvolvimentu forsa defeza, maibé, latemi kona-bá definisaun polítika defeza foun. Husi polítika defeza ka defence policy mak governu bele hamosu programa ka planu assaun. Hakerek-nain halo ona publikasaun artigu ida iha jornal nasional sira iha edisaun Sexta, 3 Agostu 2012 ho titlu “Tansá Timor-Leste presiza polítika defeza foun”, artigu ne’e tenta ona estabelese argumentu lubuk ida kona-bá tansá Timor-Leste presiza polítika defeza ida foun no oinsá formula polítika defeza ida klaru. Tan ne’e, hakerek-nain sei larepete tan kestaun sira ne’e iha artigu ne’e. Argumentu prinsipál husi artigu ne’e katak tuir lolos governu deside uluk hodi halo definisaun polítika defeza foun nudar prioridade ida iha V Governu nian. Maski governu publika ona dokumentu lubuk ida; Força 2020, Planu Estratéjiku Dezenvolvimentu (PED) 2011-2030, no Programa V Governu, maibé seidauk iha klareza kona-bá destinu F-FDTL.

Dahuluk, bainhira seidauk iha polítika defeza ida klaru no realístika, entaun, bele hamosu implikasaun boot iha formulasaun programa no planu assaun sadeit mak governu hamosu. Husi polítika defeza ida klaru no kontextual mak bele kondus governu hodi hamosu programa, planu assaun no retórika iha âmbitu ida harmóniku. Karik lae, governu sei kontinua hamosu konfuzaun kona-bá saida no oinsá governu presiza halo hodi dezenvolve forsa defeza. Tuir lolos, governu hamosu ona inisiativa hodi estabelese white paper ne’ebé realísitiku.

Hakerek-nain hato’o ona argumentu iha publikasaun iha tempu kotuk katak presiza iha interaksaun harmóniku entre interesse estratéjiku, capability no orsamentu estadu. Iha realidade Timor-Leste ohin-loron, laiha interaksaun nune’e iha retórika no programa dezenvolvimentu forsa defeza.  Estadu defini tiha ona iha Plano Força 2020 postura forsa ida profissional hodi bele hala’o misaun oioin iha rai-laran no rai-liur, maibé, seidauk iha aliñamentu ida diak iha programasaun defeza, no alokasaun orsamentu estadu ida kiik nune’e, oinsá Timor-Leste bele realiza mehi boot sira ne’ebé hatur tiha ona iha dokumentu Força 2020 iha tinan sanulu nia laran? Tan ne’e, presiza iha re-definisaun polítika defeza ida hodi halo aliñamentu ho alokasaun orsamentu estadu no elementu estratéjiku sira seluk. Planu Estratéjiku Dezenvolvimentu 2011-2030 haforti tan deit saida mak hatur tiha ona iha planu Força 2020, tan ne’e, sei kontinua hamosu nafatin inkoerênsia entre objektivu estratéjiku estadu, postura militar no orsamentu estadu.

Daruak, Planu V Governu Konstitusional hamosu tan deit konfuzaun no inkoerênsia kona-bá modelu ka postura forsa defeza ne’ebé Timor-Leste presiza dezenvolve. Planu ne’e lakonsege identifika prioridade hodi hakbit forsa defeza.  Planu V Governu Konstitusional hatete katak:
“Governo sei desenvolve no capacita Companhia de engenharia ba F-FDTL para participa aktivamente iha dezenvolvimentu nacional. Governo sei halo esforsus hotuhotu, atu F-FDTL bele partisipa iha operasoens ba manutensaun de paz, iha Nasoens Unidas nia   aumenta kapasidade, iha ita-nia sistemas, kona-ba Komandu, Kontrolu, Komunikasoens, Komputadores no Informasoens (K4-I). Ita mós sei konsidera possibilidades, atu aumenta ita-nia partisipasaun, iha exersísius militares rejionais no internasionais”(p.72).

Programa ne’e hamosu pergunta tan latemi liu kona-bá Komponente estratéjiku sira seluk hanesan Komponente Forsa Naval Ligeira. Komponente ne’e estratéjiku tebtebes tan razaun prinsipál rua. Ida, klaru tebes katak destinu Timor-Leste depende ba iha tasi, riku-soin tokon ba tokon mak lakon kalan no loron, no to’o ohin-loron seidauk iha patrulhamentu regular ba iha plataforma mina no gas iha Tasi Timor, oinsá governu bele hamosu rendimentu alternativu ba Timor-Leste no assegura área vital sira ne’e? Rua, bainhira Timor-Leste sai ona membru ASEAN, sei iha expektativa boot ba Timor-Leste hodi partisipa iha exersisíu no kontrollu konjuntu marítima ho membru sira seluk, seguransa marítima sai nudar área prioridade ASEAN. Programa Governu ne’e hatur deit objektivu atu forsa defeza sai aktivu iha rejiaun no mundu, maibé, seidauk responde pergunta oinsá atu to’o iha neba.

Governu bele hakbit liután seguransa marítima liu husi aproximasaun rua. Ida, governu bele hatudu korajen boot hodi sosa tan ro ida iha tinan liman ne’e ne’ebé iha kbiit hodi halo patrulhamentu to’o iha territóriu marítima Timor tomak. Ho Projetu Tasi Mane ne’ebé boot tebtebes, ne’e signifika katak Timor-Leste tenki assegura liña vital sira. Infelizmente, laiha inkoerênsia entre planu dezenvolvimentu seitor defeza liliu iha área marítima ho programa sira ho kustu boot nune’e. 

Rua, governu bele foti desizaun estratéjiku ida hodi halo koperasaun marítima triangular entre Timor-Leste, Indonésia no Austrália. Nasaun tolu bele hamosu koperasaun marítima iha âmbitu nune’e tan iha shared strategic interests, maibé, tenki bazeia ba iha lei marítima ida klaru hodi regula koperasaun nune’e. Kualker koperasaun iha kontextu bilateral, trilateral ka multilateral, bainhira estadu foti desizaun estratéjiku nune’e, sei obriga estadu kompromete buat balu, tan ne'e, tenki iha análiza kle’an no lideransa ne’ebé iha koñesimentu kle’an kona-bá kontextu polítika nasaun viziñu nian no oinsa viziñu sira halo aproximasaun ba problema marítima sira ne’e. Maibé, bainhira analiza didiak dinámika diplomasia entre Timor-Leste ho Austrália, deklarasaun Sekretáriu Estadu Defeza, Sr. Júlio Tomas Pinto bainhira halo inkontru ho Diretur-Jeral Programa Koperasaun Defeza ho Pasífiku no Timor-Leste Air Commodore Anthony Jones iha Sexta-Feira 26 Juñu 2009, ne’ebé dehan katak:

“Dr Tomas Pinto agreed that maritime security is a priority for Timor-Leste's Defence authorities, stating, "The DCP talks are talking about how Australia will assist us to work together closely with the navy to control our sea. One of the important issues we talked about here is maritime surveillance. This is important also for TL," said Dr Tomas Pinto” (TEMPO SEMANAL on 7/03/2009 09:22:00 PM).
Tradusaun: Dr.Tomas Pinto konkorda katak seguransa marítima sai nudar prioridade ida ba autoridade defeza Timor-Leste, haktuir: Diskusaun Programa Koperasaun Defeza ne’e koalia kona-bá oinsá Australia sei ajuda Ita hodi servisu hamutuk besik liutan no naviu hodi kontrola ita-nia tasi. Kestaun importante ida ne’ebé ami koalia iha ne’e mak vijilânsia marítima. Ne’e importante mos ba TL” Dr. Tomas Pinto hatete.
Deklarasaun nune’e laajuda tebes Timor-Leste nia posizaun kona-bá negosiasaun ka diplomasia hodi estabelese koperasaun marítima entre Timor-Leste ho Austrália. Deklarasaun ne’e hamosu impressaun katak koperasaun marítima ruma entre nasaun rua ne’e fó deit vantajen ba Timor-Leste. Maibé, de facto, koperasaun nune’e mos responde objektivu estratéjiku Austrália, tan bele  hakbit  Komponente Naval Timor-Leste hodi halo atuasaun ho karákter pre-emptive ka preventivu ba grupu imigrante illegal ruma, ka grupu at sadeit molok sama iha rai Austrália. Retórika Exelénsia Sekretáriu Estadu Defeza nian indika fali katak koperasaun nune’e la’os iha âmbitu ida mutually advantageous. Iha diplomasia, linguajen nune’e mos iha impaktu ba pozisaun nasaun ida nian molok estabelese akordu koperasaun ruma, prinsipál tebtebes atu labele halekar kartaun iha meja leten bainhira iha hela jogu diplomasia. Tan responde ba deklarasaun ne’e, Air Commodore Jones dehan katak:
"We know the TL govt and the TL people are very concerned about what is going on in their exclusive economic zones and in their maritime areas, particularly in regard to illegal fishing. Australia's very eager to support the TL govt in making sure their maritime boundary is secure, and that the activities that are going on in that exclusive economic zone are well-known and well-managed by the Timor-Leste govt," said Air Commodore Jones”( (TEMPO SEMANAL on 7/03/2009 09:22:00 PM).       
Tradusaun:
“Ita hotu hatene katak governu Timor-Leste no povu TL prekupadu tebtebes kona-bá saida mak akontese iha sira-nia zona exklusivu ekonómiku no sira-nia área marítima, liliu kona-bá peska illegais. Australia hakarak tebes atu suporta governu TL hodi assegura katak sira-nia baliza marítima ne’e seguru, no governu Timor-Leste hatene liután no bele halo jestaun ba aktividade sira ne’ebé akontese iha iha zona exklusiva ekonómika ne’e”
Resposta ne’e atu dehan katak Timor-Leste deit mak sei hetan benefísiu husi koperasaun bilateral ruma iha área seguransa tasi-laran nian, ne’e lalos!. Iha ona akontesimentu oioin no análiza barak ne’ebé dehan katak mafiozu sira hatene oinsá sira uza Timor-Leste nudar staging point ka terminal ida ba sira-nia aktividade illegal molok sira atu hakat liu ba Austrália liu husi tasi. Karik nasaun viziñu sira iha duni seriedade atu kombate aktividade illegal sira ne’e presiza tebtebes esforsu konjuntu ida. Problema aktividade mafiozu sira ne’e problema komun, la’os deit problema Timor-Leste nian, mensajen ka impressaun ida ne’e mak makaer-ukun sira tenki hatete ba nasaun viziñu sira bainhira koalia kona-bá koperasaun ka akordu ruma. Iha realidade hatudu katak seidauk iha diplomasia ida konsistente.
Dalabarak ona iha retórika no dokumentu governu nian koalia kona-bá partisipasaun F-FDTL iha misaun manutensaun paz iha mundu, maibé, seidauk iha orientasaun polítika ida klaru kona-bá natureza partisipasaun ne’e rasik. Seidauk iha postura ida klaru. Partisipasaun ne’e atu halo papel kombate ka papel la’os-kombate ka combat or non-combat roles? Presiza iha orientasaun ida klaru atu nune’e Timor-Leste dezenvolve duni estrutura forsa ida ne’ebé iha kbiit naton hodi hala’o funsaun sira ne’e. Kbiit finanseiru Timor-Leste nian hatudu katak F-FDTL bele hala’o deit funsaun non-combat hanesan servisu enjeñaria no ligasaun militar iha misaun internasional. Funsaun nune’e sei efektivu liu hare husi kustu.  Atu bele hala’o non-combat roles iha misaun internasional, Instituto Defesa Naçional (IDN) presiza dezenvolve kurríkulu ida ne’ebé iha mos inklinasaun ajuda forsa defeza hala’o papel sira nune’e. Kursu sira hanesan lideransa, estudu estratéjiku, kursu báziku intellijênsia, komunikasaun, história misaun ONU iha mundu, no sst, ne’e importante tebes inklui iha kurrrikulu IDN atu nune’e ita-nia forsa defeza liliu ofisiais sira la’os deit iha koñesimentu kona-bá tátika no operasaun, maibé iha mos koñesimentu seluk ne’ebé sei tulun tebes sira iha misaun internasional.

Programa V Governu Konstitusional hamosu liutan konfuzaun bainhira programa ne’e koalia mos kona-bá problema seguransa sira seluk hanesan alterasaun klimátika, degradasaun ambiental, desastre naturais nudar problema defeza. Los duni sira ne’e problema, maibé, tenta atu haluan liutan konseitu defeza hodi inklui problema sira ne’ebé tuir lolos monu liu ba iha kategoria seguransa, ne’e bele hasusar liutan governu iha exekusaun planu dezenvolvimentu forsa defeza. Tuir lolos, governu koloka problema sira ne’e nudar problema seguransa no governu presiza defini polítika seguransa interna ida ketak ho kompreensivu, la’os kahur fali ho kestaun defeza ne’ebé iha nia mandatu konstitusional diferente. Los duni katak susar tebes atu halo diferensa entre problema seguransa interna no external, maibé, klaru tebtebes katak mandatu konstitusional F-FDTL la’os atu kombate problema disastre naturais ka degradasaun ambiental ka mudansa klimátika.
Tinan sanulu Timor-Leste kaer rasik ona kuda talin, maibé, governu seidauk hamosu polítika defeza ida klaru, koerente no realístiku. Timor-Leste nudar nasaun presiza estabelese postura forsa konvensional ida ne’ebé prontu servisu ba nasaun no umanidade, ne’e exiji governu ida ne’ebé iha atensaun maka’as no iha kbiit tékniku hodi artikula polítika defeza ida klaru. Infelizmente, tinan lima iha governasaun ne’e, Timor-Leste sei laiha polítika defeza ida própriu.  
                     
                       *Hakerek-nain:                                             
Lisensiadu iha Siênsia Polítika husi Universidade Flinders Austrália, Mestradu iha Diplomasia, Mestradu iha Assuntu Estratéjiku/Defeza husi Universidade Nasional Austrália.
Artigu ne’e opiniaun hakerek-nain nian rasik, la reflekta pozisaun se deit ka fatin ne’ebé hakerek-nain haknaar-an ba. 

No comments: