Tuesday 4 December 2012

Komunidade Bazartete Kontinua halerik Kondisaun Estrada No Kuran Eletrisidade


Tempo Semanal - Likuica, 04/12/2012

“Tinan Barak Ona Komunidade Sub-Distritu Bazartete Helerik Ba Kondisaun Estrada No Eletrisidade”

SOSIDADE sivil iha papel importante atu hala’o kontrolu sosial ba sasan estadu no sasan publiku. Ne’e duni, Organisasaun Naun Gevermental Luta Hamutuk oras ne’e daudauk hala’o hela monitorizasaun ba estrada no eletrisidade iha Distritu Liquisa kompostu husi Sub-Distritu 3 mak hanesan Sub-Distritu Bazartete, Maubara no Leorema.

Rezultadu monitorizasaun iha Sub-Distritu Bazartete hatudu katak, to’o ohin loron kondisaun Estrada iha parte ne’ebá at no Eletrisidade to’o agora seidauk hala’o instalasaun. Dala barak ukun nain sira dehan, infrastrutura mak sai prioridade. Maibe, realidade instratura iha baze seidauk la’o no pior liu tan komunidade sira iha baze sempre halerik nafatin ba kondisaun Estrada no eletrisidade.

Relasiona ho kondisaun ne’ebé mak komunidade Sub-Distritu Bazartete enfrenta, liu-liu iha kona ba eletrisidade Diretor Luta Hamutuk, Mericio Akara husu ba Sekertariu Estadu Elitrisidade tenke hala’o lalais instalasaun elestrisidade iha Bazartete, hodi nune’e komunidade sira bele utilisa ahi eletrisidade ne’ebé fornese husi Guvernu. Tanba, iha Sub-Distritu seluk hahu hala’o ona instalasaun mais tansá iha Bazartete to`o agora seidauk.

Aliende ne’e Luta Hamutuk mós husu ba Ministeriu Infrastrutura tenke hadia Estrada ne’ebé partensia ba Bazartete ne’ebé agora iha kondisaun at no Governu tenke toma responsabilidade ba asuntu hirak ne’e.

Antonio Mendonça komunidade husi Sub-Distritu Bazartete  hateten, durante ne’e iha Bazartete seidauk hala’o instalasaun eletrisidade. Maibe, iha Sub-Distritu seluk hala’o ona. Ne’e duni, husu ba Governu sentral, liu-liu parte kompotente tenke hala’o ona instalasaun eletrisidade hodi nune’e komunidade Bazartete mós bele asesu ba ahi eletrisidade.

“nu’udar povu ki’ik ami mós presiza naroman eletrisidade. Nune’e mós, ami mós presiza kondisaun Estrada ne’ebé di’ak, ne’e duni Ministeriu Infrastrutura tenke toma atensaun ba kondisaun Estrada ne’ebé iha, se lae povu agrikultor sira defisil atu lori sira nia produtu lokal ba iha merkadu. Tanba, la iha ransporte publiku mak atu hala’o movimentu iha ne’ebá.” Mendonça kestiona.(**)

No comments: